استاناداعى «ءابۋ- دابي پلازا» - دا شەتەلدىكتەر قانشا جالاقى الادى

استانا. قازاقپارات - «ءابۋ- دابي پلازا»-دا جۇمىس ىستەيتىن شەتەلدىك مامانداردىڭ جالاقىسى جەرگىلىكتى جۇمىسشىلاردان تومەن، دەپ حابارلايدى قازاقپارات ءتىلشىسى.

ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نۇرجان التايەۆتىڭ ايتۋىنشا، وتكەن جىلى قازاقستاندىق جۇمىسشىلاردىڭ جالاقىسى جوعارى بولعان.

«ماسەلەن، وتكەن جىلدىڭ تەكسەرىسى بويىنشا قازاقستاندىق جۇمىسشىلاردىڭ جالاقىسى شەتەلدىك مامانداردان ءسال جوعارى ەكەنى انىقتالدى. جاڭىلماسام، ول جەردە شەتەلدىك جۇمىسشىلاردىڭ ورتاشا جالاقىسى 300 دوللاردىڭ شاماسىندا. بىزدىكىلەر ءسال جوعارى الادى»، - دەدى ن. التايەۆ بۇگىن استانادا وتكەن باسپا ءسوز ءماسليحاتىندا.

بۇدان بولەك، ۆيتسە-مينيستر جۇمىستان شىعارىلعان جۇمىسشىلار ماسەلەسىنە دە توقتالدى. ونىڭ سوزىنە قاراعاندا، ولاردىڭ بارلىعى مەملەكەتتىك قولداۋ شارالارىن پايدالانىپ، قىزمەتكە تۇرا الادى.

«بۇگىندە استانا قالاسىندا 4,5 مىڭ بوس جۇمىس ورنى بار. ءبىز ول ۆاكانسيالاردى جۇمىسشىلارعا كورسەتتىك. جۇمىسقا شىعاتىن بولساڭىز، سول جەرگە بارىپ، تۇرۋعا بولادى دەدىك. 4,5 مىڭ ۆاكانسيانىڭ ىشىندە 200 ى قۇرىلىس سالاسىنا قاراستى. ءبىراق ول ازاماتتار بۇعان ونشا قىزىعۋشىلىق تانىتقان جوق. ويتكەنى ولاردىڭ باستى تالابى - وتەماقى الۋ. نەگىزى، زاڭمەن ول وتەماقى بەلگىلەنبەگەن. ويتكەنى ەڭبەك كودەكسىنىڭ ءبىرىنشى بابىندا انىق جازىلعان، ەگەر ادام ۋاقىتشا جۇمىسقا الىنسا، وندا ەشقانداي وتەماقى تولەنبەيدى. ال ءبىر-ەكى جىلعا كەلىسىمشارت جاسالعاندا التى ايدىن كەيىن قىسقارتۋ بولسا، سوندا عانا ەكى ايلىق وتەماقى تولەنۋى ءتيىس. وسى جولى كومپانيا وكىلدەرى ءوز ەركىمەن ءبىر ايلىق تولەماقىنى بەرۋگە كەلىستى»، - دەپ اتاپ كورسەتتى ن. التايەۆ.