ارۋلار بايقاۋىنا قاتىسقان الماتىلىق مودەلدىڭ جىگىت ەكەنىن ەشكىم بايقاماعان

استانا. قازاقپارات - مودەل جىگىت مۇنداي ەكسپەريمەنت جاساۋعا نە يتەرمەلەگەنىن ايتىپ بەردى.

الماتىلىق جىگىت Miss Virtual Kazakhstan ارۋلار سۇلۋلىق بايقاۋىنىڭ فينالىنا دەيىن جەتكەن.

22 جاستاعى يلاي دياگيلەۆ كونكۋرسقا قاتىسۋ ءۇشىن شىمكەنتتىك ارۋ ارينا اليەۆانىڭ بەينەسىندە فوتوسۋرەتتەرىن جولدايدى. جاس جىگىتتىڭ فوتوسى قازاقستاندىقتاردىڭ كوبىسىنە ۇناپ، سايىستىڭ فينالىنا دەيىن جەتكەن.

Sputnik قازاقستان ءتىلشىسى يلايمەن سۇحباتتاسىپ، ەرەكشە وقيعانىڭ قالاي بولعانىن ءبىلدى.

يلاي دياگيليەۆ قىز بەينەسىندە

«دوستارىممەن سۇلۋلىق تاقىرىبىندا داۋلاسىپ قالدىم. سودان وسى بايقاۋعا قاتىسايىن دەپ شەشىم قابىلدادىم. مەن تابيعي سۇلۋلىقتى قولدايمىن. قازىر، وزدەرىڭىز كورىپ وتىرسىزدار، بارلىق قىز بىردەي بويانىپ، كيىنەدى جانە ولار زامان اعىمىنان قالماسام، ادەمى كورىنەمىن دەپ ويلايدى. مەن ولاي ەسەپتەمەيمىن»، - دەپ پىكىر ءبولىستى يلاي.

الماتىلىق جىگىت بەت-اۋزىن بوياپ، الەم-جالەم بولىپ كيىنەتىن قىزداردى ەمەس، تابيعي سۇلۋلىقتى ناسيحاتتاۋ قاجەت ەكەنىن اتاپ ءوتتى.

«مەن فينالعا دەيىن جەتىپ، جاعدايدىڭ ۋشىعىپ بارا جاتقانىن تۇسىنگەندە ارينا اليەۆانىڭ كىم ەكەنىن ايتايىن دەپ شەشتىم. قازاقستاننان 4 مىڭعا جۋىق ءوتىنىم ءتۇستى، سونىڭ ىشىندە مەن فينالعا ءوتتىم»، - دەدى دياگيليەۆ.

ايتا كەتەيىك، وسى جاعدايدان كەيىن Miss Virtual Kazakhstan-2018 ۇيىمداستىرۋ كوميتەتىنىڭ شەشىمىمەن وڭتۇستىك قازاقستاندىق ارينا اليەۆا جالعان مالىمەت بەرگەنى ءۇشىن سايىستان شىعارىلىپ، ورنىنا باسقا ارۋ قاتىستىرىلعان.

يلاي دياگيليەۆ الماتىدا مودەل بولىپ جۇمىس ىستەيدى.

 

sputniknews