قازاقتىڭ «كوكجالى» شيانداعى جارىستا باس جۇلدەنى جەڭىپ الدى - شەتەلدەگى قازاق ءتىلدى ب ا ق- قا شولۋ
قىتاي عالىمدارى «جۇڭ جۇڭ» مەن «حۋا حۋا» اتتى ەكى مايمىلدى كلونداپ شىقتى - kazakcnr.com
شانحاي قالاسىنداعى عىلىم اكادەمياسىنىڭ جۇيكە عىلىمي- تەحنيكاسىن زەرتتەۋ ورتالىعىنىڭ قىزمەتكەرلەرى الەمدە تۇڭعىش رەت مايمىلدى كلونداۋ تاجىريبەسىن ءساتتى جۇزەگە اسىردى.
«بۇل دۇنيە ءجۇزى بويىنشا بيولوگيا عىلىمى سالاسىنداعى ەڭ كۇردەلى عىلىمي جوبالاردىڭ ءبىرى ەدى» دەپ جازادى قىتايدىڭ ورتالىق حالىق راديوسى پورتالى.
ءسويتىپ، ءساتتى تاجىريبەدەن كەيىن «جۇڭ جۇڭ» جانە «حۋا حۋا» ەسىمدى ەكى مايمىل دۇنيەگە كەلگەن.
«كلونداۋ تەحنيكاسىنىڭ دامىعانىنا تالاي جىل بولسا دا، ادام تەكتەس حايۋاناتتاردى كلونداۋ ماسەلەسى ءالى كۇنگە دەيىن شەشىلمەي كەلگەن ەدى. بەس جىل بويى سان رەتكى تاجىريبەدەن كەيىن، بۇل سىناق تابىستى ورىندالدى» ، دەپ تۇيىندەيدى kazakcnr.com پورتالى.
بايان الاگوزوۆا ۇلانباتىردا «قازاق ارۋى» بايقاۋىن ۇيىمداستىرماق - kaznews.mn
«قازاق ارۋى» حالىقارالىق بايقاۋىنا بيىلدان باستاپ قازاقستان رەسپۋبليكاسىنان سىرت موڭعوليا، تۇركيا، رەسەي، وزبەكستان جانە قىرعىزستاندا ىرىكتەۋ وتكىزىلىپ، اقتىق مارەدە باق سىنايتىن ۇمىتكەرلەر تاڭداپ الىنادى.
بۇل تۋرالى وسى اپتادا موڭعوليالىق kaznews.mn اقپاراتتىق پورتالى حابارلادى.
قازاقستاننىڭ بەلگىلى پروديۋسەرى بايان ماقسات قىزى ۇلانباتىر قالاسىندا 2018 -جىلى اقپاننىڭ 15-20 كۇندەرى «قازاق ارۋى» حالىقارالىق بايقاۋىن ۇيىمداستىرماق ەكەن. «قازاق ءتىلىن ەركىن مەڭگەرىپ، تاريح، مادەنيەت، سالت- ءداستۇردى بىلسەڭىز، سىمباتى مەن ءسانىڭىز، ونەر مەن دارىنىڭىز كەلىسسە، سىزگە «قازاق ارۋى» بولۋ مۇمكىندىگى زور» دەپ جازىلعان اتالعان اقپارات كوزىندە.
ىلە پەداگوگيكا ينستيتۋتى ىلە ۋنيۆەرسيتەتى بولىپ وزگەرەدى - جەنمين جيباو (People Daily)
قىتايداعى ىلە قازاق اۆتونوميالىق وبلىسىنىڭ ەڭ باستى جوعارى وقۋ ورىندارىنىڭ ءبىرى «ىلە پەداگوگيكا ينستيتۋتى» ەندى «ىلە ۋنيۆەرسيتەتى» دەپ اتالۋى مۇمكىن. بۇل تۋرالى قىتايدىڭ People Daily جاڭالىقتار پورتالى حابارلادى.
جەتپىس جىلدىق تاريحى بار وسى ج و و- دان سان مىڭداعان قانداسىمىز وقىپ، ءبىلىم العان. ويتكەنى، ىلە پەداگوگيكا ينستيتۋتىندا وسى كۇنگە دەيىن ارنايى قازاق تىلىندە وقىتىلاتىن فاكۋلتەت پەن عىلىمي زەرتتەۋ ورتالىقتارى بولعان.
اتالعان اقپارات كوزىنىڭ مالىمەتىنشە، قىتايدىڭ وقۋ- ءبىلىم مينيسترلىگى ىلە پەداگوگيكا ينستيتۋتىنىڭ اتاۋىن وزگەرتۋ قىزمەتىن 2018 -جىلى تەكسەرۋ كولەمىنە كىرگىزۋگە قوسىلعان. سەبەبى ج و و- نىڭ اتىن وزگەرتۋ جۇمىسى ەڭ سوڭعى كەزەڭگە جەتكەن.
