شىمكەنتتە قوعامدىق اۆتوبۋستىڭ ورىندىقتارى جۇمساق ديۆانعا اۋىستىرىلدى

شىمكەنت. قازاقپارات - شىمكەنتتە ورىندىقتارى جۇمساق ديۆانعا اۋىستىرىلعان قوعامدىق اۆتوبۋس قاتىناي باستادى، دەپ حابارلايدى «قازاقپارات» ح ا ا ءتىلشىسى.

ەندى جولاۋشىلار №60 ا باعىتىندا جۇرەتىن قالالىق اۆتوبۋستا ارقانى كەڭگە سالىپ، بارار جەرىنە جۇمساق ءارى جايلى ديۆانعا وتىرىپ جەتەدى.

فەيسبۋكتى پايدالانۋشىلاردىڭ ءبىرى جەلىگە ەرەكشە اۆتوبۋستىڭ سۋرەتىن ورنالاستىردى. قالا تۇرعىندارى تاڭدانىستارىمەن قاتار، العىستارىن دا ايتىپ، جازۋدا.

ال شىمكەنت قالاسىنىڭ اكىمدىگى جاڭاشا ۇلگىدە ءبىر عانا اۆتوبۋس جابدىقتالعانىن ايتتى. باسقا قوعامدىق كولىكتەردىڭ ورىندىقتارىن جايلى جيھازدارعا الماستىرۋ كوزدەلمەگەن.

«مۇنداي اۆتوبۋستىڭ سانى بىرەۋ عانا. الداعى ۋاقىتتا باسقا اۆتوبۋستاردا مۇنداي بولمايدى. جاڭادان كەلەتىن اۆتوبۋستاردى دا جاڭا جيھازبەن جابدىقتاۋ جوسپارلانىپ وتىرعان جوق»، - دەدى قالا اكىمىنىڭ باسپا ءسوز حاتشىسى ايگەرىم جۇماعۇلوۆا.

ەسكە سالايىق، جۋىردا عانا شاھارعا جاڭادان 70 اۆتوبۋس جەتكىزىلىپ، تاعى 30 قوعامدىق كولىك اكەلىنەتىنى تۋرالى حابارلانعان ەدى.