قازاقستاندىق جوعارى وقۋ ورىندارىن ۇلكەن وزگەرىس كۇتىپ تۇر - ساعاديەۆ
بۇل تۋرالى ق ر ءبىلىم جانە عىلىم ءمينيسترى ەرلان ساعاديەۆ استانادا وتكەن «ۇزدىك جوو وقىتۋشىسى - 2017» ماراپاتتاۋ كەشىندە ءمالىم ەتتى.
مينيستر 2018 -جىلدىڭ ەلىمىزدەگى جوعارى ءبىلىم بەرۋ جۇيەسى ءۇشىن، اسىرەسە جوعارى وقۋ ورىندارى ءۇشىن ماڭىزدى بولاتىنىن باسا ايتتى.
«بيىل ەلدەگى جوعارى وقۋ ورىندارى كوپتەن كۇتكەن اكادەميالىق ەركىندىككە قول جەتكىزەدى. زاڭ قازىر ماجىلىستە، العاشقى ەكى ايدا ءبىرىنشى وقىلىمنان وتەدى دەپ ۇمىتتەنەمىز. بۇل قازاقستاننىڭ ءاربىر ۋنيۆەرسيتەتىنىڭ ىشكى ءومىرىن قاتتى وزگەرتەدى. ءار ۋنيۆەرسيتەت ءوزىنىڭ ءبىلىم بەرۋ باعدارلامالارىن جاساۋدا، ەنگىزۋدە ەركىندىككە يە بولادى. ءبىراق، ەركىندىكپەن قاتار، ءار ءىسىمىز ءۇشىن جاۋاپكەرشىلىك تە ەسەلەي تۇسەدى. كەز كەلگەن رەگلامەنتتىڭ بولماۋى نەمەسە ازايۋى ونىمدەردى ازىرلەپ، بالالارىمىزعا ءبىلىم بەرەتىن ادامدارعا ۇلكەن جاۋاپكەرشىلىك جۇكتەيدى»، - دەدى ە. ساعاديەۆ وقۋشىلار سارايىندا وتكەن »ۇزدىك ج و و وقىتۋشىسى - 2017» ماراپاتتاۋ كەشىندە.
سونىمەن بىرگە، مينيستر بيىل بارلىق ماماندىقتار بويىنشا قازاقستاندىق ج و و- لاردىڭ رەيتينگى جاسالاتىنىن، بۇل رەيتينگتىڭ ابيتۋريەنتتەر اراسىندا ۇلكەن ماڭىزعا يە بولاتىنىن حابارلادى.
«ءبىز ۇلتتىق كاسىپكەرلەر پالاسىنا، بيزنەسمەندەرگە، ەكونوميكانىڭ ناقتى سەكتورلارىنا، ع ز ي، قوعامداستىقتارعا بارلىق جوعارى وقۋ ورىندارىنىڭ ءبىلىم بەرۋ باعدارلامالارىن باعالاۋعا قاتىسۋىن وتىندىك. ولار كەلىسىم بەردى»، - دەدى ول.
ءمينيستردىڭ مالىمدەۋىنشە، العاش رەت IT- ماماندىقتار بويىنشا ج و و- لاردىڭ ءبىلىم بەرۋ باعدارلامالارى باعالاندى. رەيتينگ ناتيجەسى كەلەسى ايدا شىعۋى مۇمكىن.
«وتكەن اپتادا الماتىدا 83 رەكتور مەن پرورەكتور جينالعان وتىرىستا رەيتينگتىڭ الدىن الا ناتيجەسىن كورسەتتىك. بۇل ۇلكەن شۋ شىعاردى. قالىڭ كوپشىلىككە جارىققا شىققاندا دا بۇل رەيتينگ ستۋدەنتتەر مەن وقۋعا ءتۇسۋدى جوسپارلاپ جۇرگەن وقۋشىلار اراسىندا ۇلكەن رەزونانس تۋدىرادى. كەي ستۋدەنتتەر IT- ماماندىقتار بويىنشا ەڭ ۇزدىك جوو- دا وقيدى ەكەنمىن دەپ قۋانادى. ال كەيبىرى IT- ماماندىقتار بويىنشا 123-ورىنداعى جوو- دا وقىپ جۇرگەنىن ءبىلىپ، نالۋى مۇمكىن. بۇعان دايىن بولۋ كەرەك»، - دەپ اتاپ ءوتتى مينيستر.
IT- ماماندىقتاردان سوڭ، پەداگوگيكالىق ماماندىقتار بويىنشا جوو- لار رەيتينگى جاسالادى. ءارى قاراي، مەديتسينالىق، ەكونوميكالىق، زاڭ ماماندىقتارى بويىنشا جالعاسادى.
«مۇنداي قيىن جۇمىسقا ءبىز ەمەس، ءبىزدىڭ قىزمەتىمىزدىڭ تۇتىنۋشىلارى بولىپ وتىرعان بيزنەسمەندەر مەن كومپانيالار، ستۋدەنتتەرىمىزدى جۇمىسقا الاتىندار قاتىسادى. سول سەبەپتى، بيىلعى جىل جوعارى ءبىلىمنىڭ نە ەكەنىن، قالاي، كىم ءۇشىن جۇمىس ىستەۋىمىز كەرەكتىگىن، شىنايى تۇتىنۋشىلارىمىزدىڭ كىم ەكەنىن، ولاردىڭ ءبىزدىڭ جۇمىستى قالاي باعالايتىنىن ءتۇسىنۋ تۇرعىسىندا وزگەرىستەرگە تولى بولماق. مەن سىزدەردىڭ تۇسىنىستىكپەن قاراۋلارىڭىزدى جانە وزدەرىڭىز ەڭبەك ەتەتىن ۋنيۆەرسيتەتتەردىڭ بەلسەنە قاتىسۋىنا كۇش سالۋلارىڭىزدى سۇرايمىن»، - دەپ ءوز ءسوزىن تۇيىندەدى مينيستر.
اۆتور: ايجان سەرىكجان قىزى