ءى پ ي- دىڭ پارتكوم ءتوراعاسى نۇرجۇما جاقاي وقۋ ورنىنىڭ دارەجەسىن كوتەرۋ ءۇشىن تىڭعىلىقتى دايىندىق ۇستىندە ەكەنىن ايتقان.
«الداعى بىرنەشە جىلدىق قۇلشىنىس ارقىلى بولاشاق ىلە ۋنيۆەرسيتەتىن جەرگىلىكتى ەرەكشەلىگى بار، ۇزدىك، وقىتۋى جانە قوعامعا قىزمەت وتەۋى ساپالى، تەك شىنجاڭداعى عانا ەمەس، بۇكىل ەلىمىز بەن ورتالىق ازيادا ىقپالدى ۋنيۆەرسيتەت ەتىپ جاساپ شىعامىز»، دەيدى قازىرگى ينستيتۋت باسشىسى نۇرجۇما جاقاي.
ايتا كەتۋ كەرەك، 1948 -جىلى قۇرىلعان ءى پ ي ىلە قازاق اۆتونوميالىق وبلىسىنىڭ ورتالىعى قۇلجا قالاسىندا ورنالاسقان. شىنجاڭداعى ءار ۇلت حالقىنا، اسىرەسە قازاق ۇلتىنا ۇستازدار مەن ءار ءتۇرلى ماماندىق يەلەرىن دايىنداپ بەرۋدە ماڭىزدى مىندەت اتقارعان وقۋ ورىنى.
قازىرگى تاڭدا جالپى 11 فاكۋلتەت بار. باكالاۆرياتتا 34 ماماندىق، ال كاسىبي باعىتتا 12 ماماندىق قاراستىرىلعان. سونداي-اق، ەرەسەكتەردى وقىتۋ ينستيتۋتى، قازاق مادەنيەتىن زەرتتەۋ ينستيتۋتى، ورتالىق ازيا زەرتتەۋ ينستيتۋتى، اقىندىق ونەر زەرتتەۋ ورتالىعى سىندى ارنايى ينستيتۋت-ورتالىقتارى بار. 2006 -جىلى قاڭتاردا مەملەكەتتىك كەڭەستىڭ عىلىمي دارەجە القاسىنىڭ ۇيعارۋىمەن ءى پ ي ماگيسترلىك عىلىمي دارەجە بەرەتىن ورىندار قاتارىنا قوسىلدى. سونىمەن قاتار قىتاي از ۇلتتارى ءتىل- ادەبيەتى (تۇركى تىلدەرى)، ماتەماتيكا، فوتولوگيا عىلىمى سالالارىنىڭ ماگيسترلىك عىلىمي دارەجەلەرىن بەرۋ قۇقىعىنا دا يە بولدى.
موڭعوليالىق قانداسىمىز قازاقستاندىق كيكبوكسينگ شەبەرلەرىن رينگكە شاقىردى - kaznews.mn
كاسىپقوي كيكبوكستان موڭعوليانىڭ بىرنەشە دۇركىن چەمپيونى، الەم چەمپيوناتىنىڭ قولا جۇلدەگەرى يسلاماللابەك شاياحمەت ۇلى 65-70 كەلى سالماق دارەجەسىندە ونەر كورسەتەتىن قازاقستاندىق ارىپتەستەرىن رينگكە شاقىردى. بۇل تۋرالى وسى اپتادا kaznews.mn پورتالى حابارلاعان ەدى.
موڭعوليالىق كيكبوكسشى وسىلايشا، قازاقستاندىق ارىپتەستەرىمەن دە باعىن سىناپ كورمەك ەكەن.
«ونىڭ ايتۋىنشا، قازاقستاندا كيكبوكسينگ جاقسى دامىعان. سوندىقتان باعىمدى سىناپ كورگىم كەلەدى. قازاقستاندىق سپورتشىلار تاراپىنان ۇسىنىستار كەلىپ تۇسسە، شارشى الاڭدا جەكپە- جەك وتكىزۋگە دايىنمىن» دەپ جازادى ونىڭ ءسوزىن اتالعان اقپارات كوزى.
يسلاماللابەك شاياحمەت ۇلى وتكەن اپتادا ۇلانباتىر قالاسىندا موڭعوليانىڭ ۇزدىك كيكبوكسشىلارى اراسىندا وتكەن سايىستا ەكىنشى ورىن يەلەنگەن.
