التىن قۇيمالار ۆاليۋتا ايىرباستاۋ بەكەتتەرىندە ساتىلادى

استانا. قازاقپارات - قازىرگى كەزدە حالىق اراسىندا التىن قۇيمالارعا سۇرانىس جوعارى بولىپ تۇر. سوندىقتان ونداي قۇيمالاردى ۆاليۋتا ايىرباستاۋ بەكەتتەرىندە ساتۋ جوسپارلانىپ وتىر، دەپ حابارلايدى قازاقپارات ءتىلشىسى.

ق ر ۇلتتىق بانك ءتوراعاسىنىڭ ورىنباسارى ولەگ سمولياكوۆتىڭ ايتۋىنشا، قازىرگى كەزدە ءبىرقاتار بانكتەردە التىن قۇيمالار ساتىلىپ جاتىر.

 «بۇعان دەيىن ءبىز شاعىن قۇيمالارمەن التىندى ساتىپ الۋعا رۇقسات بەرگەن ەدىك. قازىر سۇرانىس جوعارى. سوندىقتان اتالعان باستامانى كەڭەيتىپ، بانك ۇيىمدارىنا جاتپايتىن مەكەمەلەرگە، الدىمەن ۆاليۋتا ايىرباستاۋ بەكەتتەرىنە دە التىن قۇيمالاردى ساتۋعا رۇقسات بەرۋدى كوزدەيمىز. ويتكەنى ۆاليۋتا ايىرباستاۋ بەكەتتەرى دە بانكتەر سياقتى ءتيىستى رۇقسات كۋالىكتەرىن الادى، قاۋىپسىزدىك شارالارىن ساقتايدى. ولاردىڭ بارلىق وپەراتسيالارى باقىلانادى. سوندىقتان زاڭ جوباسى اياسىندا ەكىنشى دەڭگەيلى بانكتەرگە قارامايتىن ۆاليۋتا ايىرباستاۋ بەكەتتەرىنە التىن قۇيمالاردى ساتۋعا رۇقسات بەرۋ كوزدەلگەن. ارينە، ونداي قۇيمالار ۇلتتىق بانكتەن الىنادى»، - دەدى و. سمولياكوۆ بۇگىن «ۆاليۋتالىق رەتتەۋ جانە ۆاليۋتالىق باقىلاۋ تۋرالى» زاڭ جوباسىن تانىستىرۋ بارىسىندا.

بۇدان بولەك، اتالعان قۇجات بويىنشا شەتەلدىك بانكتەردىڭ فيليالدارىنا رەزيدەنت مارتەبەسىن بەرۋ كوزدەلىپ وتىر.

اۆتور: ارمان اسقاروۆ