سۆەتلانا گالىشەۆا: سوچيدە الۋى ءتيىس مەدال قىزىما پحەنچحاندا بۇيىردى - فوتو

وسكەمەن. قازاقپارات - قازاقپارات ءتىلشىسى پحەنچحانداعى قىسقى وليمپيادا ويىندارىندا قولا جۇلدە العان فريستايلشى يۋليا گالىشەۆانىڭ وتباسىنا حابارلاسىپ، اناسىمەن سۇحباتتاستى.

- سۆەتلانا گەننادي قىزى، يۋليانىڭ جەڭىسى قۇتتى بولسىن! ونىمەن حابارلاسا الدىڭىز با؟ كوڭىل- كۇيى قالاي ەكەن؟

- قىزىم ءسىزدىڭ الدىڭىزدا عانا قوڭىراۋ شالعان. وتە قۋانىشتى ەكەنىن ايتتى. «بۇل مەدالدى سوچيدە الۋىم كەرەك ەدى. ءبىراق تاعدىر پحەنچحاندا تۇعىرعا كوتەرىلۋىمدى جازىپتى. وعان دا شۇكىر» دەپ اعىنان جارىلدى.

- يۋليا اقتىق سىنعا التىنشى ورىننان شىقتى. سول كەزدە كوڭىل- كۇيىڭىز قانداي بولدى؟

- ىرىكتەۋ كەزەڭدەرىندە قاتتى قوبالجىپ وتىردىم. اقتىق سىنعا جولداما الار تۇستا، ءتىپتى جىلاپ جىبەردىم. ابىروي بولعاندا، فينالعا القىنباي جەتتى. ال فينال وتكەن كەزدەگى كۇيىمدى جەتكىزۋ، ءتىپتى مۇمكىن ەمەس.  قىزىمنىڭ جۇلدەگەر بولعانىن قايتالاۋ ترانسلياتسياسىندا عانا ءتۇسىندىم دەۋگە بولادى.

- قىزىڭىزدى ساعىنعان شىعارسىز؟ كورىسپەگەلى كوپ بولدى ما؟

- بۇل وليمپيادا سيكلى وتە قاربالاس بولدى. ۇيگە كوپ قونبادى دەۋگە بولادى. 31 -قاڭتاردا الماتىدان ۇشىپ كەلىپ، ءبىر كۇن قاسىمىزدا بولدى. بىلگەن دۇعامىزدى ايتىپ، اق باتامەن شىعارىپ سالدىق. ءوزىم شىركەۋگە بارىپ، تىلەۋىن تىلەپ ءجۇردىم. كورەياعا جەتكەن كەزىندە قوڭىراۋ شالدى. «تاماقتارى جاعىپ ءجۇر مە؟» دەپ سۇرادىم. «ءسىز ويلاعانداي تەك سوۋس قانا جەپ جۇرگەن جوقپىز. الاڭداماڭىز» دەپ كۇلگەن سوندا. بۇيىرسا، 18 -اقپاندا ولار الماتىدا بولادى. ەندى، تەزىرەك ۇيگە امان-ەسەن جەتۋىن تىلەيمىن.

- يۋليا سپورتقا قالاي كەلدى؟ بۇل جاعىنان ول كىمگە تارتقان؟

- يۋليانىڭ اكەسى وسىدان 7 جىل بۇرىن قايتىس بولعان. دەنە ءبىتىمى جاعىنان سوعان كوبىرەك تارتسا كەرەك. ءسابي كەزىندە اعاش باسىنا ورمەلەپ شىعاتىن تەنتەك بولدى. ال مەن تۋمىسىمنان بيىكتەن قورقامىن. ول بالاباقشاعا باراتىن جاسقا كەلگەندە ەلدەگى جاعداي قيىن ەدى. بالاباقشالار جابىلىپ قالعان. سوندىقتان، بوس ۋاقىتىن ۇيىرمەدە وتكىزسىن دەپ بيگە بەردىك. ءبيدى الىپ كەتە المادى. مۇلدە ۇناتپادى. ودان دا سەكىرىپ ويناۋعا بەيىم تۇراتىن. العاش شاڭعىعا اپارعانىمىزدا كوزى جايناپ شىعا كەلگەن. سول كەزدەن باستاپ شاڭعىدان قول ۇزبەدى. جاتتىعۋعا ەكى اۆتوبۋسپەن قاتىنايتىن. وعان دا كوندى. 9 جاسىندا العاشقى باپكەرى گەرمانياعا كوشىپ كەتتى. جاڭا باپكەر كەلگەننەن كەيىن ەكى ايدان سوڭ، ونشاقتى بالادان بەسەۋ عانا قالدى. سونداي تاباندىلىعىنىڭ ارقاسىندا بۇگىن مىنە جەتىستىككە جەتىپ وتىر.

- يۋليا ۇيدەگى نەشىنشى بالا؟

- ايتىپ وتكەنىمدەي، ول تۋعان كەزدە ەلىمىز ءالى نارىققا بەيىمدەلىپ ۇلگەرمەگەن بولاتىن. سوندىقتان دا شىعار، يۋليادان باسقا بالامىز بولمادى. ول ءوزى تۇيىق بولاتىن. ونى ۇيىرمەگە دە سول ءۇشىن بەردىك. قۇرداستارىمەن ارالاسىپ، ورتاعا بەيىمدەلگەنىن قالادىق. جالعىز بالا بولعان سوڭ تاربيە مەن ماحابباتتان كەندە قالعان جوق. ءبىراق جالعىزىمىز ەكەن دەپ، بەتالدى وبەكتەگەن دە ەمەسپىز. جاتتىعۋعا اپارعان كەزدە كەيبىر انالاردىڭ قىزدارىنا «سەنەن ارتىق بالا جوق. سەنىڭ ءىسىڭنىڭ ءبارى كەرەمەت» دەپ جاتقانىن ءجيى ەستيتىنمىن. ال ءبىز دۇرىس قىلىعىن قۇپتاپ، بۇرىس قىلىعىن سىناپ وتىراتىنبىز. سول تاربيەمىز دۇرىس بولعان سياقتى.

- اڭگىمەڭىزگە راحمەت.