ەلوردادا كوپبالالى انالاردىڭ تەگىن ءجۇرۋ قۇقىعى ساقتالادى

استانا. قازاقپارات - استانا قالاسىندا كوپبالالى انالاردىڭ تەگىن ءجۇرۋ قۇقىعى ساقتالادى، دەپ حابارلايدى قازاقپارات سىلتەمە ەلوردا ينفوعا سىلتەمە جاساپ.

بيىل ەلىمىزدە اتاۋلى الەۋمەتتىك كومەكتىڭ جاڭا فورماتى قولدانىسقا ەنگىزىلدى. وعان سايكەس كوپبالالى وتباسىلارعا بەرىلەتىن ارناۋلى مەملەكەتتىك جاردەماقى، 18 جاسقا دەيىنگى بالالارعا ارنالعان مەملەكەتتىك جاردەماقى مەن مەملەكەتتىك اتاۋلى الەۋمەتتىك كومەك ءبىرىڭعاي جاردەماقىعا بىرىكتىرىلدى.

وسىعان بايلانىستى قالالىق ءماسليحاتتىڭ شەشىمىمەن بەكىتىلگەن استاناداعى جەكەلەگەن ساناتتارعا جاتاتىن ازاماتتاردى قالادا قاتىنايتىن جولاۋشىلار كولىگىندە جولاقىدان بوساتۋدى رەتتەيتىن الەۋمەتتىك كومەك كورسەتۋ تارتىبىنە وزگەرىستەر ەنگىزۋ قاجەتتىلىگى تۋىنداعان.

بۇعان قوسا، بۇل ىسكە تىكەلەي جاۋاپتى جۇمىسپەن قامتۋ، ەڭبەك جانە الەۋمەتتىك قورعاۋ باسقارماسىنىڭ اتاۋى جۇمىسپەن قامتۋ جانە الەۋمەتتىك قورعاۋ باسقارماسى بولىپ وزگەردى. اتالمىش باسقارما باسشىسىنىڭ ورىنباسارى ارتەم ءابىلدينوۆ قالالىق قوعامدىق كەڭەس وتىرىسىندا ءتيىستى وزگەرىستەرمەن تانىستىردى.

«استانا قالالىق ءماسليحاتىنىڭ الەۋمەتتىك- مادەني دامۋ جونىندەگى تۇراقتى كوميسسيانىڭ قاۋلىسىنا سايكەس ءبىزدىڭ باسقارماعا مۇمكىندىگى شەكتەۋلى بالالاردى الىپ جۇرەتىن ادامدارعا قوعامدىق كولىكتە جەڭىلدىكپەن جۇرۋگە مۇمكىندىك جاساۋ ماسەلەسىن زەرتتەۋ ۇسىنىلدى. وسىعان وراي، سونىڭ ىشىندە مۇگەدەك بالانىڭ اكەسىنە نەمەسە اناسىنا (قامقورشىسىنا) تەگىن ءجۇرۋ قۇقىعىن بەرۋ ۇسىنىلادى»، - دەدى بايانداماشى.

ونىڭ ايتۋىنشا، قالالىق باعدارلاردا كوپبالالى انالاردىڭ تەگىن ءجۇرۋ قۇقىعى ساقتالادى. ول ءۇشىن بيۋدجەتتەن قوسىمشا قارجى ءبولۋدىڭ قاجەتى جوق. وتەماقى رەتىندە ءبولىنىپ وتىرعان 1,3 ميلليارد تەڭگە تولىعىمەن جەتەدى. قوعامدىق كەڭەس مۇشەلەرى بۇل ۇسىنىستى ءبىراۋىزدان قولدادى.

ءبىلىم باسقارماسىنىڭ باسشىسى ءانۋار جانعوزيننىڭ سوزىنشە، اتالمىش باسقارماعا اتا- انالاردان بالاباقشاعا باراتىن بالالارعا اقىلى نەگىزدە قوسىمشا قىزمەتتەر ۇسىنۋ تۋرالى تىلەك تۇسكەن.

«ءبىز اتا-انالارمەن بىرنەشە رەت كەزدەسۋ وتكىزدىك. ناقتى قانداي قىزمەتتەر قاجەت، باعاسى قانداي بولۋى كەرەك، سونىڭ ءبارىن ەسەپتەپ شىعاردىق. قورىتىندىسىندا ءتيىستى جوبانى ازىرلەدىك. بۇل جوباعا تەگىن كورسەتىلەتىن قىزمەتتەردىڭ ستاندارتىنا كىرمەيتىن قوسىمشا اقىلى قىزمەتتەر ەنگىزىلدى. قازىر كوپ بالا جەكەمەنشىك ورتالىقتارعا بارۋعا ءماجبۇر. اتا-انالارعا بۇل ءتيىمدى بولا بەرمەيدى. ءبىز مەكتەپالدى مەكەمەلەردىڭ بازاسىندا قوسىمشا اقىلى قىزمەتتەردى ۇسىنۋدى باستاماقسىز. ولاردىڭ باعاسى دا قولجەتىمدى بولادى. بۇل جوبا بالاباقشالارعا دا پايدا اكەلەدى. سول ارقىلى قوسىمشا قارجى ءتۇسىپ، بالاباقشا قىزمەتكەرلەرىنە، تاربيەشىلەرگە جالاقىنى وسىرۋگە مۇمكىندىك تۋادى»، - دەدى باسقارما باسشىسى.