مامانداردىڭ جالاقىسى كوتەرىلسە، جەمقورلىق ازايادى - بەكشين
بۇل تۋرالى قوعامدىق دەنساۋلىق ساقتاۋ كوميتەتىنىڭ ءتوراعاسى جانداربەك بەكشين ايتتى، دەپ حابارلايدى «قازاقپارات» ح ا ا ءتىلشىسى.
بۇگىن استانادا وتكەن مەملەكەتتىك قىزمەتشىلەردىڭ ادەپتىلىك نورمالارىن جانە مىنەز-قۇلىق قاعيدالارىن ساقتاۋ ماسەلەلەرى تالقىلانعان جيىن ءوتتى.
وندا ءسوز سويلەگەن جانداربەك بەكشين جەمقورلىققا قارسى كۇرەس ماسەلەسىن تاقىلاي وتىرىپ، وزىنە قاراستى كوميتەت ماماندارىنىڭ الەۋمەتتىك- تۇرمىستىق جاعدايى تۋرالى ءسوز قوزعاماي كەتۋگە بولمايتىنىن اتاپ ءوتتى.
«ءبىزدىڭ سالادا كوبىنەسە بۇزۋشىلىقتار اۋدانداردا تىركەلىپ جاتادى. بۇعان ەڭ الدىمەن ايلىقتىڭ تومەن بولۋى سەبەپ بولىپ وتىر. اۋدانداردا ولار ورتاشا ەسەپپەن 65 مىڭ تەڭگە ايلىق الادى. ءتىپتى جاس مامانداردىڭ ايلىعى بۇدان دا از. اۋىلعا ديپلوممەن كەلەتىن ماماندارعا كوتەرمە اقى بەرۋ ماسەلەسى دە شەشىمىن تاپقان جوق. «ديپلوممەن اۋىلعا» باعدارلاماسىمەن ءبىزدىڭ ماماندار قامتىلماي قالدى»، - دەيدى جانداربەك بەكشين.
كوميتەت ءتوراعاسىنىڭ ايتۋىنشا، قوعامدىق دەنساۋلىق ساقتاۋ كوميتەتىنىڭ قىزمەتشىلەرى اۋداندىق دەڭگەيگە دەيىن جۇمىس جۇرگىزەدى.
«ءبىزدىڭ بالالاردى بالاباقشاعا ورنالاستىرۋ ماسەلەسى دە وزەكتى. بۇل ماسەلە دە شەشىمىن تاپقان جوق. تاعى ايتارىم بۇگىنگى كۇنى باسپانا بەرۋ ماسەلەسى دە وزەكتى كۇيىندە قالىپ وتىر. سوڭعى 10 جىلدا ءبىزدىڭ مەملەكەتتىك قىزمەتشىلەر ايماقتىق دەڭگەيدە، ناقتىراق ايتقاندا اۋدانداردا بىردە-ءبىر باسپانا العان جوق. وسىعان بايلانىستى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنەن «ب» كورپۋسىنداعى مەملەكەتتىك قىزمەتشىلەر ءۇشىن قوسىمشا ارنايى قۇقىقتىق كەپىلدەندىرۋ ەنگىزۋدى سۇرايمىز. اۋىلدىق دەڭگەيگە دەيىن وسى ماسەلە نازارعا الىنسا، جەمقورلىققا بارۋ تاۋەكەلدىلىگى ازايار ەدى»، - دەيدى بەكشين.
