پحەنچحاندا قازاق قىزى قايدان ءجۇر
پحەنچحان وليمپياداسىنىڭ باسپا ءسوز ورتالىعىندا قازاقستاننان بارعان ءبىرقاتار تىلشىلەر قاۋىمى جۇمىس ىستەپ وتىرعان ەدىك. سول ساتتە، «و، مەنىڭ وتانداستارىم كەلىپتى عوي»، - دەگەن قازاق قىزىنىڭ نازىك ءۇنى قۇلاعىمىزعا ساڭق ەتە قالدى.
تۋرا ءبىر تۋىسقانىن كورگەندەي ەمەن- جارقىن امانداسىپ جاتىر. قازاقستان تىلشىلەرى وليمپيادا ءۇشىن ارنايى تىگىلگەن كيىممەن جۇرگەندىكتەن، كوزىنە وتتاي باسىلعانىمىز انىق.
امان- سالەمنەن كەيىن تانىستىققا كوشىپ، اڭگىمەگە تارتتىق. قارىنداسىمىزدىڭ اتى- ءجونى جازيرا وتەسباي قىزى ەكەن.
- مۇندا قايدان ءجۇرسىڭ، نە ىستەيسىڭ؟
- وليمپيادا ويىندارىنا كەلگەنمىن - ۆولونتەرمىن.
- قازاقستاننىڭ قاي وڭىرىنەن كەلدىڭ؟
- تۋعان جەرىم كيەلى ماڭعىستاۋ وبلىسى. 1996 -جىلى 9 - جەلتوقساندا اقتاۋ قالاسىندا دۇنيەگە كەلدىم. قازىر شەتەلدە ءبىلىم الىپ جاتقان قارىنداستارىڭىزدىڭ ءبىرىمىن.
- قاي ەلدە، قانداي وقۋ ورىنىندا وقىپ جاتىرسىڭ؟
- وسىعان دەيىن، الماتى قالاسىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە «فيزيكا» ماماندىعىن ءبىتىردىم. كەيىن ليتۆا قالاسىنداعى كاۋناس تەحنولوگيالىق ۋنيۆەرسيتەتىندە «قولدانبالى فيزيكا» ماماندىعى بويىنشا ءبىلىم الدىم جانە قازىرگى تاڭدا وسى جوعارى وقۋ ورنىندا ماگيسترلىك ءبىلىم الۋدامىن.
- مۇندا، وليمپيادا ويىندارىنا ەرىكتى رەتىندە قالاي كەلدىڭ؟
- نەگىزى مەن ۆولونتەرلىك قىزمەتپەن 2015 -جىلدان باستاپ اينالىسىپ كەلەمىن. ەڭ العاش ەرىكتى رەتىندە Charity Wish Tree قايىرىمدىلىق شاراسىندا بولدىم. ول كەزدە ستۋدەنت ەدىم. ۋنيۆەرسيتەت اتىنان قاتىستىم.
ودان كەيىن Almaty Invest Forum, The 28th Winter Universiade, EXPO- رەسپۋبليكالىق حوككەي جارىستارىندا، EURO Futsal Cup Qualifying round جانە UEFA Futsal Cup Finals-تا اۋدارماشى جانە ۇيىمداستىرۋشى قىزمەتتەرىن اتقاردىم. ال پحەنچحاندا ءوتىپ جاتقان ءتورتجىلدىق دوداسىنا 2016 -جىلى «ۆكونتاكتە» الەۋمەتتىك جەلىسىندە ەرىكتى قابىلداپ جاتقانىن بايقاپ قالدىم. بەلگىلەنگەن تالاپتارعا سايكەس ءوتىنىشىمدى قالدىردىم. قىزىعى، ەڭ سوڭعى ەرىكتىلەردىڭ ءبىرى بولىپ ءوتىنىش قالدىرىپپىن.
- سوڭعى كۇنى ءوتىنىش قالدىرساڭ دا بىردەن ىلىگىپ كەتتىڭ بە؟
- قابىلداناتىنىمدى العاشىندا بىلگەن جوقپىن. كەيىن 2 ايدان كەيىن «ءبىرىنشى تۋردان ءوتتىڭىز» دەگەن حات الدىم. ءبىرىنشى، انكەتا بويىنشا ىرىكتەۋ بولدى. ەكىنشى تۋردا اعىلشىن تىلىنەن ءبىلىمىمىزدى تەكسەردى. ودان دا «ءساتتى ءوتتىڭىز» دەگەن حات الدىم. كەيىن Skyp ارقىلى اعىلشىن تىلىندە سۇحبات الدى. باعىما قاراي جانە اعىلشىن ءتىلىن ەركىن مەڭگەرگەنىمنىڭ ارقاسىندا بۇل سىناقتان دا سۇرىنبەي ءوتتىم.
