اقتوبەلىك ديزاينەر قازاقتىڭ ۇلتتىق كيىمىن شەتەلدەگى ءسان كورسەتىلىمىنە اپارادى

اقتوبە. قازاقپارات - اقتوبەلىك كاسىپكەر ءسابينا جانزاقوۆا ەكى جىلدان بەرى ۇلتتىق كيىمدەر تىگىپ، شەتەلدەگى ءسان كورسەتىلىمدەرىنە قاتىسىپ ءجۇر.

ۇزدىكتەر قاتارىنا ىلىككەن ديزاينەر جىل سايىن بىرنەشە ەلدەن شاقىرتۋ الادى، دەپ حابارلايدى قازاقپارات ءتىلشىسى.

تۇرمىسقا شىعىپ، وزگەلەردەن ەرەكشە ساندەگى كويلەك كيگىسى كەلگەن ءسابينا جانزاقوۆا ماتا الىپ، تىگىنشىگە بارادى. ءبىراق شەبەرلەر توي كويلەگىن تىگۋدەن باس تارتقان. سول كەزدە ديزاينەر ءسابينا جانزاقوۆا ارنايى سىزباسىن دايىنداپ، كوڭىلى قالاعان كويلەكتى كيدى. ادامداردىڭ تاڭدانىسىن تۋدىرعان جاڭا ءسان سۇرانىسقا يە بولىپ، ول ۇلتتىق كيىم تىگۋدى قولعا الدى. قازىر الەمنىڭ ءار تۇكپىرىندە بولىپ جاتقان ءسان كورسەتىلىمدەرىنە قاتىسادى. ول ەرەسەك ادامدارعا، بالالارعا كيىم تىگەدى.

«اقتوبەلىكتەر توي كويلەكتەرىنە ءجيى تاپسىرىس بەرەدى. جاس كەلىنگە ارنالعان كويلەكتىڭ بارىندە ۇلتتىق ويۋ-ورنەگىمىز بار. بالالاردىڭ كيىمىنە دە سۇرانىس جوعارى. مەن قازاقستان، اقتوبە اتىنان شەتەلگە بارىپ، ونەر كورسەتەتىن بالالاردى كيىندىرەمىن. ءانشى، ءبيشى بالالار ءۇشىن ۇلتتىق كيىم زاماناۋي ۇلگىدە تىگىلۋى كەرەك. سونىمەن قاتار، حالىقارالىق كورمەلەرگە ارنايى دايىندايمىز. تاياۋدا سۋن كسەنيا گرۋزيادا وتكەن حالىقارالىق كونكۋرسقا قاتىسىپ، ءى ورىندى جەڭىپ الدى. وزىمە بالالارمەن جۇمىس ىستەگەن ۇنايدى»، - دەدى كاسىپكەر ءسابينا جانزاقوۆا.

اقتوبەلىك تىگىنشىلەر مەن ديزاينەرلەر ءۇشىن ماتا جەتكىزۋ قيىن. ال دۇكەندەردەگى باعا قىمبات. سوندىقتان كەيدە ۇلتتىق ءونىم وتە قىمباتقا شىعادى. ماتا جەتكىزۋ، تاپسىرىس بەرۋ كەزىندە كاسىپكەرلەرگە اكىمدىك كومەك بەرسە، ۇلتتىق كيىمنىڭ دە سۇرانىسى ارتادى دەگەن سەنىمدە كاسىپكەر.

«ساۋكەلە مونشاقتارى ارنايى تىگىلەدى. ماسەلەن، مونشاقپەن ورىلگەن جاسىل ساۋكەلەنى 1 اي تىگۋگە تۋرا كەلدى. بۇل شىدامدىلىق پەن ۇقىپتىلىقتى قاجەت ەتەتىن جۇمىس. سوڭعى جىلدارى ادامدار ۇلتتىق كيىمگە اۋەس، قىزىعۋشىلىق ارتتى. بۇرىن ىزدەپ، تابا المايتىن ەدى. ءبىز ونى تىگۋدى ۇسىنامىز. ءتىپتى، كەلىنگە ارنالعان ويۋلى ورامال دا سۇرانىستا بار. الدىمەن وزىمە دەپ تىگىپ، كەيىن دوستارىم، تانىستارىمنىڭ سۇرانىسى ارتتى. جالعا بەرۋگە سۇرادى، قايدان العانىم قىزىقتىردى. سودان كەيىن ۇلتتىق كيىم تىگەتىن اتەلە اشۋدى جوسپارلادىم. سۇرانىس كوپ، جاستار قىزىعادى. ءدىن جولىنداعى قىزدار دا ءساندى كيىم كيۋدى قالايدى. ۇلتتىق ناقىشپەن تىگىپ بەرەمىز»، - دەدى سابينا جانزاقوۆا.

