ەلباسى سۇلتانوۆقا: بۇل ەكىنشى ەسكەرتۋ، ءۇشىنشىسى سوڭعى بولۋى مۇمكىن

استانا. قازاقپارات - ۇكىمەتتىڭ كەڭەيتىلگەن ماجىلىسىندە ق ر پرەزيدەنتى نۇرسۇلتان نازاربايەۆ قارجى ءمينيسترى باقىت سۇلتانوۆقا ەكىنشى ەسكەرتۋىن جاسادى، دەپ حابارلايدى قازاقپارات.

«تەكسەرۋشىلەر سانىن قىسقارتۋدى ەسكەرە وتىرىپ، قاداعالاۋ- تەكسەرۋ قىزمەتتەرىنە اۋقىمدى رەۆيزيا جۇرگىزۋدى تاپسىرعان بولاتىنمىن. سالىق ورگاندارىن وڭتايلاندىرىپ، قىزمەتكەرلەر سانىن قىسقارتۋى كەرەك ەدى. ناقتىراق ايتقاندا، ۆەدومستۆو (قارجى مينيسترلىگى - اۆت.) 600 ادام تۋرالى ايتتى. ەندى سىزدەر قىسقارتۋدىڭ ورنىنا، ولاردى باسقا باعىتتارعا اۋىستىراتىندارىڭدى ايتىپ جاتسىزدار. بۇل قانشالىقتى ءوزىن اقتايدى»، - دەپ سۇرادى پرەزيدەنت قارجى ءمينيسترى باقىت سۇلتانوۆتان.

ءمينيستردىڭ سوزىنە قاراعاندا، ۆەدومستۆو تاراپىنان تەكسەرۋلەردى 37,5 پايىزعا قىسقارتۋ جوسپارلانعان. دەگەنمەن، بۇل جوسپار ارتىعىمەن ورىندالىپ، سالىقتىق ءارى كەدەندىك تەكسەرۋلەر 45 پايىزعا ازايدى.

«جالپى بۇل تەكسەرۋشىلەر باسقا باعىتقا اۋىستىرىلدى. سەبەبى قازىرگى كەزدە قازاقستان مەن وزبەكستان شەكاراسىندا اۋقىمدى جۇمىستار باستالدى. بۇل جەردەگى كەيبىر بەكەتتەر بويىنشا تاۋلىك بويى باقىلاۋعا كوشتىك. سوندىقتان ادامداردىڭ ءبىر بولىگىن وسىندا كوشىردىك. بۇدان بولەك، تەكسەرۋشىلەردىڭ نەگىزگى بولىگىن ەكسپورتتىق باقىلاۋ بويىنشا ماقساتتاردى شەشۋگە اۋىستىرۋدامىز. بۇل مىندەتتى ينستيتۋتسيونالدى تۇردە بەكىتىپ، جاقىن ارادا قايتا قۇرىلىمداۋىمىز كەرەك. تەكسەرۋشىلەر سانىن 600  ادامعا ازايتىپ، ولاردى اتالعان باعىتتارعا اۋىستىرامىز»، - دەدى باقىت سۇلتانوۆ.

الايدا مەملەكەت باسشىسى مينيسترگە كەزەكتى ەسكەرتۋىن جاسادى.

«مەن ساعان (قارجى ءمينيسترى باقىت سۇلتانوۆ - اۆت.) ەكىنشى ەسكەرتۋىمدى جاسايمىن. ءۇشىنشىسى سوڭعى بولۋى مۇمكىن. جۇمىسىڭدى اتقار. بارلىعىن تارتىپكە كەلتىرۋ كەرەك، بارشا ۇكىمەت وسىمەن اينالىسۋى ءتيىس»، - دەدى ق ر پرەزيدەنتى نۇرسۇلتان نازاربايەۆ.