حالىققا اۆتوبان عانا ەمەس، ءوزى ۇيىنە دەيىنگى جول دا كەرەك - نۇرسۇلتان نازاربايەۆ

استانا. قازاقپارات - ق ر پرەزيدەنتى نۇرسۇلتان نازاربايەۆ رەسپۋبليكالىق جولدارعا بولىنەتىن قاراجاتتى قايتا قاراستىرىپ، وبلىستار ىشىندەگى جولداردىڭ قۇرىلىسىنا ءبولۋدى تاپسىردى، دەپ حابارلايدى قازاقپارات ءتىلشىسى.

«مىسالى، قازىر شىداي تۇراتىن جوبالار بولسا، وندا ول قاراجاتتى وبلىستىڭ ىشىندەگى جولدارعا سالۋ كەرەك. ادام ءوزىنىڭ ۇيىنە دەيىن جول كورمەسە، سەنىڭ سالىپ جاتقان رەسپۋبليكالىق جولىڭ نەمەنەگە كەرەك؟ اركىم اياعىنداعى باتەڭكەسى قىساتىن بولسا، الدىمەن سونى ويلايدى. سوندا عانا حالىق كورەدى. «مىنە، جول سالىنىپ جاتىر» دەپ ايتادى. بۇل جەكە باعدارلاما («نۇرلى جول» - اۆت.)، سونى قايتادان قاراۋ قاجەت. قاراجاتتى قالاي سالۋىمىز كەرەك؟ وسىنى پىسىقتاۋىمىز قاجەت»، - دەدى ن. نازاربايەۆ ۇكىمەتتىڭ كەڭەيتىلگەن وتىرىسىندا.

پرەزيدەنتتىڭ ايتۋىنشا، جولداردىڭ قۇرىلىسىنا ارنالعان قاراجاتتى قايتا قاراستىرعان كەزدە بيۋدجەت قارجىسىن ءتيىمدى يگەرۋگە باسا نازار اۋدارعان ءجون. «ەندى، ەكى اۋداننىڭ اراسىنداعى جولدى بەتونمەن التى جولاق ەتىپ جاساۋدىڭ قاجەتى جوق. ەكى جولاق، ءجۇرىپ تۇرۋعا ىڭعايلى بولاتىنداي. سوسىن وبلىستىق بيۋدجەتتەردىڭ مۇمكىندىكتەرىن پايدالانعان ءجون»، - دەپ اتاپ كورسەتتى ن. نازاربايەۆ.

ق ر ينۆەستيتسيالار جانە دامۋ ءمينيسترى جەڭىس قاسىمبەكتىڭ سوزىنە قاراعاندا، الداعى ۋاقىتتا جەرگىلىكتى جەردەگى جولداردىڭ قۇرىلىسىنا بولىنەتىن قارجىنىڭ كولەمى ارتادى. «ءبىز اكىمدىكتەرمەن كەلىستىك، قوسىمشا 60 ميلليارد تەڭگە بولىنەدى. 30 ميلليارد تەڭگەنى - ۇكىمەت، قالعان جارتىسىن - اكىمدىكتەر. الداعى ۋاقىتتا جىل سايىن 150 ميلليارد تەڭگەنى بولىنەدى دەگەن جوسپار بار. ونى دا ەكى جاق ءبولىپ كوتەرەدى. بيىل ءبىز جەرگىلىكتى جەردە  4000 شاقىرىم جولدى جوندەپ شىعۋدى جوسپارلاپ وتىرمىز»، - دەيدى ج. قاسىمبەك.

 ايتا كەتەيىك، وتىرىستا مەملەكەت باسشىسى نۇرسۇلتان نازاربايەۆ «قازاۆتوجول» ۇلتتىق كومپانياسىنىڭ جۇمىسىن سىنعا الدى.

اۆتور: ارمان اسقاروۆ