وسكەمەننىڭ ماي زاۋىتىنداعى جارىلىس: كىنالىلەر انىقتالدى

وسكەمەن. قازاقپارات - وسكەمەن قالاسىنداعى «ماي» زاۋىتىندا بولعان جارىلىستىڭ سەبەبىن انىقتاۋ ءۇشىن قۇرىلعان كوميسسيا تەكسەرىستى اياقتاپ، ناتيجەلەرىن ىشكى ىستەر ورگاندارىنا جولدادى، دەپ حابارلايدى «قازاقپارات» ح ا ا ءتىلشىسى.

ەسكە سالايىق، 21 -جەلتوقسان كۇنى وسكەمەندەگى «ماي» ا ق زاۋىتىندا جارىلىس بولىپ، ەكى جۇمىسشىنى كۇيىك شالعان بولاتىن. ونىڭ بىرەۋى اراعا التى كۇن سالىپ كوز جۇمدى. وسى وقيعاعا بايلانىستى وبلىستىق ەڭبەك ينسپەكسياسى كوميسسيا تاعايىنداپ، اپاتتىڭ سەبەبىن انىقتاۋعا كىرىسكەن بولاتىن. بۇگىن كوميسسيا ءوز جۇمىسىنا نۇكتە قويىپ، ناتيجەلەرىن قالالىق ىشكى ىستەر باسارماسىنا تاپسىردى.

«جارىلىسقا جىلۋ قۇرىلعىسى سەبەپشى بولعان. سوندىقتان كوميسسيا ىشىنەن كوميسسيا قۇردىق. وعان ەنەرگەتيكا ماماندارىن دا تارتتىق، بۋ كوللەكتورىنىڭ مەتالل قۇرامى دا ساراپتامادان ءوتتى. قوندىرعىنىڭ استىڭعى جانە ۇستىڭگى بولىكتەرى ەكى ءتۇرلى بولاتتان دانەكەرلەنگەنى انىقتالدى. بۇدان باسقا دا بىرنەشە قايشىلىقتار بار. ءبىر سوزبەن ايتقاندا، بۋ كوللەكتورى تالاپقا ساي ورناتىلماعان» - دەپ ءمالىم ەتتى كوميسسيا مۇشەسى مەدەت مۋسا «قازاقپارات» تىلشىسىنە تەلەفون ارقىلى.

ينسپەكسيا وكىلىنىڭ ايتۋىنشا، زارداپ شەككەن جۇمىسشىلار بۋ كوللەكتورىنا بەرىلەتىن سۋدىڭ مولشەرىن قاداعالاماعان. سۋ قاجەتتى مولشەردەن تىس بەرىلىپ، ارتىق قىسىم بۋ كوللەكتورىن اتىپ جىبەرگەن. اعا ماشينيست الەكسەي ستولياروۆ قۇبىردان شىققان بۋدىڭ ورتاسىندا قالىپ، دەنەسىنىڭ 70 پايىزىن كۇيىك شالعان. ال قازاندىق شەبەرى بوريس كاتايەۆتىڭ بەت-اۋزى مەن اياق-قولدارى كۇيگەن.

الەكسەي ستولياروۆتىڭ قازاسىنا 70 پايىز - جۇمىس بەرۋشى، 30 پايىز ءوزى كىنالى دەگەن شەشىم شىقتى.

«ىشكى كوميسسيا مۇشەلەرى بۋ كوللەكتورى اقاۋسىز بولعان كۇننىڭ وزىندە ارتىق بەرىلگەن سۋدىڭ قىسىمىنا شىداماس ەدى دەگەن تۇجىرىمعا كەلدى. اعا ماشينيست سۋ مەن بۋدىڭ دەڭگەيىن كورسەتىپ تۇراتىن قۇرىلعىلارعا دا نازار اۋدارماعان. سوندىقتان قايعىلى وقيعاعا سالعىرتتىق تا سەبەپ بولىپ وتىر»، - دەيدى مەدەت مۋسا.

ال بوريس كاتايەۆتىڭ ءوز كىناسى - 20 پايىز. كوميسسيا ونىڭ ۋچاسكە شەبەرى بولا تۇرا، جۇمىستى قاجەتتى دەڭگەيدە ۇيىمداستىرماعانىن ەسكەرىپتى. قايعىلى وقيعا «وندىرىسپەن بايلانىستى اپات» دەپ باعالاندى. وعان «ءوندىرىس جۇمىستارىنىڭ دۇرىس ۇيمداستىرىلماۋى، جۇمىسشىلاردىڭ قامسىزدىعى، قوندىرعىداعى اقاۋ، قاۋىپسىزدىك ەرەجەلەرىن قاجەتتى دەڭگەيدە وقىتپاۋ» سياقتى بىرنەشە قاتەلىك سەبەپ بولعان.

وسكەمەن قالاسىنىڭ ىشكى ىستەر باسقارماسى وسى شەشىم نەگىزىندە قىلمىستىق ءىس قوزعايتىن بولادى.