قازاق تەننيسشى قىتايلىق قارسىلاسىن تىزە بۇكتىردى

استانا. قازاقپارات - نيۋ-دەلي قالاسىندا (ءۇندىستان) فەدەراتسيا كۋبوگى ءۇشىن قازاقستان - قىتاي ماتچىندا كورتقا العاشقى بولىپ زارينا دياس پەن جاۋسيۋان يان شىقتى، دەپ حابارلايدى «قازاقپارات» ءتىلشىسى.

زارينا الەمدىك رەيتينگتە 55-، ال قىتايلىق تەننيسشى 412- ساتىدا تۇرعانىنا قاراماستان، ەكەۋى دە ءوز ەلدەرىنىڭ نامىسى ءۇشىن بارىن سالدى. ءبىرىنشى پارتيادا قازاقستاندىق سپورتشى 7:5 ەسەبىمەن باسىم ءتۇستى. 1 ساعات 17 مينۋتقا سوزىلعان ماتچتىڭ ەكىنشى پارتياسىن دا زارينا 6:2 ەسەبىمەن ۇتتى.

قازاقستاننىڭ ءبىرىنشى راكەتكاسى زارينا دياس گونكونگ جانە ءۇندىستان قۇرامالارىمەن كەزدەسۋدى دە ءساتتى باستاپ، قارسىلاستارىن تىزە بۇكتىرگەن ەدى.

بۇگىن ەكىنشى كەزدەسۋدە الەمنىڭ 81- راكەتكاسى يۋليا پۋتينسيەۆا دۇنيەجۇزىلىك رەيتينگتە 125- ورىندا تۇرعان يافان ۆانمەن شەبەرلىك بايقاسادى.

ەسكە سالا كەتەيىك، قازاقستاندىقتار بۇدان بۇرىن گونكونگ ەلىنىڭ وكىلدەرىن 3:0، ءۇندىستاندىقتاردى 2:1 ەسەبىمەن ۇتقان بولاتىن. بۇگىن ولار ا توبىندا قىتايلىقتارمەن ءبىرىنشى ورىن تالاسۋدا. بۇل توپتا جەڭىمپاز اتانعان قۇراما ۆ توبىندا ۇزدىك شىققان كوماندامەن II  الەمدىك ليگانىڭ پلەي-وفف كەزەڭىنە بەرىلەتىن جولدامانى ساراپقا سالادى.