قازاقستاننىڭ ۇزدىك ج و و وقىتۋشىلارى انىقتالدى
500-گە جۋىق ۇمىتكەردىڭ اراسىنان ىرىكتەلىپ، ۇزدىك دەپ تانىلعان 200 وقىتۋشىنى ق ر ءبىلىم جانە عىلىم ءمينيسترى ەرلان ساعاديەۆ ماراپاتتادى.
«بۇگىن ەلىمىزدىڭ 53 جوعارى وقۋ ورنىنان 200 ادام «جوعارى وقۋ ورنىنىڭ ۇزدىك وقىتۋشىسى» اتاعىنىڭ يەگەرى بولدى. ونىڭ ىشىندە 49 عىلىم دوكتورى، 121 عىلىم كانديداتتارى، 29 PhD دوكتورلارى مەن 6 ماگيستر بار. سىزدەردى شىن جۇرەكتەن قۇتتىقتايمىن، باقىت، ساتتىلىك جانە ەڭبەكتە تابىس تىلەيمىن. بۇگىن ۇزاق ماراپاتتاۋ كەشى بولعالى تۇر، 200 ادامدى ەكىگە ءبولۋدى ۇسىنعاندا، بارلىعى ءمينيستردىڭ قولىنان ماراپات العىسى كەلىپتى»، - دەپ كۇلدى ق ر ءبىلىم جانە عىلىم ءمينيسترى ەرلان ساعاديەۆ ماراپاتتاۋ راسىمىندە.
مينيسترلىكتىڭ حابارلاۋىنشا، بايقاۋعا رەسپۋبليكانىڭ 79 جوعارى وقۋ ورنىنان 459 ۇمىتكەر قاتىستى. ۇمىتكەرلەردىڭ عىلىمي- پەداگوگيكالىق قىزمەتى ساپالىق جانە ساندىق كورسەتكىشتەرى بويىنشا باعالاندى. ونىڭ ىشىندە، وقۋلىقتاردى، مونوگرافيالاردى، وقۋ قۇرالدارىن اعىلشىن تىلىندە ازىرلەۋ، قاتىسۋ جانە باسىپ شىعارۋ، كاسىبي قىزمەتى بويىنشا شەت تىلىندەگى اشىق ونلاين كۋرستاردىڭ پلاتفورماسى بازاسىندا كۋرستان تابىستى وتكەنى تۋرالى سەرتيفيكاتتىڭ بولۋى جانە ت. ب. تالاپتار قويىلعان.
«بايقاۋدىڭ باستى ماڭىزدىلىعى - ءوزىمدى باسەكەلى ورتادا كورسەتۋ مۇمكىندىگى دەر ەدىم. قازىرگى باسەكەلى ورتا كوپتەگەن قابىلەتتەردىڭ بولۋىن تالاپ ەتەدى. ج و و ۇزدىك وقىتۋشىسىنا قويىلاتىن باستى تالاپ - اعىلشىن ءتىلىن ءبىلۋ. سەبەبى بارلىق يننوۆاتسيالاردىڭ 80 پروتسەنتى اعىلشىن ءتىلدى قۇرالدار ارقىلى جەتەدى. ەكىنشىدەن، ۇزدىك وقىتۋشىلار زاماناۋي يننوۆاتسيالىق تەحنولوگيالاردى ءبىلۋى قاجەت. ءبىزدىڭ ۋنيۆەرسيتەتتە توعىز نەمەسە ون ماماندىق اعىلشىن تىلىندە وقىتىلادى، ياعني ستۋدەنتتەر - بولاشاق مۇعالىمدەر ءوز ءبىلىمىن اعىلشىن تىلىندە شىڭداۋى كەرەك. ارينە، وقىتۋشى ستۋدەنتتەردەن ەكى ەسە ءبىلىمدى بولۋى شارت. مينيسترلىك بايقاۋدى وتە ءادىل ۇيىمداستىردى. مۇنداي بايقاۋلار ءبىز ءۇشىن وتە ماڭىزدى»، - دەدى بايقاۋ جەڭىمپازى، فيزيكا- ماتەماتيكا عىلىمدارىنىڭ دوكتورى، پروفەسسور، اباي اتىنداعى قازۇپۋ قولدانبالى زەرتتەۋلەر ورتالىعىنىڭ ديرەكتورى ۆلاديمير كوسوۆ.
سەرتيفيكات پەن توسبەلگىدەن بولەك، «ۇزدىك جوو وقىتۋشىلارىنا» ارنايى گرانت بەرىلەدى. بۇل گرانت جەڭىمپازدارعا الەمنىڭ جەتەكشى ۋنيۆەرسيتەتتەرىندە عىلىمي- زەرتتەۋ جۇمىستارىن جۇرگىزۋ مەن بىلىكتىلىگىن ارتتىرۋ ماقساتىندا تاعىلىمدامادان وتۋگە مۇمكىندىك بەرەدى.
ايتا كەتەيىك، ەرلان ساعاديەۆ 2018 -جىلى قازاقستاندىق جوعارى وقۋ ورىندارىن ۇلكەن وزگەرىستەر كۇتىپ تۇرعانىن، ماماندىقتار بويىنشا ج و و- لاردىڭ ءبىرىڭعاي رەيتينگى جاسالاتىنىن حابارلاعان ەدى.
