زاڭنىڭ سياسى كەپپەي جاتىپ، وزگەرىس ەنگىزگەن دۇرىس ەمەس - دەپۋتات

استانا. قازاقپارات - ق ر پارلامەنت ءماجىلىسىنىڭ دەپۋتاتى سۆەتلانا بىچكوۆا زاڭ شىعارۋ جۇمىسىنىڭ باستى كەمىشىلىكتەرىن اتادى، دەپ حابارلايدى قازاقپارات ءتىلشىسى.

«قازىرگى رەفورمالارعا بايلانىستى ءبىز وتاندىق زاڭنامانى ۇنەمى وزگەرتىپ وتىرامىز. ارينە، وزگەرىستەر مەن تولىقتىرۋلاردى ەنگىزگەن دۇرىس. ءبىراق زاڭداردىڭ كوپتىگى قۇقىقتىق قارىم- قاتىناستاردى رەتتەپ، زاڭ ۇستەمدىگىن قامتاماسىز ەتىپ وتىر دەپ ايتا المايمىز. وكىنىشكە قاراي، وسى سالادا جۇيەلى جۇمىس جۇرگىزىلمەيدى. ءالى كۇنگە دەيىن تەرەڭ تالداۋ جاسالمايدى، قوعامدىق پىكىر ەسكەرىلمەيدى، سوڭعى شەشىمدەردىڭ زاردابىنا كاسىبي تۇرعىدا باعا بەرىلمەيدى. وسىدان كەيىن باسىمىزدى تاۋعا دا، تاسقا دا سوعىپ جاتامىز»، - دەدى س. بىچكوۆا ق ر ادىلەت مينيسترلىگىنىڭ كەڭەيتىلگەن القا ماجىلىسىندە.

دەپۋتاتتىڭ ايتۋىنشا، زاڭ شىعارۋ جۇمىسىن تىم بەلسەندى جۇرگىزۋدى قويۋ قاجەت. سەبەبى نورماتيۆتىك اكتىلەر اراسىنداعى قاراما- قايشىلىقتار كوبەيىپ كەلەدى. ال وزەكتى ماسەلەلەردى شەشۋ شارالارى كەيىنگە قالىپ جاتادى.

«اشىعىن ايتۋ كەرەك، ءبىز سياسى كەپپەگەن زاڭدارعا قايتا وزگەرىس ەنگىزگەنىمىزگە تالاي رەت كۋا بولدىق. جاڭا زاڭعا قانشاما وزگەرىستەر مەن تولىقتىرۋلاردى ەنگىزدىك. ءبىز وسى «اۋرۋدان» ءالى ايىعا الماي كەلەمىز. ال وزگەرىستەر نەگە ەنگىزىلەدى؟ سەبەبى باس كەزىندە زاڭنىڭ ءوزى اسىعىس قابىلداندى. سوسىن سىبايلاس جەمقورلىققا قارسى ساراپتامانى الىپ تاستاعانى دۇرىس ەمەس. اتالعان شارا ءبىرقاتار حالىقارالىق كەلىسىمشارتتاردا كورسەتىلگەن»، - دەپ اتاپ كورسەتتى س. بىچكوۆا.