- مۇندا وليمپيادا ويىندارى اياقتالعانشا بولاسىڭ با؟
- ارينە، XXIII قىسقى وليمپيادا ويىندارىنىڭ اياعىنا دەيىن جانە ودان كەيىن كەلەتىن پارالامپيادا ويىندارىندا دا قىزمەت ەتەمىن. جاڭا ايتىپ وتكەنىمدەي، ىرىكتەۋدەن سۇرىنبەي وتكەن كەزدە ولار مەنەن سوڭعى رەت وليمپيادا ويىندارى مەن پارالامپيادا ويىندارىنىڭ قايسىسىنا قاتىسا الاتىنىمدى سۇرادى. مەن كەرەك بولسا ەكەۋىندە دە قىزمەت اتقارۋعا دايىن ەكەنىمدى ايتتىم. سوسىن وليمپيادانى ۇيىمداستىرۋ كوميتەتى ماعان وتكەن جىلدىڭ قاراشا ايىندا ۇسىنىسىمنىڭ قابىلدانعانى تۋرالى حابارلاپ، وليمپيادا جانە پاراليمپيادا ويىندارىنا دا قاتىسا الاتىنىمدى جەتكىزدى. مەن بىردەن كەلىسىمىمدى بەردىم. مىنە، قازىر سىزدەرمەن بىرگە وليمپيادادامىن.
- وسىنداي ءىرى شارادا ەرىكتىلەر قاتارىندا قىزمەت ەتۋ ساعان ۇنايتىن سياقتى؟!
- ءيا، مۇنداي قىزمەت ەتۋ ءوزىمنىڭ بالا كۇنگى ارمانىم بولاتىن. ءوزىمدى وسىنداي ءىرى حالىقارالىق شارالاردا كورگىم كەلگەن. مىنە، بۇگىن سول ارماندار ورىندالىپ جاتىر. جالپى، جۇمىسىما ريزامىن. كورەياعا كەلگەن ءبىرىنشى كۇنىمنىڭ ءوزى بەلگىلى كانالداردىڭ تۇسىرىلىمىنەن باستالدى. قالاساڭىز، ول تۋرالى وليمپيادا ويىندارىنىڭ سوڭىندا ايتىپ بەرەرمىن، قازىر ايتا المايمىن. سەبەبى، ازىرگە ول تۋرالى ايتۋعا بىزگە تىيىم سالىنعان. ءار ءىس- شارانىڭ وزىندىك قۇپيالارى بولادى عوي.
- وندا قازىرگى ەرىكتى رەتىندە اتقاراتىن قىزمەتىڭدى ايتا كەتسەڭ.
- قازىرگى قىزمەتىم: Main Press Centre-دە IT ۆولونتەرى، ياعني Service Desk Media C Assistant قىزمەتىن اتقارامىن. ءبىزدىڭ ماقساتىمىز Press جانە Photo Workroom Wifi پرينتەر جانە باسقا دا تەحنيكالىق جاعىنان ءار ەلدەن كەلگەن جۋرناليستەرگە كومەكتەسۋ.
- سەنىمەن بىرگە قازاقستاننان وسىندا قىزمەت اتقارىپ جۇرگەن باسقا كىمدەر بار؟
- ازىرگە وسىندا مەن جالعىزبىن. قازاقستاندا تۋعان، ءبىراق ۇلتى كارىس ءبىر ۆولونتەردىڭ بارىن ەستىدىم. ءبىراق بۇگىنگى كۇنگە دەيىن ونى جولىقتىرا المادىم.
- اعىلشىن تىلىمەن قوسا، كورەي ءتىلىن دە بىلەسىڭ بە؟
- قازاق ءتىلى - انا ءتىلىم عوي. ءوز تىلىمنەن باسقا اعىلشىن جانە ورىس تىلدەرىندە ەركىن جانە جاتتىق سويلەيمىن. كورەي ءتىلىن ەندى- ەندى ۇيرەنىپ جاتىرمىن.
- وليمپيادا ويىندارىنا ءوزىڭ تۋعان قازاقستاننان ەل نامىسىن قورعاۋعا كىمدەردىڭ كەلگەنىن بىلەتىن بولارسىڭ؟ كىمگە جانكۇيەر بولاسىڭ؟
- سپورتشىلاردىڭ بارلىعىن تاني بەرمەيمىن. مەن ەلىمىزدەن قانشا سپورتشى كەلسە، سونىڭ بارلىعىنا جانكۇيەرمىن. ءوزىم ەرىكتى رەتىندە قىزمەت اتقارىپ جاتقان اق وليمپيادا ويىندارىندا جەرلەستەرىم جەڭىسكە جەتە بەرسىن دەگەن تىلەگىمدى جەتكىزگىم كەلەدى.
- اڭگىمەڭە راحمەت. ەڭبەگىڭ جانا بەرسىن!
اۆتور: كۇنسۇلتان وتارباي
