جاپونيانىڭ بولاشاق يمپەراتورى قازاقستاننىڭ ەكونوميكالىق ساياساتىنا باعا بەردى

بەيجىڭ- توكيو. قازاقپارات - بۇگىن جاپونيا يمپەراتور سارايىنىڭ حاتتاماسىنا سايكەس، جاپونيانىڭ تاق مۇراگەرى نارۋحيتو ق ر توتەنشە جانە وكىلەتتى ەلشىسى ەرلان باۋداربەك- قوجاتايەۆتى قابىلدادى، دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.

اڭگىمە بارىسىندا حانزادا نارۋحيتو 1994 -جىلدىڭ ساۋىرىندە جاپونياعا رەسمي ساپارى كەزىندەگى قازاقستان پرەزيدەنتى نۇرسۇلتان نازاربايەۆپەن كەزدەسۋىن ەسكە الدى. بولاشاق يمپەراتور قازاقستان پرەزيدەنتىنىڭ 2016 -جىلعى جاپونياعا رەسمي ساپارىنىڭ قورىتىندىلارىن جوعارى باعالادى. سول ساپار بارىسىندا مەملەكەت باسشىسى جاپونيا پارلامەنتىندە ءسوز سويلەپ، حيروسيما قالاسىنا بارعان بولاتىن.

 ەلشى ەرلان باۋداربەك- قوجاتايەۆ حانزادانى پرەزيدەنت ن. نازاربايەۆتىڭ «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنىڭ نەگىزگى تۇستارىمەن تانىستىردى. نارۋحيتو قازاقستاننىڭ ەكونوميكانى ءارتاراپتاندىرۋعا جانە شيكىزاتقا تاۋەلدىلىكتەن ارىلۋعا باعىتتالعان ساياساتىنىڭ كورەگەندىگىن اتاپ ءوتتى.

 جاپون حانزاداسى ەكى ەلدىڭ ۇلى جىبەك جولى ارقىلى جاساعان تاريحي قاتىناستارى جانە ورال- التاي تىلدەرى توبىنداعى قازاق جانە جاپون تىلدەرىنىڭ بايلانىسى جايلى پىكىرىن ءبولىستى.

قازاقستاندىق ديپلومات بىلتىر استانادا وتكەن «ەكسپو-2017» حالىقارالىق كورمەسىنىڭ قورىتىندىلارى، قازاقستاننىڭ ءبىلىم، مادەنيەت جانە سپورت سالالارىنداعى جەتىستىكتەرى جايلى اڭگىمەلەدى. حانزادا نارۋحيتو استانانىڭ 20 جىلداعى دامۋ قارقىنىنا، نازاربايەۆ ۋنيۆەرسيتەتىنىڭ قىزمەتىنە اسا قىزىعىپ وتىرعانىن ايتتى.

ەسكە سالا كەتەيىك، تاق مۇراگەرى نارۋحيتو 2019 -جىلعى 1 - مامىردان باستاپ جاپونيا يمپەراتورى بولادى. قازىرگى يمپەراتور اكيحيتونىڭ تاقتان باس تارتۋ ءراسىمىن 2019 -جىلدىڭ 30 - ساۋىرىندە وتكىزۋ جوسپارلانعان. جاپونيادا يمپەراتور 200 جىلدان بەرى العاش رەت ءوز ەركىمەن تاقتان باس تارتقالى وتىر، بۇعان دەيىن 1817 -جىلى يمپەراتور كوكاكۋ بيلىكتى ءوز قالاۋىمەن ۇلىنا تاپسىرعان بولاتىن.