ۇيقى قاندىرۋدىڭ دەنساۋلىق ءۇشىن ماڭىزى قانداي

استانا. قازاقپارات - ​ۇيقىنىڭ جەتىسپەۋشىلىگى ادام دەنساۋلىعىنا قالاي اسەر ەتۋى مۇمكىن؟ ەكەندىگىن وقىپ شىعىڭىز.

دارىگەر، فيتنەس- نۇسقاۋشى سونداي- اق «Sputnik Osetia» جۋرنالىنىڭ شولۋشىسى اننا گاگلويەۆا ۇيقىنىڭ قانباۋى الەمدەگى ءومىر ساپاسىنا قالاي اسەر ەتەتىنى تۋرالى اڭگىمەلەدى.

بۇل تۋرالى Sputnik قازاقستان حابارلادى.

كەز- كەلگەن ەرەسەك ادامنان قازىرگى كەزدە بىزگە نە جەتىسپەيدى؟ - دەپ سۇراپ كورىڭىز. ارينە ول اقشا جانە ۇيقى جەتىسپەيدى دەپ جاۋاپ بەرەدى. اقشا جاعىنا كەلسەك، ءبارى تۇسىنىكتى. ءبىراق ۇيقىنىڭ جەتىسپەۋى قيىن جاعداي. سەبەبى، ءبىزدىڭ ۇيقىمىز قانباسا دا، ءومىر ءسۇرۋ ءۇشىن تاڭنان كەشكە دەيىن قىزمەت ەتەمىز.

بەلگىلى ءبىر جاسقا جەتكەنشە ءتۇنى بويى كومپيۋتەردىڭ الدىندا وتىرىپ، ۇيىقتاماۋ قىزىق كورىنۋى مۇمكىن. الايدا، ۋاقىت وتە كەز كەلگەن ادام ۇيقىسىنىڭ قانباي جۇرگەنىنە شاعىمدانا باستايدى. ءبىراق ۇيقىنىڭ قانباۋى سانا- سەزىمگە عانا ەمەس، سونىمەن بىرگە دەنساۋلىققا دا اسەر ەتەدى. سول ءۇشىن، مىقتى بولۋعا تىرىسپاي، ۋاقىتىمەن ۇيىقتاعان ءجون.

ءومىردىڭ قازىرگى ىرعاعى، مىڭداعان جارىقتار، گادجەتتەردىڭ جارىق ەكراندارى بارلىعى اعزاداعى بيولوگيالىق زاڭداردى بۇزادى. تەلەفون، پلانشەت، ءتۇرلى تەحنيكالار ادامنىڭ قولدانىسىندا بولۋ ءۇشىن بارلىعىن جاسايدى. ادام كۇن ساۋلەسىن جاساندى تۇردە ۇزارتا العانىمەن، تابيعي قاجەتتىلىكتەردەن باس تارتا المايدى. دەنەنىڭ بەلسەندىلىگىن ساقتاۋ مەلاتونين گورمونىنا بايلانىستى. مەلاتونين ەموتسيالىق، فيزيكالىق بەلسەندىلىكتى تومەندەتەدى، قان قىسىمىن رەتتەيدى، اعزانىڭ يممۋندىق رەاكتيۆتىلىگىن ارتتىرادى. ەڭ دۇرىسى كەش باتا سالا ءبىز جىلدامدىقتى تومەندەتىپ، ۇيىقتاۋعا دايىندالۋىمىز كەرەك. ادامدار ۇيقىعا بولىنگەن ۋاقىتتا كەرىسىنشە، اياقسىز قالعان جۇمىستارىن بىتىرۋگە اسىعادى.

ەگەر ۇيقى ۇزاق ۋاقىت قانباسا، جۇرەك- قان تامىرلار جۇيەسىنىڭ اۋرۋلارىنا اكەلۋى مۇمكىن. سونداي- اق، ەستە ساقتاۋ قابىلەتىنە كەرى اسەرىن تيگىزىپ، ويلاۋ قابىلەتىن بۇزادى. بالالارداعى سۇيەك ءتۇزىلۋ پروتسەستەرى بۇزىلىپ، تيىسىنشە ءوسۋدى باسەڭدەتىپ وتىرادى. مەتابوليزم پروتسەستەرىنە دە زيان كەلىپ، ارتىق سالماقتىڭ پايدا بولۋىنا اكەلەدى.

سپورتپەن شۇعىلداناتىن ادامدار ءۇشىن ۇيقى جاتتىعۋ پروتسەسىنىڭ ماڭىزدى بولىگى بولىپ تابىلادى. اسىرەسە اۋەسقوي سپورتشىلار مىندەتتى تۇردە فيزيكالىق جانە ەموتسيونالدى قالپىنا كەلۋ ءۇشىن ۇيىقتاۋ رەجيمىن دۇرىس ساقتايدى. جاتتىعۋ كەزىندە بۇلشىق ەتتى قانشا «شارشاتىپ» ، ارتىنان پايدالى اقۋىزدارمەن تاماقتانسا دا، اعزاعا ۇيقى جەتىسپەسە ونىڭ ىستەگەن ەڭبەگى ونبەيدى.

ۇيقى كەزىندە ەرەسەكتەردە بۇلشىق ەت ماسساسىن كوبەيتىپ، مايلى قاباتتى ازايتاتىن ءوسۋ گورمونى شىعارىلىپ تۇرادى. اجەلەرىمىزدىڭ: بالالار تۇسىندە وسەدى دەگەن دانالىعى وسىدان قالسا كەرەك. ۇيقى بۇزىلسا نەمەسە ۇزىلسە، كومىرسۋلاردىڭ مەتابوليزمى بۇزىلىپ، سالماققا تەرىس اسەر ەتەدى. ۇيقى تۇراقسىز بولسا بيولوگيالىق بەلسەندى زات سينتەزىنىڭ بۇزىلۋىنا ىقپال ەتەدى.

لەپتين - ءبىزدىڭ تابەتىمىزدىڭ رەتتەۋشىسى، ول ميداعى دەنە سالماعىنىڭ جانە مايدىڭ مەتابوليزمى تۋرالى قىزمەتتەردى جۇزەگە اسىرادى. مي تاعامنىڭ رەتتەلۋىنە جاۋاپ بەرەتىن جانە گاسترونوميالىق قاجەتتىلىكتەرىمىزدى ازايتاتىن ايماقتاردى بەلسەندىرەدى. جارناماداعى اقپاراتقا سۇيەنسەك، ادام ءومىرىنىڭ ۇشتەن ءبىرىن ۇيقىعا جۇمسايدى. ءبىر جاعىنان، ءومىر سۇرۋگە بەرگەن ۋاقىتتى ۇيقىعا وتكىزۋ وكىنىش تۋدىراتىنى انىق. ەكىنشى جاعىنان، ءومىر بويى ۇيقى قانباي، اينالاڭا تىتىركەنىپ قاراۋ دۇرىس ەمەس. ۇيقى ومىرگە، كوڭىل- كۇيدىڭ جانە سىرتقى كورىنىستىڭ ساپاسىنا تىكەلەي اسەر ەتەدى. ال ءسىز ومىرگە تۇڭىلە بەرۋدىڭ ورنىنا، ۋاقىتىمەن ۇيىقتاپ جۇرگەنىڭىز ابزال.