قازاقتىڭ «كوكجالى» شيانداعى جارىستا باس جۇلدەنى جەڭىپ الدى - kazakcnr.com
شياندا ەرەجەسىز جەكپە- جەكتەن 84 كەلى سالماق دارەجەسىندە ونەر كورسەتەتىن ەستاي تەمىر ۇلى (لاقاپ اتى «كوكجال») ىرىكتەۋ تۋرنيرىندە باس جۇلدەنى جەڭىپ الدى. ول وسىلايشا اقپاننىڭ 5-8 كۇندەرى قىتايدا وتەتىن الەمدىك جەكپە-جەككە جولدامانى قانجىعالاپ وتىر.
«ءبىزدىڭ باتىرىمىز ەستاي دودادا شەشەسى تىككەن ۇلتتىق كيىمدى كيىپ، سالاۋاتىن اسىرىپ، دۇشپاننىڭ ساعىن سىندىرارداي ايبارمەن شارشى الاڭعا كوتەرىلگەن ەدى»، - دەپ جازادى قىتايلىق kazakcnr.com الەۋمەتتىك جەلىسىندە.
بۇل الەۋمەتتىك جەلىنىڭ مالىمەتىنشە، ەستاي 2017 -جىلى تۋعان جەرى التايدان شيان قالاسىنا كەلىپ ەرەجەسىز جەكپە- جەك ونەرىن ۇيرەنىپ باستاعان.
2010 -جىلدان 2013 -جىلعا دەيىن ەستاي شىنجاڭ سپورت ينستيتۋتىنان ءبىلىم الىپ، 2011 -جىلى شىنجاڭدا وتكەن ەركىن كۇرەستەن، 2012 -جىلى تاعى دا شىنجاڭدا ءداستۇرلى كۇرەس جارىسىنان باس جۇلدەنى جەڭىپ الادى. جوعارى وقۋ ورنىن بىتىرگەننەن كەيىن ۇيىنە قايتىپ، ءبىراز ۋاقىت سپورتتان شەتتەپ قالادى.
ول ءار جولى تەلەديداردان ءوزى قىزىعاتىن ەرەجەسىز جەكپە-جەكتى كورگەن كەزدە ۇيىندە بايىزداپ وتىرا الماي كەتەدى ەكەن. ءبىر كۇنى اكە- شەشەسىنە ءوزىنىڭ وسىنداي سپورت تۇرىمەن شۇعىلدانعىسى كەلەتىنىن ايتادى. ءبىراق اتا- اناسى ونى قولدامايدى. تاۋداي ارمان ارقالاعان جاس ۇلان عالامتوردان ەرەجەسىز جەكپە- جەككە قاتىستى ماتەريالدار كورىپ، ءوز بەتىنشە ماشىقتانا باستايدى. كەيىن ارمانىنا جەتۋگە بەل بايلاپ، دوستارىنان قارىز اقشا الىپ، شيانعا اتتانادى.
شيانداعى كۇندەرى ءوز ويلاعانىنداي بىردەن ساتىنە باسپايدى، جاتتىعۋدان تىس ۋاقىتتارىندا قوسىمشا كاسىپ ىستەپ، اقشا تاۋىپ، جەكە تاربيەشىگە ۇسىنىس جاساعان. تاربيەشىسى ەستايعا رۋحاني دا، ەكونوميكالىق جاقتان دا كوپ كومەك كورسەتىپ، قولىنان كەلگەنشە جاردەم بەرگەن.
«مەن قاتتى نامىسشىل بولدىم، كەي كەزدەرى تاماق ىشۋگە اقشا جوق، اش قارىن جاتتىعۋ جاسايتىن ەدىم. وندايدا تاربيەشىم بىردەن سەزە قوياتىن دا «اقشاڭ بار ما، تاماق ءىشتىڭ بە؟» دەپ سۇرايتىن- دى. سول كەزدە باسقا ارىپتەستەرىمنىڭ كوز جانارى ماعان قادالعانداي سەزىنەتىنمىن دە، ىزىنشە اقشام بار، تاماق ءىشتىم دەي سالاتىن ەدىم. سولاي ايتامىن دەپ نەشە كۇن اش قالعان دا كەزدەرىم بولدى» دەپ اعىنان اقتارىلعان سپورتشىنىڭ ىشكى سىرىمەن بولىسەدى اتالعان اقپارات كوزى.