ديزاينەر ءارى تىگىنشى شەتەلگە ءجيى شىعىپ، ءسان كورسەتىلىمىنە بارادى. قازاقتىڭ ۇلتتىق كيىمىنە قىزىعۋشىلار سانى ارتىپ كەلە جاتقانىن قۋانا جەتكىزگەن كاسىپكەر الداعى ۋاقىتتا گرۋزيانى باعىندىرماق.

«سوڭعى رەت دۋبايعا باردىق. قازاقتىڭ ۇلتتىق كيىمىن كيگەن بالالار قىزىل كىلەممەن 4 رەت ءجۇرىپ ءوتتى. سەبەبى، بۇل ءسان كورسەتىلىمىنە كەلگەن كورەرمەننىڭ سۇرانىسى بولدى. ءبارى سۋرەتكە ءتۇسىرىپ، بالالارمەن تىلدەستى. قازاقتىڭ ۇلتتىق كيىمى وتە ادەمى جانە باي. گرۋزيادا وتكەن شەبەرلىك ساباعىنا قاتىسقان كەزدە ماعان ەشكىم كوڭىل اۋدارمادى. ەڭ جاسى مەن بولدىم. سوڭعى كۇنى ءار اتەلە ءوز كيىمدەرىن تانىستىردى. سول كەزدە ءبارى تاڭىرقاپ، فوتوسەسسيا جاسالدى. وكىنىشكە قاراي، مەن تىككەن كويلەك گرۋزين قىزدارىنا ساي كەلمەي، ءوزىم كيىم فوتوسەسسياسىن جاسادىم. سانگەر بولىپ، قالانى ارالادىم. ساپار كەزىندە كوكتەمدە وتەتىن ءسان كورسەتىلىمىنە شاقىرتۋ الدىم. بارىپ، قازاقستاندى تانىتقىم كەلەدى»، - دەدى ول.

يسپانيا، يتاليا، ب ا ءا- دە وتكەن ءسان كورسەتىلىمدەرىنە قاتىسىپ، بالالاردىڭ ۇلتتىق كيىمى باس جۇلدەنى الدى. ەندىگى ارمانى - گرۋزيادا وتەتىن ءسان اپتالىعىنا قاتىسىپ، جەڭىسكە جەتۋ.

«ءوزىم ديزاينىن سىزىپ، تىگەمىن. سونىمەن قاتار، 6 تىگىنشىنى جۇمىسقا الدىم. ولاردىڭ اراسىندا كويلەككە قاجەتتى دەكوراتيۆتى بۇيىمدار تىگەتىن، ساۋكەلەنى مونشاقپەن كوركەمدەيتىن تىگىنشىلەر بار. ءبارىن ءوزىم باقىلاپ وتىرامىن. كۇندە جۇمىس، تاپسىرىس. تۇنگى 2 دە، تاڭعى 8 دە تاپسىرىستى ءبىتىرىپ جاتامىز. سوڭعى ۋاقىتتى ونەر ادامدارى تاپسىرىس بەرىپ ءجۇر. ءبىز ءتاج، سىرعا دايىنداپ بەرە الامىز. الەۋمەتتىك جەلىدە ارنايى پاراقشا بار. ءبىراق ۇلتتىق كيىمدەر تۇسىرىلگەن سۋرەت ادامدارعا ءوتىمسىز. ونى كيىپ، سىرعانى تاعىپ ءجۇرۋ كەرەك. سول كەزدە ادامدار قىزىعادى، سۇراي، ساتىپ الادى. ءسان اپتالىعىنا بارعاندا سول ساتتە ساتىپ الاتىن جاعداي كەزدەسەدى»، - دەدى كاسىپكەر.

ءسابينا جانزاقوۆا ءوز كيىمدەرىنىڭ ۇلگىسىن «كۇنكەي» دەپ اتادى. اناسى كىشكەنتايىندا ەركەلەتىپ، قىزىنا كۇنكەي دەپ ات قويعان. ءسان الەمىنىڭ جاس ديزاينەرى دە ۇلتتىق كيىم تىگۋدى قولعا العاندا بىردەن ءمان-ماعىناسى تەرەڭ برەندتى تاڭدادى. ديزاينەر جەرگىلىكتى سانگەرلەرمەن بىرگە جۇمىس ىستەپ، شەتەلدەگى ءسان اپتالىقتارىنا ءجيى بارۋدى ماقسات ەتىپ وتىر.

اۆتور: التىناي ساعىندىقوۆا