تۋىمىز كوتەرىلگەندە كوڭىلىم تولقىدى - اياۋلىم امرەنوۆا، فريستايل موگۋلشى
سولاردىڭ ءبىرى - فريستايل موگۋلدان ەل نامىسىن قورعايتىن وليمپياداعا تۇڭعىش رەت قاتىسىپ وتىرعان قاراكوز قارىنداسىمىز اياۋلىم امرەنوۆا كوك تۋىمىزدى كوتەرىلگەن ساتتەگى كوڭىل- كۇيىن ايتىپ بەردى.
- وسىنداي بايراعىمىز جەلبىرەگەن ءساتتى كورگەندە كوڭىلىم تولقىپ كەتەتىنى بار. بۇگىن ەرەكشە تولقىپ تۇرمىن. سەبەبى، قازاقتىڭ تۋى بۇكىل الەم كوز تىككەن وليمپيادا قالاشىعىندا جەلبىرەدى. بۇل قازاق ەلى ءۇشىن ۇلكەن ابىروي ەمەس پە؟!
- كوك تۋىمىز ءار كەز ءسىزدى جىگەرلەندىرىپ، رۋحىڭىزدى كوتەرىپ جىبەرەتىن بولدى عوي...
- ارينە، ءوز ەلىمىز، جەرىمىز، كوك تۋىمىز جەكە ءانۇرانىمىز بار. وسىنداي ەلدە تۋىپ وسكەن بىزدە ارمان جوق. ەندى، تەك جاقسى ناتيجە كورسەتىپ، بۇگىن كوتەرىلگەن تۋىمىزدى ارمەن قاراي جەلبىرەتىپ جاتساق، نۇر ۇستىنە نۇر بولار ەدى.
- وليمپياداعا دايىندىعىڭىز قالاي؟
- بارىنشا جەڭىسكە جەتۋگە تىرىسىپ كورەمىن. بيىل ءبىرىنشى رەت ءتورتجىلدىق دودادا ونەر كورسەتكەلى وتىرمىن. سوندىقتان شىعار، ازداپ قوبالجىپ ءجۇرمىن. بويىمدا قورقىنىش تا جوق ەمەس.
- ەڭ باستى قارسىلاسىڭىز كىم؟
- ءبارىن جارىستا كورە جاتارسىزدار. قانشا سپورتشى بولسا، سونىڭ بارلىعى باستى قارسىلاسىمىز. ونىڭ ۇستىنە تاجىريبەلى، بۇرىن دا وليمپيادادا جۇلدە الىپ جۇرگەن سپورتشىلار بار. وڭاي قارسىلاس جوق.
- كورەيا ءسىزدى نەسىمەن قىزىقتىرىپ جاتىر؟
- قالا تازا، جاڭا. سونداي- اق، وتە تىنىش. قاۋىپسىز كورىندى.
- سپورتشىلارعا جاسالىپ جاتقان قىزمەتتەر كوڭىلىڭىزدەن شىعىپ جاتىر ما؟
- ارينە. قىزمەت كورسەتۋ ساپاسى دا ۇناپ جاتىر.
- تاماقتارىنا قانداي باعا بەرەسىز؟
- ءوز ەلىمىزدىڭ تاماعىنداي قايدان بولسىن. ءبىراق، جامان ەمەس.
- اڭگىمەڭىزگە راحمەت! ساتتىلىك تىلەيمىن...
اۆتور: كۇنسۇلتان وتارباي
