پاۆلودارعا سۇيىق اليۋمينيدىڭ العاشقى لەگى جەتكىزىلدى
ال قاناتتى مەتالدى بالقىتىلعان كۇيىندە جەتكىزۋ تەحنولوگياسىن «قازاقستان ەلەكتروليز» زاۋىتىنىڭ ماماندارى ويلاپ تاپقان. كولىك ديسكىلەرىن شىعاراتىن ءوندىرىستىڭ جۇمىسى قىزۋ ءجۇرىپ جاتىر. بۇعان دەيىن مۇندا اليۋمينيدى «قازاقستان ەلەكتروليز» زاۋىتىنان قۇيما تۇرىندە الاتىن. ەندى مىنە شيكىزات سۇيىق تۇرىندە جەتكىزىلەتىن بولدى.
ماماندار ودان ءونىمنىڭ ساپاسى ارتىپ، وزىندىك قۇنىنىڭ تومەندەيتىنىن ايتادى. سونىمەن قاتار باسەكەگە قابىلەتتى ءونىم شىعارۋعا مۇمكىندىك تۋادى. ايتسە دە پاۆلوداردا جاسالعان كولىك ديسكىلەرى ارى قاراي رەسەيدە وڭدەلەدى. بۇل دا ۋاقىتشا جاعداي ەكەن. قازىر كاسىپورىن قاناتتى مەتالدان ءجۇز پايىز دايىن ءونىم شىعارۋدى جوسپارلاپ وتىر. «پاۆلودار» ارنايى ەكونوميكالىق ايماعىندا ورنالاسقان زاۋىت بىلتىر ەلباسىنىڭ قولداۋىمەن ىسكە قوسىلدى. وسىلايشا ەرتىس وڭىرىندە باستاپقى اليۋمينيدى تەرەڭدتىپ وڭدەۋ ءوندىرىسى پايدا بولدى.
الەكساندر زورەيەۆ، «پاۆلودار» اەا باسقارۋشى كومپانياسى» ا ق باسقارما ءتوراعاسى:
- ەندى سۇيىق مەتالدى وسى كاسىپورىن ىشىندە الۋ تەحنولوگياسى قارالىپ جاتىر. سىناق تۇرىندە العاشقى تاسىمالداۋ جۇمىسى اياقتالدى. قاتەلىكتەر، ەسكەرەتىن جاعدايلار بار. ولاردى جويۋعا تىرىسىپ جاتىرمىز. جاقىن كۇندەرى سۇيىق اليۋميني نەگىزىندە ءدال وسى كاسىپورىندا دايىن ونىمدەر جاسالاتىن بولادى.
بۇل تەحنولوگيا اليۋمينيدى تەرەڭ وڭدەۋمەن اينالىساتىن وزگە دە وندىرىستەردە قولدانىلاتىن بولادى. ال سۇيىق اليۋميني قازاقستان ەلەكتروليز ماماندارى جاساپ شىعارعان ارنايى ۆاكۋۋمدىق ىدىستاردا جەتكىزىلەدى. جالپى اليۋمينيدىڭ باستاپقى كەزەڭدەگى قىزۋى 900 گرادۋستى قۇرايدى. ال تاسىمالداۋ كەزىندە نەبارى 20 گرادۋسىن جوعالتادى ەكەن.
مامانداردىڭ ايتۋىنشا، بۇل - قالىپتى جاعداي. ارى قاراي قاناتتى مەتالل وندىرىستەرگە تاراتىلادى. ازىرگە كاسىپورىن اليۋمينيدەن كولىك ديسكىلەرىن عانا دايىنداپ جاتىر. كەلەشەكتە ءونىم تۇرلەرىن كوبەيتۋ كوزدەلىپ وتىر. اليۋمينيدەن باعانالار، قالايى قاعازدارى مەن ءتۇرلى كەسىندىلەر شىعارۋ كوزدەلگەن.
www.24.kz
