پرەمەر-مينيستر تاركىلەنەتىن تاۋارلاردىڭ جويىلاتىنىنا كۇدىكتەندى

استانا. قازاقپارات - ۇكىمەت باسشىسى باقىتجان ساعىنتايەۆ تاركىلەنگەن ساپاسىز تاۋارلاردىڭ سورەگە قايتىپ تۇسپەۋىن قاداعالاۋدى تاپسىردى، دەپ حابارلايدى قازاقپارات ءتىلشىسى.

«ادام دەنساۋلىعىنا قاۋىپتى ونىمدەردى تاركىلەۋگە قاتىستى ايتارىم، ءبىز اتالعان ماسەلەنى ءالى كۇنگە دەيىن دۇرىس رەتتەي الماي وتىرمىز. ايتامىز دا، قويامىز. وسىدان ەكى جىل بۇرىن داۋرەن اسكەربەك ۇلى (اقپارات جانە كوممۋنيكاتسيالار ءمينيسترى - اۆت. ) دۇرىس ايتتى. قاۋىپتى تاۋارلاردى قالاي جويىپ جاتقانىمىزدى ۇنەمى كورسەتىپ وتىرۋىمىز قاجەت. ايتپەسە، اكسيانى وتكىزەمىز، تاۋاردى جويامىز، سونىمەن - ءتامام. ارى قاراي نە بولىپ جاتقانىن بىلمەيمىز»، - دەدى ب. ساعىنتايەۆ ۇكىمەتتىڭ بۇگىنگى وتىرىسىندا.

پرەمەر-ءمينيستردىڭ ايتۋىنشا، تاركىلەنگەن تاۋارلاردىڭ جويىلاتىنىن نە جويىلمايتىنىن، بولماسا ولاردىڭ قايتادان سورەلەرگە قويىلاتىنىن ەشكىم بىلمەيدى. «ايىپپۇل سالىندى ما؟ ناقتى قانداي شارالار قولعا الىندى؟ ءسوز جۇزىندە ءبارى جاقسى. مەملەكەتتىك باقىلاۋ كەزىندە تاۋاردىڭ قاۋىپتى ەكەنى دالەلدەنسە، ول تاۋاردىڭ قايتىپ سورەگە تۇسپەيتىنىن قاداعالاۋ قاجەت»، - دەپ اتاپ كورسەتتى ب. ساعىنتايەۆ.

ايتا كەتەيىك، بۇگىنگى وتىرىستا تاماق ونىمدەرىنىڭ قاۋىپسىزدىگىن باقىلاۋ سالاسىندا ءبىرىڭعاي ورگاندى بەلگىلەۋ ماسەلەسى قارالدى. اۋىل شارۋاشىلىعى مينيسترلىگى اتالعان مىندەتتى تولىعىمەن وزىنە جۇكتەۋدى سۇراپ وتىر.

 فوتو: primeminister.kz