اكىمدىكتەر كۇندەلىكتى جۇمىستارىن «رۋحاني جاڭعىرۋعا» جاتقىزا سالادى - پرەزيدەنت

استانا. قازاقپارات - كەيبىر اكىمدىكتەر كۇندەلىكتى وزدەرىنىڭ جۇمىستارىن «رۋحاني جاڭعىرۋعا» بۇرمالاپ جاتىر. بۇگىن ۇكىمەتتىڭ كەڭەيتىلگەن ماجىلىسىندە ەلباسى نۇرسۇلتان نازاربايەۆ وسىلاي ايتتى، دەپ حابارلايدى قازاقپارات.

«ءبىرقاتار ءوڭىر «رۋحاني جاڭعىرۋعا» قاتىستى جۇمىستارىمەن تىڭعىلىقتى اينالىسۋدا. حالىقتىڭ كوپشىلىگى باعدارلامانى جاقسى قابىلداعانىن بىلەمىز. ال كەيبىر اكىمدىكتەر كۇندەلىكتى وزدەرىنىڭ جۇمىستارىن «رۋحاني جاڭعىرۋ» اياسىندا اتقارىپ جاتىرمىز دەپ جاريالايدى. مىسالى، جىل سايىنعى مەرەكەلىك جارىستاردى، فەستيۆالدەردى، سپورتتىق شارالاردى «رۋحاني جاڭعىرۋعا» جاتقىزا سالادى»، - دەپ توقتالدى پرەزيدەنت.

وسى ورايدا ەلباسى باعدارلاماعا قاتىستى بۇنداي مالىمدەمەلەر تازا بۇرمالاۋ ەكەنىن ءارى «رۋحاني جاڭعىرۋدىڭ» مارتەبەسىنە نۇقسان كەلتىرەتىنىن اتاپ ءوتتى.

 «سوندا ولاردىڭ «رۋحاني جاڭعىرۋ» نە ەكەنىن تۇسىنبەگەنى عوي؟! تۇككە تۇرمايتىن نىسانداردى قاسيەتتى ورىندار دەپ ايتۋدا. وبلىس اۋماعىنان نە بولسا دا نىسان تاپ دەپ ايتقان جوقپىز عوي. بار نارسەنى ايتۋىمىز كەرەك»، - دەدى ن. نازاربايەۆ.

ەلباسى دەگەنمەن ءوزىنىڭ مۇمكىندىكتەرىن ىسكە اسىرماي وتىرعان وبلىستار بار ەكەنىن قاداپ ايتتى. بۇل تۇرعىدا سولتۇستىك قازاقستان، ماڭعىستاۋ، پاۆلودار وبلىستارىندا جۇمىستاردىڭ بەلسەندى جۇرگىزىلۋى كەرەكتىگىن تاپسىردى.

اۆتور: رۋسلان عابباسوۆ