قازاقستان تەلەارناسىنىڭ العاشقى باسشىسىنا ەسكەرتكىش تاقتا ورناتىلدى
حامزا ءابىلعازيننىڭ ەسىمى وتاندىق تەلەارنا تاريحىمەن تىكەلەي بايلانىستى. ونى ەسكە الۋشىلار بىلىكتى باسشى تۋرالى شەجىرەنى 1950 -جىلداردىڭ اياعىنداعى الماتى تەلەستۋدياسىنىڭ تاريحىنان باستايدى. بۇگىنگى «قازاقستان» تەلەارناسىنىڭ ىرگەتاسى بولعان الماتى تەلەستۋدياسى 1958 -جىلى اشىلىپ، وعان مادەنيەت سالاسىنىڭ بىلىكتى مامانى حامزا ءابىلعازين باسشى بولىپ بەكىتىلەدى.
«اكەم تەلەستۋدياعا باسشى بولىپ بەكىتىلگەندە ەسىمدە ۇيدە كىشكەنتاي تەلەديدار بولدى. جۇمىستان كەلگەن سوڭ دا سونى قوسىپ قويىپ، باعدارلامالاردى قاداعالاپ وتىرادى. تەلەفون سوعىپ، ەسكەرتۋلەر جاساپ جاتادى. شاعىن پاتەردە تۇرامىز، ۇيدە باياناۋىلدان كەلىپ جاتقان اعايىن- تۋىستان بولەك كورشىلەر دە كەلىپ، سول تەلەديداردىڭ الدىنا ۇيمەلەيتىن. سودان كەيىن اكەم ۇيدەگى تەلەديداردان جۇمىسىن قاداعالاي المايتىن بولعاندىقتان، ءوزى تۇنگە دەيىن جۇمىستا قالاتىن بولدى»، - دەپ ەسكە الادى ونىڭ ۇلى باحىت ءابىلعازين.
ەسكەرتكىش تاقتانىڭ اشىلۋىندا ءسوز العان «QAZAQSTAN» ۇلتتىق ارناسىنىڭ پروديۋسەرى جاڭىل مامەجان قىزى تەلەارنانىڭ 60 جىلدىق مەرەيتويى قارساڭىندا ارنايى ۇيىمداستىرىلىپ وتىرعانىن ايتتى.
«ۇلتتىق ارنا العاشقىندا الماتى ستۋدياسى دەپ اتالدى. 1 ايدان كەيىن تەلەارنامىز ءوزىنىڭ 60 جىلدىعىن اتاپ وتەدى. العاشقى ءىس- شارا باستالىپ تا كەتتى. بۇگىن مىنە، حامزا ءابىلعازين اعامىزعا ەسكەرتكىش تاقتا اشىلىپ جاتىر. حامزا اعا - ۇلتتىق ارنانىڭ العاشقى ديرەكتورى. العاشقى ديرەكتورىمىزعا كورسەتىلىپ جاتقان قۇرمەت سول كەزدە جۇمىس ىستەگەن قاناپيا مۇستافين اعامىزعا، سوۆەت مازعۇتوۆ، ديكتورلار لەيلا وماروۆا. ز. جانە زۋلحيا جۇماتوۆالارعا كورسەتىلگەن ءىلتيپات دەپ بىلەمىز»، - دەدى ول.
جيىندا ءسوز العان حامزا ءابىلعازيننىڭ ۇلى باقىت اكەسىنىڭ «قازاقفيلم» كينوستۋدياسىندا دا قىزمەت اتقارعانىن، وندا ساپالى100-دەگەن فيلمدى قازاقشا سويلەتكەنىن ايتتى.
«الماتى تەلەستۋدياسىن باسقارعاننان كەيىن ونى «قازاق فيلمنىڭ» ءبىرىنشى ورىنباسارى ەتىپ جىبەردى. مىندەتى - دۋبلياجدى جولعا قويۋ. اكەمنىڭ جەتەكشىلىگىمەن 100-دەن استام فيلم قازاق تىلىندە سويلەدى. ول كىسى الماتى تەلەستۋدياسىندا باسشى بولىپ تۇرعانىندا ديكتورلىققا ز. جۇماتوۆا مەن ل. وماروۆانى بەكىتىپ، ەكەۋىن ماسكەۋدە يۋري ليەۆيتاننىڭ كۋرسىنا جىبەرگەنىن ايتا كەتۋ كەرەك. سول ساپاردا وداقتان كەلگەن جۋرناليستەر اراسىندا ەكەۋى دە ۇزدىك ديكتور اتاندى. ول ماعان: «ءومىردى ارتىڭنان بىردە ءبىر ادام جامان ءسوز ايتا المايتىنداي قىلىپ ءسۇرۋ كەرەك» دەپ وسيەت ايتتى. ءوزى سولاي ىستەدى دە، ارى تازا بولىپ كەتتى»، - دەپ ەسكە الدى.
حامزا ءابىلعازين 1919 -جىلى پاۆلودار وبلىسى باياناۋىل اۋىلىندا دۇنيەگە كەلگەن. قوعام قايراتكەرى، قازاق ك س ر- ءنىڭ ەڭبەك سىڭىرگەن مادەنيەت قىزمەتكەرى. 1939 -جىلى ۇلى وتان سوعىسىنا 20 جاسىندا اتتانىپ، 1946 -جىلى مايداننان ورالعان. ءار جىلدارى مينيسترلەر كەڭەسىنىڭ مادەنيەت سالاسىندا قىزمەتتەر اتقارعان. الماتى تەلەستۋدياسىندا 1958-1962 -جىلدارى ديرەكتور بولسا، 1962-64 «قازاق فيلم» كينوستۋدياسىندا ديرەكتوردىڭ ورىنباسارى، 1954-1972-جىلدارى قازاق ك س ر مينيسترلەر كەڭەسىنىڭ راديوحابارلار جانە تەلەديدار باسقارماسىنىڭ باسشىسى بولدى. 1972 -جىلدان ءومىرىنىڭ سوڭىنا دەيىن قازاق ك س ر جوعارعى كەڭەسىنىڭ ءتورالقا ىستەر باسقارماسىنىڭ باسشىسى قىزمەتىن اتقاردى. 1980 - جىلى 61 جاسىندا دۇنيەدەن وزدى.
اۆتور: الماس مۇقاش ۇلى
