ابزال اجىعاليەۆ: تۋ الىپ شىعۋ - ابىروي بولعانىمەن اۋىر مىندەت جۇكتەيدى
- ابزال، وليمپياداعا دايىندىعىڭىز تۋرالى ايتىپ بەرسەڭىز...
- دايىندىعىم وتە جاقسى. اقپاننىڭ ءبىرى كۇنى كورەياعا كەلدىك. سودان بەرى سوڭعى جاتتىعۋىمىزدى پىسىقتادىق. وسىعان دەيىن نورۆەگيا ەلىندە جاتتىققان بولاتىنبىز. مىنە، ءبىر اپتا بولدى، وليمپيادادا سىنعا تۇسەتىن مۇز الاڭدا جاتتىعىپ جاتىرمىز. جارىستا ويداعىداي ناتيجەگە قول جەتكىزەمىز دەپ پايىمداپ وتىرمىن.
- جارىس وتەتىن مۇز ايدىنىنا كوڭىلدەرىڭىز تولدى ما؟
- ءيا، وتە جاقسى توسەلىپتى. ءبىزدىڭ كوڭىلىمىزدەن شىقتى. كورەيا - شورت- ترەككە قاتتى كوڭىل بولەتىن ەل. سوندىقتان، مۇز الاڭى دا وتە ساپالى.
- شورت- ترەك جارىسىندا ەڭ باستىسى جىلدامدىق ماڭىزدى الدە وزگە دە نازار اۋداراتىن جاقتارى بار ما؟
- شورت- ترەكتە تەك قانا جىلدامدىق قانا ماڭىزدى ەمەس، جارىستا ۇلكەن كۇش، لوگيكا كەرەك. باستى دا جاقسى جۇمىس ىستەتۋگە ءتيىسپىز. قارسىلاسىڭنان قالاي وزۋ كەرەك، كۇشتى قالاي ساقتاپ، سوڭعى مەجەگە قالاي جەتكىزۋ كەرەكتىگىن ءتيىمدى ەسەپتەي بىلگەن دۇرىس.
- باستى قارسىلاستارىڭىز كىم؟
- قارسىلاستارىمىز دەپ ءبىرىنشى وسى وليمپيدانى وتكىزىپ جاتقان كورەيانى اتاۋعا بولادى. كورەيالىقتار ءوز ەلىندە، جەرگىلىكتى جانكۇيەرلەرىنىڭ الدىندا نامىستى قولدان بەرگىسى كەلمەي بار كۇش- جىگەرىن سالاتىنى انىق. ودان كەيىن، كانادا، قىتاي، گوللانديا، جاپونيا سپورتشىلارىن اتاۋعا بولادى. ءبىز ەستافەتا جارىسىندا جەرەبە بويىنشا كانادا، قىتاي، گوللانديا سپورتشىلارىمەن ءبىر توپتا سىنعا تۇسەمىز.
- وسى اق وليمپيادانىڭ سالتاناتتى اشىلۋ راسىمىندە كوك بايراعىمىزدى كوتەرىپ شىعاسىز. تاڭداۋ نەلىكتەن سىزگە تۇسكەنىن ايتىپ بەرسەڭىز...
- تاڭداۋ نەگە ماعان تۇسكەنىن ءوزىم دە جاقسى بىلمەيمىن. مۇمكىن، وسىعان دەيىنگى الەم كۋبوكتارىندا جاقسى ناتيجەلەر كورسەتكەنىم ءۇشىن ءۇمىت ارتىلعان بولار.
- سوندا سىزگە الدىن الا ەسكەرتكەن جوق پا؟
- مەن شەتەلدە جاتتىعۋدا جۇرگەنمىن. ءبىر كۇنى قازاقستان ۇلتتىق وليمپيادالىق كوميتەتى تەلەفون ارقىلى حابارلاسىپ، «سەنى قۇتتىقتايمىز» دەدى. نە ءۇشىن دەپ سۇراپ جاتىرمىن. «سەن وليمپيادانىڭ اشىلۋ سالتاناتىندا تۋىمىزدى كوتەرىپ شىعاتىن بولدىڭ» دەدى. مەن العاشىندا تۇسىنبەي قالدىم. «نەگە مەن، نەگە مەن» دەپ تاڭعالدىم. ولار ءبىر كۇلىپ الدى دا، ءبىز ساعان تۋدى سەنىپ تاپسىرىپ جاتىرمىز. جۇلدەلى بولاسىڭ. ساعان ساتتىلىك تىلەيمىز»، - دەدى.
- بىردەن كەلىستىڭىز بە؟
- جاي «نەگە مەن، باسقا بىرەۋ الىپ شىقسا بولماي ما» دەپ سۇرادىم. ولار: «ءبىز سەنى تاڭدادىق. باستىق قول قويىپ تاستادى»، - دەپ جاۋاپ بەردى.
- سوسىن بىردەن كەلىستىڭىز...
- ءيا، كەلىسىمىمدى بەردىم. باسقا امالىم قالعان جوق.
- سول كەزدە قانداي كۇيدە بولدىڭىز؟
- مەن بىردەن بۇل جاڭالىعىمدى بىردەن اتا- اناما ايتتىم. «شىن با بالام، كەرەمەت بولدى عوي وندا» دەپ ولار قاتتى قۋاندى. ءبىراق، مەن سول ساتتە وزىمە ۇلكەن جاۋاپكەرشىلىك ارتىلعانىن سەزىندىم. تۋ كوتەرىپ شىعۋ - ۇلكەن ابىروي بولعانىمەن كەرىسىنشە ۇلكەن جاۋاپكەرشىلىك جۇكتەيدى. سول ءۇشىن شىعار، وسى اڭگىمەدەن كەيىن وزىمە ۇلكەن مىندەت ارتىلعانىن ىشتەي سەزىنىپ، اركەز ەسىمدە ۇستاپ ءجۇرمىن.
- وليمپيادادا مەدال الىپ، كوتەرىپ شىققان تۋىڭىزدى جەلبىرەتىپ ەلگە ورالۋعا نيەتتەسپىز...
- راحمەت! ايتقانىڭىز كەلسىن. ەل قورجىنىنا مەدال سالۋ ءار سپورتشىنىڭ ارمانى. سول ءۇشىن بار كۇشىمىزدى سالامىز.
- سۇحباتىڭىزعا راحمەت!
اۆتور: كۇنسۇلتان وتارباي
