اقتوبەدە ءىرى قارانىڭ ءمۇيىزى مەن تۇياعىنان جەم دايىندالادى

اقتوبە. قازاقپارات - اقتوبەدەگى ءىرى ەت وڭدەۋ كومبيناتىندا بالىق پەن ءيتتىڭ جەمى شىعارىلادى. ءىرى قارانىڭ ءمۇيىزى مەن تۇياعىنان دايىندالاتىن ازىق ساتىلىمدا بار، دەپ حابارلايدى قازاقپارات ءتىلشىسى.

اقتوبەدەگى ەت كومبيناتىندا ءىرى قارا مال تۇگەل وڭدەلەدى. قالدىقسىز جۇمىس ىستەيتىن كومبينات قۇرىلتايشىسى نۇرلان ساعىناليننىڭ ايتۋىنشا، قىتاي نارىعى اشىلسا، ىشەك-قارىن، قىرىققاباتتىڭ باعاسى ەكى ەسە قىمباتتايدى. قازىرگى كەزدە قىرىققابات تازارتىلىپ، تۇزدالىپ جاتىر. ال مالدىڭ تۇياعى، سۇيەگى، مۇيىزىنەن ءيت پەن بالىقتىڭ ازىعى شىعارىلىپ جاتىر. بەكىرەنىڭ ازىعىندا دارىمەندەر بار. يتكە ارنالعان ازىققا تازا ەت قوسىلادى.

«ەت كومبيناتىندا دارۋمەندەرى بار قۇرعاق ازىق دايىندالىپ جاتىر. ارنايى قۇرىلعى ساتىپ الىندى. وڭدەلگەن ازىق بالىققا وتە پايدالى. ال ءيتتىڭ ازىعى «پرەميۋم» كلاسپەن شىعارىلىپ جاتىر. بۇل دا قۇرعاق ازىق»، - دەدى نۇرلان ساعىنالين.

ايتا كەتەيىك، اقتوبەدەگى ەت كومبيناتى 2015-جىلى ىسكە قوسىلدى. قۇرال-جابدىقتىڭ ءبارى گەرمانيادان اكەلىنگەن. ەتتى ەكسپورتتاۋعا باسىمدىق بەرەتىن كومبينات وتكەن جىلى رەسەيگە 94 توننا ءونىم تاسىمالدادى. بيىل بۇل كورسەتكىش ارتادى.

«ەت وڭدەۋ كومبيناتى قالدىقسىز جۇمىس ىستەيدى. مۇندا بورداقىلاۋ الاڭى، مالدى اسىلداندىرۋ، ۇرىقتاندىرۋ جۇمىستارى جۇرەدى. سونىمەن قاتار، كووپەراتيۆ اۋقىمىنا كىرەتىن شارۋاشىلىقتار مال ازىعىن دايىندايدى. دايىن ءونىم ىشكى نارىققا، شەتەلگە جىبەرىلەدى. ءارى ءىرى مۇناي كومپانيالارىنىڭ تاپسىرىس قابىلدايمىز. جىلىنا 7200 توننا ءونىم شىعارىلادى دەپ جوسپارلانعانىمەن كومبينات 50 پايىزعا جۇمىس ىستەپ تۇر. بىزدە ءىرى قارا مال باسى جەتكىلىكسىز»، - دەدى ەت كومبيناتى كەشەنىنىڭ ديرەكتورى ۆاحتانگ دجيدجيەشۆيلي.

قازىرگى كەزدە شارۋالار، قاراپايىم اۋىل تۇرعىندارى مالدى كومبيناتتىڭ بورداقىلاۋ الاڭىنا تاپسىرىس، سالماق جيناعان سوڭ ساتىپ جاتىر. بۇل ادىسپەن جاقىن وبلىستىڭ شارۋالارى دا مال تاپسىرادى.

اۆتور: التىناي ساعىندىقوۆا