اۋىل شارۋاشىلىعى مينيسترلىگى ناعىز سارى مايدىڭ باعاسىن ايتىپ بەردى

استانا. قازاقپارات - اۋىل شارۋاشىلىعى مينيسترلىگى تاماق قاۋىپسىزدىگىن باقىلاۋ شارالارىن تولىعىمەن وزىنە جۇكتەۋدى سۇراپ وتىر، دەپ حابارلايدى قازاقپارات ءتىلشىسى.

ق ر اۋىل شارۋاشىلىعى ءمينيسترىنىڭ ءبىرىنشى ورىنباسارى ارمان ەۆنيەۆتىڭ ايتۋىنشا، بۇگىندە ازىق-تۇلىك قاۋىپسىزدىگى سالاسىنداعى ءبىرىڭعاي ورگاننىڭ بولماۋىنان تەحنيكالىق رەگلامەنتتەر تولىققاندى ورىندالمايدى. سونىڭ سالدارىنان ىشكى نارىقتى قورعاۋ قيىن.

«ماسەلەن، سىرتتان كەلەتىن قۇس ەتى بىرنەشە رەت مۇزداتىلادى. سەبەبى ىشىنە سۋ جانە تاعى باسقا قوسپالاردى ارالاستىرىپ جاتادى. نەگىزگى ماقسات - ەتتىڭ سالماعىن ارتتىرۋ. سول سياقتى سارى مايدى ءوندىرۋ سالاسىندا فالسيفيكاتسيا كوپ. نەگىزى، تەحنيكالىق ستاندارتتار بويىنشا سارى مايدىڭ ءبىر كەلىسىن ءوندىرۋ ءۇشىن، كەم دەگەندە، 22 ليتر ءسۇت كەرەك. سوندا ناعىز مايدىڭ ءوز باعاسى كەلەسى ءۇشىن 2750 تەڭگەدەن كەم بولماۋى قاجەت. ال وتكەن جىلدىڭ 11 ايىندا قازاقستانعا 1858 توننا شەتەلدىك سارى ماي يمپورتتالدى. اتالعان ءونىمنىڭ باعاسى ەكى ەسەگە ارزان بولىپ شىقتى. بۇل دەگەنىمىز، ونداي مايدى ءوندىرۋ كەزىندە ارزان قوسپالار قولدانىلادى»، - دەدى ا. ەۆنيەۆ ۇكىمەتتىڭ بۇگىنگى وتىرىسىندا.

ۆيتسە-ءمينيستردىڭ سوزىنە قاراعاندا، سارى ماي سياقتى شەتەلدىڭ ارزان ونىمدەرى وتاندىق تاۋارلاردى شىعارۋعا كەدەرگى بولىپ وتىر. سەبەبى باعاسى - ارزان، ءبىراق ساپاسى - تومەن. ارزان ءونىم يمپورتتالعاننان كەيىن مەملەكەت تاراپىنان وتاندىق ونىمدەرگە جاسالاتىن بارلىق قولداۋ شارالارى ءتيىمسىز بولىپ قالادى.

«سول سەبەپتى اۋىل شارۋاشىلىعى مينيسترلىگىن بارلىق تاماق ونىمدەرىنىڭ قاۋىپسىزدىگىن باقىلاۋ سالاسىنداعى ءبىرىڭعاي ورگان رەتىندە بەلگىلەۋ كەرەك. ونداي تاجىريبە كانادا، فرانسيا، ليتۆا، ا ق ش، قىتاي سياقتى ەلدەردە بار»، - دەپ اتاپ كورسەتتى ا. ەۆنيەۆ.