قازاقستاننىڭ قاي ءوڭىرى شەتەلدىك ۆاليۋتاعا اۋەس
سايت مالىمەتىنشە، ءبىر جىلدىڭ ىشىندە ەل تۇرعىندارىنىڭ دوللاردى ساتىپ الۋى - 19,9، ەۋرونى - 29,1 جانە رەسەيدىڭ ءرۋبلىن ساتىپ الۋى 18,9 پايىزعا ارتقان. ال وڭىرلىك شەكتە استانا مەن الماتى تۇرعىندارىنىڭ ۆاليۋتا ساتىپ الۋ كورسەتكىشى جوعارى بولىپ تۇر. اتالعان ەكى قالانىڭ تۇرعىندارى وتكەن جىلى ەلىمىزدىڭ ۆاليۋتا ايىرباستاۋ پۋنكتەرىندە ساۋدالانعان دوللاردىڭ - 57، ەۋرونىڭ - 66 جانە رۋبلدىڭ 25 پايىزىن ساتىپ العان.
جالپى، 2017 -جىلى ەلىمىزدىڭ بارلىق وڭىرىندە امەريكالىق ۆاليۋتا ساتىپ الۋشىلاردىڭ لەگى كۇرت ارتتى. ماسەلەن، الماتى تۇرعىندارى ءبىر جىلدىڭ ىشىندە - 4,8 ميلليارد، استانا تۇرعىندارى - 1,3 ميلليارد، ال وڭتۇستىك قازاقستاندىقتار 1,2 ميلليارد دوللار ساتىپ العان. دەگەنمەن، جىل ىشىندە دوللار ساتىپ الۋ بەلسەندىلىگى تومەندەگەن ءوڭىر دە بار. ول - جامبىل وبلىسى. اتالعان ءوڭىردىڭ تۇرعاندارى 183 ميلليون دوللار ساتىپ العان. بۇل 2016 -جىلعى كورسەتكىشتەن 2,5 پايىزعا كەم.
ەۋرو ساتىپ الۋدا دا الماتىلىقتار كوش باستاپ تۇر. ولار ءبىر جىلدىڭ ىشىندە 507,6 ميلليون ەۋرو ايىرباستاعان. ەكىنشى ورىندا ادەتتەگىدەي استانالىقتار تۇر. ولاردىڭ ساتىپ العان شەتەلدىك ۆاليۋتاسى 202,6 ميلليون ەۋروعا تەڭ. ۇزدىك ۇشتىككە بۇل جولى دا ەنگەن وڭتۇستىك قازاقستاندىقتار ءبىر جىلدىڭ ىشىندە 61,8 ميلليون ەۋرو ساتىپ العان.
ءبىر جىلدىڭ ىشىندە 23,2 ميلليارد رەسەيلىك رۋبل ساتىپ العان الماتىلىقتار شەتەلدىك ۆاليۋتانىڭ بۇل ءتۇرى بويىنشا ءبىرىنشى ورىندا. ودان كەيىنگى ورىنعا 17,1 ميلليارد رۋبلمەن شىعىس قازاقستاندىقتار ورنالاسقان. ال ءۇشىنشى ورىندا - استانالىقتار. ەلوردا تۇرعىندارى ءبىر جىلدىڭ ىشىندە 15,8 ميلليارد رۋبل ايىرباستاعان.
ەستەرىڭىزگە سالا كەتسەك، 2016 -جىلى ەلىمىزدىڭ بارلىق ۆاليۋتا ايىرباستاۋ پۋنكتتەرىندە دوللاردى ساتىپ الۋ - 48,1، ەۋرونى - 19,8، ال رۋبلدى ساتىپ الۋ 39,8 پايىزعا كەمىگەن بولاتىن.
