جاستارعا ەڭ جوعارى زەينەتاقىنى الۋ ءۇشىن نە ىستەۋ كەرەك

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا ەڭ جوعارى زەينەتاقىنى الۋعا قاتىستى كەڭەس بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، 1998 -جىلدان كەيىن ەڭبەك نارىعىنا كەلگەندەر زەينەتاقىنى جيناق جۇيەسى بويىنشا الادى. بۇدان بولەك، بازالىق زەينەتاقى تولەنەدى. ءبىراق ونىڭ كورسەتكىشى جوعارى بولۋى ءۇشىن جيناقتاۋ جۇيەسىن قاتىسۋ مەرزىمى ەسكەرىلەدى.

«جاستارعا وسىنى ۇعىپ الۋ قاجەت. ەگەر جالپى ەڭبەك ءوتىلى 33 جىلدان اسسا، وندا بازالىق زەينەتاقىنىڭ كورسەتكىشى 100 پروتسەنتتى (ەڭ تومەنگى كۇنكورىس دەڭگەيىنىڭ - 28284 تەڭگە) قۇرايدى. ال زەينەتاقى جارنالارى تۇراقتى تۇردە تولەنىپ، ءبىراز اقشا جينالسا، ءبىرىڭعاي زەينەتاقى قورىنان قوسىمشا اقشا تولەنەدى. سوندىقتان ەڭ كوپ جۇمىس ىستەگەن ادام ەڭ جوعارى زەينەتاقى الادى»، - دەدى س. جاقىپوۆا استانادا وتكەن باسپا ءسوز ءماسليحاتىندا.

ۆيتسە-ءمينيستردىڭ سوزىنە قاراعاندا، 1998 -جىلعى دەيىن ەسەپتەلەتىن ەڭبەك ءوتىلى بىرتىندەپ ازاياتىندىقتان، ىنتىماقتى زەينەتاقى جۇيەسى قىسقارتىلادى. وسىعان بايلانىستى 2020 -جىلدان باستاپ جۇمىس بەرۋشىلەر زەينەتاقى قورىنا قوسىمشا 5 پروتسەنتتىك تولەمدەردى اۋدارا باستايدى. وسىلايشا، ءبىر ادامنىڭ جارناسى 15 پايىزعا جەتەدى.

«زەينەتتىك جاسقا شىققاندا جيناقتالعان قارجىنىڭ مولشەرى 12 مينيمالدى زەينەتاقىدان تومەن بولسا، وندا ول قاراجاتتى بىردەن الۋعا رۇقسات بەرىلەدى. ودان كەيىن ەشقانداي تولەمدەر جاسالمايدى. ال جيناقتىڭ كولەمى جوعارى بولسا، وندا بازالىق زەينەتاقىمەن بىرگە اي سايىن ءبىرىڭعاي جيناقتاۋ قورىنان دا اقشا ءتۇسىپ تۇرادى»، - دەپ اتاپ كورسەتتى س. جاقىپوۆا.