قىتاي ۇلتتىق كىتاپحاناسى قازاقستان تۋرالى جاڭا كىتاپتارمەن تولىقتى

بەيجىڭ. قازاقپارات - بۇگىن «رۋحاني جاڭعىرۋ» باعدارلاماسىن جۇزەگە اسىرۋ اياسىندا قازاقستان رەسپۋبليكاسىنىڭ قحر- داعى ەلشىسى شاحرات نۇرىشيەۆ قىتاي ۇلتتىق كىتاپحاناسىنا قازاقستان تۋرالى كىتاپتاردى تابىس ەتتى،

دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.

كىتاپحانا قورىنا قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ بىلتىر قىتاي تىلىندە جارىق كورگەن تاڭدامالى ەڭبەكتەرى جيناعى، اعىلشىن جازۋشىسى ءارى ساياساتكەرى دجوناتان ايتكەننىڭ «نۇرسۇلتان نازاربايەۆ جانە قازاقستاننىڭ قۇرىلۋى» كىتابى، «سۇلۋ قازاقستان - سۇلۋ قىتاي» فوتوالبومى، قازاق، ورىس جانە اعىلشىن تىلدەرىندەگى باسقا دا كىتاپتار تابىستالدى.

قىتاي ۇلتتىق كىتاپحاناسىنىڭ ديرەكتورى حان يۋنتسزينمەن اڭگىمەدەن كەيىن ەلشى ش. نۇرىشيەۆ 2016 -جىلعى جەلتوقساندا اشىلعان قازاق ادەبيەتى بۇرىشىن بارىپ كوردى.

«بۇگىن ءبىز قازاقستان جايىنداعى كىتاپتار تۇرعان شەتەل ادەبيەتى زالىن كورىپ، بىلتىر ەلىمىز جايلى قىتايشا جارىق كورگەن كىتاپتاردى تابىستادىق. نەگىزگى ماقسات - قىتايدىڭ قاراپايىم ازاماتتارى وسى كىتاپتار ارقىلى ەلىمىزبەن تانىسۋىنا، ونىڭ تاريحى، ادەبيەتى، مادەنيەتى، قازىرگى جەتىستىكتەرى تۋرالى بىلۋىنە جاعداي جاساۋ، وسى ارقىلى ەكى ەل اراسىنداعى جان- جاقتى ستراتەگيالىق ارىپتەستىك قاتىناستارىن جاڭا دەڭگەيگە كوتەرۋ»، - دەدى ش. نۇرىشيەۆ قازاقپارات تىلشىسىنە.

كىتاپحانانىڭ شەتەل ادەبيەتى ءبولىمىنىڭ قىزمەتكەرى ليۋ مەي (Liu Mei) بۇگىنگى تاڭدا قازاق ادەبيەتى سەكسياسىندا كىتاپتار مول ەكەنىن ايتتى.

«ءبىزدىڭ بولىمىمىزدە رەسەي، جاپونيا، مالايزيا، تاعى باسقا ەلدەرگە ارنالعان كىتاپ بۇرىشتارى بار. ءبىراق قازاق ادەبيەتى سەكسياسىندا كىتاپتار الۋان ءتۇرلى ءارى باسقالارعا قاراعاندا كوبىرەك. مۇندا كەلۋشىلەر قازاقستان جايىنداعى فوتوالبومدار مەن كىتاپتار تولى سورەلەردى كورىپ تامسانادى»، - دەيدى ول.

كىتاپحانا قىتايشا كىتاپتاردى ەڭ كوپ جيناقتاعان ءارى شەت تىلدەرىندە جازىلعان كىتاپتاردىڭ قىتايداعى ەڭ ۇلكەن قورى دا وسىندا. ول الەمدەگى ەڭ ءىرى كىتاپحانالاردىڭ ۇزدىك ۇشتىگىنە كىرەدى، ال وقىرماندار سانى بويىنشا كوش باسىندا تۇر.