دارىگەرلەر شەتەلگە شىققاندا قانداي ەكپە الۋ كەرەكتىگىن ايتتى

الماتى. قازاقپارات - الماتىدا قالالىق دەنساۋلىق ساقتاۋ باسقارماسى شەتەلدەن جۇقپا جۇقتىرىپ كەلەتىن تۋريستەردى باقىلايتىن شتاب قۇردى، دەپ حابارلايدى قازاقپارات ءتىلشىسى.

 شتابتىڭ بۇگىنگى وتىرىسىندا تۋريستەر اراسىندا اسا قاۋىپتى جۇقپالى اۋرۋلاردىڭ الدىن الۋ بويىنشا ۆەدومستۆوارالىق جەدەل ارەكەت ەتۋ بويىنشا جوسپار قۇرىلدى. جيىنعا قالالىق قوعام دەنساۋلىعىن قورعاۋ دەپارتامەنتىنىڭ، تۋريزم باسقارماسىنىڭ، الماتى اۋەجايىنىڭ مەديتسينالىق قىزمەت ءبولىمىنىڭ، تۋريستىك ورتالىقتىڭ ماماندارى قاتىستى.

باسقارما باسشىسى سەرىكبول مۋسينوۆ قالاداعى ەپيدەميولوگيالىق احۋالدى قاتاڭ باقىلاۋعا الۋ تۋرالى تاپسىرما بەردى.

سانيتارلىق قاداعالاۋ ءبولىمىنىڭ ماماندارى شەتەلگە شىعاتىن تۋريستەرگە الدىن الا ەكپە سالىپ الۋعا كەڭەس بەردى.

 «شەتەلگە شىعاتىن تۋريستەردىڭ مەديتسينالىق ساقتاندىرۋ  پوليسى بولۋى ءتيىس. سونىڭ ارقاسىندا تۋريستەر ءوز دەنساۋلىعىنا قاتىستى توتەنشە وقيعالاردان ساقتانا الادى. قاجەتتى ءدارى- دارمەكتى قازاقستاندا ساتىپ العان ابزال. كەيبىر دارىلەر شەتەلدە ساتىلمايدى. كليماتى ىستىق ەلدەرگە شىقپاس بۇرىن الدىن الا ەكپە قابىلداۋعا كەڭەس بەرەمىز. تروپيكالىق ەلدەرگە شىقپاس بۇرىن - كۇل، سال، سىرەسپە اۋرۋلارىنا قارسى، افريكا (ساحارا شولىنەن وڭتۇستىككە)، لاتىن امەريكاسى ەلىنە شىعاتىن ادامدار - سارى بەزگەككە قارسى، مەككەگە قاجىلىققا اتتاناتىندار - مەنينگوكوك جۇقپاسىنا قارسى، وڭتۇستىك شىعىس ازيا ەلدەرىنە باراتىندار سارى بەزگەك پەن ب گەپاتيتىنە قارسى ەكپە الۋى كەرەك»، - دەدى ماماندار.

 ايتا كەتۋ كەرەك، جىل باسىنان بەرى ءۇندىستاننان دەمالىپ كەلگەن 5 ادام تىرىسقاق اۋرۋىن جۇقتىرىپ كەلگەنىن حابارلاعان بولاتىنبىز. ولاردىڭ بارلىعى جاعاجايدا سۋعا تۇسكەن، تەڭىز ونىمدەرىن شيكى كۇيىنشە جەگەن.

اۆتور: گۇلميرا عوسمانالي