استاناداعى «ءابۋ-دابي پلازا» قۇرىلىسشىلارىنىڭ ماسەلەسى «نۇر وتاننىڭ» باقىلاۋىندا - ماۋلەن اشىمبايەۆ

استانا. قازاقپارات - استاناداعى «ءابۋ- دابي پلازا» قۇرىلىس كەشەنىنىڭ جۇمىستان شىعىپ قالعان جۇمىسشىلارى «نۇر وتان» پارتياسىنا جۇگىندى، دەپ حابارلايدى «قازاقپارات» ح ا ا ءتىلشىسى.

اتالعان جايتقا وراي پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ پىكىر ءبىلدىردى. ونىڭ ايتۋىنشا، «نۇر وتان» پارتياسى استانا قالاسىنىڭ پروكۋراتۋراسىنا سايكەسىنشە ءوتىنىش جاسادى جانە قازىرگى ۋاقىتتا بۇل شەشىمنىڭ زاڭدىلىعى تەكسەرىلۋدە. ورىن العان جايتتى شەشۋگە ەلوردا اكىمدىگى دە جۇمىلدىرىلعان.

«بۇل پروبلەمانى شەشۋ ءۇشىن قاجەتتىنىڭ بارلىعى جاسالىپ جاتىر. «نۇر وتان» پارتياسى بۇل ماسەلەنى ءوز باقىلاۋىندا ۇستايتىن بولادى. مۇنداي جاعدايدا بارلىعىنىڭ سابىرلىق تانىتقانى وتە ماڭىزدى. قۇقىق قورعاۋ ورگاندارى مەن قالا اكىمدىگى جۇمىس ىستەۋدە. بىرلەسكەن كۇش- جىگەردىڭ ارقاسىندا بۇل احۋالدىڭ وڭ شەشىمى تابىلاتىندىعىنا سەنىمدىمىن»، - دەلىنگەن پارتيانىڭ سايتىندا جاريالانعان ماۋلەن اشىمبايەۆتىڭ پىكىرىندە.

«نۇر وتان» پارتياسىنىڭ مالىمەتىنشە، كەشە كەشكىسىن استانادا «ءابۋ- دابي پلازا» قۇرىلىس كەشەنىنىڭ 400 گە جۋىق جۇمىسشىسى زاڭسىز جۇمىستان شىعارىلعاندىقتارىنا شاعىمدانعان. ولاردىڭ ايتۋىنشا، جۇمىستان بوساتىلاتىندارى جونىندە ەشقانداي ەسكەرتۋ الماعان.

بۇل تۋرالى جۇمىسقا كەلگەن كەزدە ءبىراق بىلگەن. وسىدان كەيىن قۇرىلىسشىلار داۋلى جايتتى شەشۋگە كومەك سۇراپ، «نۇر وتان» پارتياسىنا جۇگىنگەن. كەشە تۇستەن كەيىن ولار پارتيانىڭ استانا قالالىق فيليالى باسشىلىعىمەن كەزدەسكەن.