قانات بوزىمبايەۆ پرەزيدەنتتەن سوگىس ەستىدى

استانا. قازاقپارات - قازاقستاندا ءتورتىنشى مۇناي وڭدەۋ زاۋىتىن سالۋعا قاتىستى شەشىم قابىلداۋدى جەدەلدەتۋ قاجەت.

بۇل تۋرالى بۇگىن ۇكىمەتتىڭ كەڭەيتىلگەن ماجىلىسىندە قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.

«مۇناي مەن گازدى قايتا وڭدەۋ ماڭىزدى باعىت سانالادى. ءبىز بۇل جايىندا ايتتىق جانە سالانى دامىتاتىن بولامىز. ول قاجەت ءارى بۇل سالا ءالى دە ۇزاق ۋاقىت باسىمدىققا يە بولادى. بۇعان قوسا، ەلدى جانارمايمەن قامتاماسىز ەتۋ ماسەلەسى ءجيى كوتەرىلەدى»، - دەدى ەلباسى.

وسى رەتتە نۇرسۇلتان نازاربايەۆ ەلىمىزدەگى ءۇش مۇناي وڭدەۋ زاۋىتىنىڭ جاڭعىرتىلعاندىعىن اتاپ ءوتتى.

«ءبىز ءۇش مۇناي وڭدەۋ زاۋىتىن جاڭعىرتتىق. جانار-جاعارماي تاپشىلىعى تاياۋ 3-4 جىلدا جابىلادى. قانات بوزىمبايەۆ (ق ر ەنەرگەتيكا ءمينيسترى - اۆت.) سولاي عوي؟ ودان كەيىن قايتادان يمپورتتايتىن بولامىز. تەز ارادا ءتورتىنشى زاۋىت سالۋ قاجەتتىگىن ايتقان كەزدە، سىزدەر ونىڭ قاجەت ەمەستىگىن، بىزدە جانار-جاعارماي جەتكىلىكتى بولىپ، قايدا جىبەرەرىمىزدى بىلمەي قالاتىنىمىزدى ايتىپ، دالەلدەدىڭىزدەر. ياعني، ءبىز پروبلەما قۋىپ جەتكەن كەزدە جۇمىس ىستەي باستايمىز. سوندىقتان قازىرگى ۋاقىتتا بۇل ىسپەن اينالىسىپ جاتقانىن بىلەمىن جانە قاراشىعاناقتاعى ينۆەستورلارمەن اڭگىمە بولدى. مۇناي وڭدەۋ زاۋىتى بويىنشا شەشىم قابىلداۋدى جەدەلدەتۋ قاجەت»، - دەدى قازاقستان پرەزيدەنتى.