مودەل پلاستيكالىق وتا جاساتامىن دەپ مۇرنىنان ايىرىلىپ قالدى
بۇل تۋرالى اعىلشىن باسىلىمى The Sun-عا سىلتەپ Stan.kz حابارلايدى.
حلويا حان (Chloe Khan) ءساتسىز وتا تۋرالى ءوزىنىڭ Instagram-داعى پاراقشاسىندا جازدى.
مودەل سوڭعى كەزدەرى رينوپلاستيكا جايلى كوپ سۇراق قويىلعانىن ايتادى. ءدال وسى سەبەپتى ول مۇرنىن جۇرتقا كورسەتۋدى ءجون كورىپتى.
حاننىڭ ايتۋىنشا، وتكەن جىلدىڭ قازان ايىندا جاسالعان ءساتسىز وتادان كەيىن، ونىڭ مۇرنىندا سۇيەك قالماعان. مۇرىن كەڭسىرىگىن قالىپقا كەلتىرۋ ءۇشىن بويجەتكەن قۇلاق شەمىرشەگىن اۋىستىرۋعا ءماجبۇر بولعان.
بۇل رەتتە حان جۇرتتى Instagram-داعى جارناماعا الدانىپ قالماۋعا شاقىردى. ايتۋىنشا، مۇرنىن بۇزىپ بەرگەن حيرۋرگتىڭ جەلىدە ميلليونداعان وقىرمانى بار. ءدال وسى سەبەپتى وتانىڭ ءساتسىز شىققانىنا كوپشىلىك سەنبەپتى.
مودەل وتا جاساتپاس بۇرىن جەتى رەت ولشەپ، ءبىر رەت كەسۋ كەرەكتىگىن ايتتى. سونداي- اق، تەك تەكسەرىلگەن دارىگەرگە جۇگىنۋگە كەڭەس بەردى.
حلويا حان Playboy جۋرنالىنا تۇسكەن، سونداي- اق، ءبىرقاتار ت ۆ- شوۋلارعا قاتىسقان. ولاردىڭ ىشىندە «ح- فاكتور» مەن Celebrity Big Brother بار.
