بيىل اقتاۋ پورتىنان تۇركياعا جۇك تاسىمالى ءۇش ەسە ارتادى

استانا. قازاقپارات - قازاقستان ساۋدا كەمەلەرىن شابۋىلدان قورعاۋ ءۇشىن قاجەتتى قادامداردى ايقىندادى، دەپ حابارلايدى قازاقپارات.

بۇگىن پارلامەنت ءماجىلىسىنىڭ جالپى وتىرىسىندا «تەڭىز كەمە قاتىناسى قاۋىپسىزدىگىنە قارسى باعىتتالعان زاڭسىز ءىس- ارەكەتتەرمەن كۇرەس تۋرالى كونۆەنسياعا 2005 -جىلعى حاتتامانى راتيفيكاتسيالاۋ تۋرالى» زاڭ جوباسى ماقۇلداندى.

«حاتتاما لاڭكەستىك دەپ تانىلاتىن ارەكەتتەردىڭ ءتىزىمىن كەڭەيتەدى. كەمەلەرگە شابۋىل جاسالعان جاعدايدا جەدەل ارەكەت ەتۋ مەن كومەك كورسەتۋ تەتىكتەرىن انىقتايدى. بۇگىندە 40-تان استام مەملەكەت قۇجاتتىڭ قاتىسۋشىسى بولىپ وتىر ءارى ولاردىڭ ىشىندە قارا تەڭىز بەن بالتىق تەڭىزى ماڭىنداعى بارلىق مەملەكەت بار. قازىر قازاقستاننىڭ ساۋدا كەمەلەرى اشىق تەڭىزدەرگە، سول تەڭىزدەردىڭ پورتتارىنا دەيىنگى باعىتتاردى بەلسەندى تۇردە يگەرە باستادى. وتكەن جىلى اقتاۋ پورتىنان تۇركياعا 35 مىڭ توننا باستى جۇكتەر تاسىمالداندى. بيىل بۇل تاسىمالدىڭ كولەمىن ءۇش ەسەگە ارتتىرامىز دەپ جوسپارلاپ وتىرمىز»، - دەدى ينۆەستيتسيالار جانە دامۋ ءمينيسترى جەڭىس قاسىمبەك.

ونىڭ سوزىنە قاراعاندا، رەسەيدىڭ ىشكى سۋ جولدارىندا قازاقستان كەمەلەر ءۇشىن جەڭىلدەتىلگەن ترانزيتتىك ءتارتىبىن ەنگىزۋ رف- پەن ە ا ە و اياسىندا قول جەتكىزىلدى. وسى ورايدا ءتيىستى كەلىسىم بار جانە بۇل باعىتتا تاسىمالداۋ كولەمىن ارتتىرۋعا ىقپال ەتەدى.

«حاتتامانى راتيفيكاتسيالاۋ اشىق تەڭىزدە جۇزەتىن وتاندىق كەمەلەردىڭ قاۋىپسىزدىگىن قامتاماسىز ەتۋدىڭ قۇقىقتىق كەپىلدىكتەرىن كۇشەيتۋگە ىقپال ەتەدى. سونىمەن قاتار، قۇجاتتى ماقۇلداۋ بيۋدجەتتەن قوسىمشا قارجى ءبولۋدى تالاپ ەتپەيدى»، - دەپ ءتۇسىندىردى مينيستر.

اۆتور: رۋسلان عابباسوۆ