اقتوبەدە جەرگىلىكتى ديزاينەرلەر مەن تىگىنشىلەردىڭ ءسان كورسەتىلىمى ءوتتى - فوتو
اقتوبەدە ديزاينەرلەر مەن تىگىنشىلەر العاش رەت باس قوستى. وسى ارقىلى ديزاينەرلەر مەن تىگىنشىلەر قاۋىمداستىعى جەرگىلىكتى قولونەر شەبەرلەرىن بىرىكتىرىپ، ۇلكەن ىستەردى بىرلەسە شەشپەك. ءسان كورسەتىلىمى كەزىندە اۋدان، اۋىلدان تىگىنشىلەر كەلىپ، ولار ءوز كيىم ۇلگىلەرىن كورسەتتى. كوبى ۇلتتىق كيىمگە باسىمدىق بەرگەن. جاڭا باستامانى وبلىس اكىمى بەردىبەك ساپاربايەۆ قولداپ، ساتتىلىك تىلەدى.
«اۋدان، اۋىلدان كەلگەن ادامدارعا بۇل تاجىريبە الاڭى بولادى. سوڭعى ءسان ۇلگىلەرىمەن قاتار ۇلتتىق قۇندىلىقتارىمىزدى ناسيحاتتاپ، سالت- ءداستۇرىمىزدى ساقتاۋىمىز كەرەك. ءبىز ديزاينەرلەر مەن تىگىنشىلەر قاۋىمداستىعىن قولدايمىز. الداعى ۋاقىتتا «انالارعا تاعزىم» ورتالىعى اشىلادى. ورتالىقتا قولونەر شەبەرلەرىنىڭ دە ءوز قولتاڭباسى بولادى»، - دەدى اقتوبە وبلىسىنىڭ اكىمى بەردىبەك ساپاربايەۆ.
ءسان كورسەتىلىمىنە اقتوبەدەگى سانگەرلەر ستۋدياسىنىڭ جاستارى مەن بالالارى قاتىستى. ولار وزدەرىنە تىگىلگەن كيىم ۇلگىسىن كورسەتىپ، ارنايى جولمەن ءجۇرىپ ءوتتى.
«كيىم تىگۋ ۇرپاقتان ۇرپاققا تاراپ كەلەدى. اجەم، انام كيىم تىگىپ، ۇلتتىق كيىمدەردىڭ ۇلگىسىن ساقتاپ قالۋعا سەپتىگىن تيگىزدى. ال ءوزىم 2011 -جىلدان بەرى وسى سالاعا كەلدىم. بۇعان دەيىن ەسەپشى بولىپ، جۇمىس ىستەگەن ەدىم. ادامنىڭ بويىنداعى تالانت پەن شەبەرلىك، انادان ۇيرەنگەن ونەر جەڭىپ شىعادى ەكەن. مەن جىلىنا ەكى رەت ديزاينەرلىك توپتامانى جاڭارتىپ تۇرامىن. ءارقايسىسى ءبىر دانامەن تىگىلەدى»، - دەدى «اسىل قازىنا» برەندىنىڭ ديزاينەرى مالينا دۇيسەنبايەۆا.
ءسان كورسەتىلىمىنە پروكۋراتۋرا، پوليتسيا قىزمەتكەرلەرىنە ارنايى كيىم تىگىپ جۇرگەن شەبەرحانا يەلەرى دە قاتىستى. مەملەكەتتىك مەكەمەلەردەن تاپسىرىس قابىلدايتىن تىگىنشىلەر بۇل جولى ارنايى كيىم ۇلگىلەرىن كورسەتتى.
ايتا كەتەيىك، ءسان كورسەتىلىمىنە قاتىسقان ديزاينەرلەر مەن تىگىنشىلەر شەبەرلىك ساباعىنا قاتىسادى. سونىمەن قاتار، ولار ماتا تاڭداۋ، ساتىپ الۋ، قاجەتتى بۇيىمداردى جاساۋ جولدارىن ۇيرەنەدى.