«2017 -جىلى اقپاننىڭ سوڭى، شيانداعى كەزىم، قالتامدا 800 يۋان اقشام عانا بار ەدى، سالماعىم 107 كەلى، ءساۋىردىڭ سوڭىندا اقشام تاۋسىلىپ، اش قالدىم، سونىڭ اسەرىنەن سالماعىم بىردەن 84 كەلىگە ءتۇستى، سوندا ەكى ايدا 23 كەلى سالماق تاستاعان ەكەنمىن. ونان دا قىزىعى، سپورتتىق مانسابىمداعى العاشقى ايقاسىم سول كەزگە تۋرا كەلمەسى بار ما. ءسويتىپ، شەشۋشى جەكپە- جەكتە ەكىنشى ورىندى مىسە تۇتتىم. ودان كەيىنگى 8 اي ىشىندە 3 رەت جارىسقا قاتىسىپ، 3 رەتىندە دە باس جۇلدەنى الدىم. وسىنداي ناتيجەمدى كورگەندە اكە- شەشەم قاتتى قۋاندى، قولداۋ كورسەتە باستادى. اياۋلى انام ماعان ارناپ ۇلتتىق كيىم تىگىپ بەردى. سول انام تىگىپ بەرگەن كيىمدى كيىپ، قىتاي چەمپيوناتىنا شىققاندا بويىمدى ءبىر ءتۇرلى كۇش بيلەپ تۇرعانداي سەزىندىم»، - دەيدى وتكەنىن ەسكە العان ەستاي.
«قازىر شىنجاڭعا قايتسام، ماڭايىمداعى ادامدار وزگەرىپ كەتكەندەي سەزەمىن. ءىس-جۇزىندە ولار ەمەس، مەن وزگەرىپ كەتىپپىن. بۇرىنعىداي كۇندىز جىلقى باعىپ، كەش بولسا بىرنەشە دوستارىممەن بىرگە قىدىرىپ، قۇر قيالعا سالىنىپ جۇرەتىن كۇندەرىمە قوش ايتتىم. سەبەبى ءقازىر مەن كاسىبي سپورتشىمىن، مەندە ارمان بار، ارمانىما جەتۋ ءۇشىن تىنباي تالاپتانامىن!» دەگەن «كوكجالدىڭ» قورىتىندى ويىمەن تۇيىندەيدى ماقاللانى اقپارات كوزى.
ەردوعان نازاربايەۆپەن تەلەفون ارقىلى سويلەستى - trt.net.tr
پرەزيدەنت رەجەپ تايىپ ەردوعان قازاقستان پرەزيدەنتى نۇرسۇلتان نازاربايەۆپەن تەلەفون ارقىلى سويلەستى. بۇنداي اقپارات وسى اپتادا تۇركيا راديو جانە تەلەديدار پورتالىندا حابارلانعان بولاتىن.
مەملەكەت باسشىلارى ەكى ەل اراسىنداعى قارىم- قاتىناستار، سيرياداعى جاعداي جانە حالىقارالىق تاقىرىپتاردى تالقىلادى.
«ەردوعان مەن نازاربايەۆ، سونىمەن قاتار، تۇركىتىلدەس مەملەكەتتەر ىنتىماقتاستىق كەڭەسىنىڭ ناۋرىز ايى ىشىندە وتكىزىلەتىن كەزەكتەن تىس جينالىسىنىڭ ۇيىمداستىرىلۋىنا بايلانىستى پىكىر الماستى. پرەزيدەنت رەجەپ تايىپ ەردوعان نازاربايەۆتى قازاقستان مەن تۇركيا اراسىنداعى جوعارعى دەڭگەيدەگى ىنتىماقتاستىق كەڭەسىنىڭ انكارادا وتەتىن كەزەكتەن تىس جينالىسىنا شاقىردى» دەپ جازادى تۇركيالىق اقپارات كوزى.
قازاقستان تەرروريزممەن كۇرەستى كۇشەيتپەك - «فارس» اقپاراتتىق اگەنتتىگى
قازاقستان ۇكىمەتى الداعى بەس جىلدا ەلدە ەكسترەميزم جانە تەرروريزممەن كۇرەس تۋرالى مەملەكەتتىك باعدارلامانى جۇزەگە اسىرۋ ءۇشىن شامامەن 900 ميلليون دوللار قاراجات بولەدى. بۇل تۋرالى وسى اپتادا يراندىق باسىلىم ورتالىق ازيانىڭ اقپاراتتىق پورتالدارىنا سىلتەمە جاساي وتىرىپ حابارلاعان بولاتىن.
«ورتالىق ازيانىڭ اقپاراتتىق پورتالدارى سارسەنبى كۇنى قازاقستاندا ەكسترەميزم جانە تەرروريزممەن كۇرەس ءۇشىن مەملەكەتتىك باعدارلاما جوباسىنىڭ دايىندالعانىن حابارلادى. اتالمىش جوبا تۋرالى اشىق كەلىسسوزدەر قازاقستان پارلامەنتىندە اقپان ايىنىڭ 6-نا دەيىن جالعاسادى. قازاقستان ۇكىمەتى ەكسترەميزم جانە تەرروريزممەن كۇرەس باعدارلاماسىن جالپى بيۋدجەت پەن باسقا دا زاڭدىق قورلار ارقىلى قامتاماسىز ەتۋدى كوزدەۋدە» دەپ جازدى parstoday.com.
اۆتورى بەيسەن سۇلتان ۇلى
