قانات يسلام مەن دانەليا تولەشوۆا «حالىقتىڭ سۇيىكتىسى» سىيلىعىمەن ماراپاتتالدى - فوتو

استانا. قازاقپارات - استانادا ءداستۇرلى «حالىقتىڭ سۇيىكتىسى» ۇلتتىق جۇلدەسىنىڭ جەڭىمپازدارى ماراپاتتالدى، دەپ حابارلايدى «قازاقپارات» ح ا ا ءتىلشىسى.

جەتىنشى رەت ۇيىمداستىرىلىپ وتىرعان بۇل بايقاۋ تانىمال قازاقستاندىق تۇلعالار مەن ۇيىمداردى انىقتاۋدى كوزدەيدى جانە قازاقستاندىقتار ادەتەگىدەي، ۇزدىك دەپ تاپقان تۇلعالارعا ينتەرنەت ارقىلى داۋىس بەردى.

ماراپاتتاۋ كەشىندە «ۇزدىك ۇستاز» نوميناتسياسى بويىنشا ءۇش ۇستاز جەڭىمپاز دەپ تانىلدى - ق ر ب ع م رەسپۋبليكالىق وقىتۋ- ادىستەمەلىك ورتالىعىنىڭ ديرەكتورى رايسا شەر، استاناداعى وقۋشىلار سارايىنىڭ ديرەكتورى ۇمسىن ارقابايەۆا جانە استاناداعى №54 -مەكتەپ- گيمنازياسىنىڭ قازاق ءتىلى مەن ادەبيەتى ءپانىنىڭ مۇعالىمى رايا كەلەس قىزى ماراپاتتالدى.

 

«ۇزدىك دارىگەر» اتالىمى بويىنشا ەكى دارىگەر - الماتىلىق حيرۋرگ- ماممولوگ، ق ر ماممولوگتارى مەن راديولوگتارى باسقارماسىنىڭ ءتوراعاسى شىنار تالايەۆا جانە استانالىق حيرۋرگ، مەديتسينا قىزمەتىنىڭ پولكوۆنيگى ەرجان شاياحمەتوۆ ماراپاتتالدى.

 

«ۇزدىك پارلامەنتاري» اتالىمىندا - ق ر پارلامەنتىنىڭ دەپۋتاتى زاعيپا باليەۆا، «ۇزدىك قوعام قايراتكەرى» بويىنشا - «ۇلى دالا قىراندارى» ۇلتتىق قوزعالىسىنىڭ ءتوراعاسى سادىبەك تۇگەل ۇزدىك دەپ تانىلدى. «مەن ءۇشىن قازاقستان حالقىنا قىزمەت ەتۋ ۇلكەن ابىروي. مەنىڭ بۇل بايقاۋعا قاتىسۋىمدى سۇراپ، سايتقا جازعان بالالارعا ۇلكەن راحمەت»، - دەدى زاعيپا باليەۆا.

 

«ۇزدىك فەرمەر» اتانعان ارال بالىق وڭدەۋ زاۋىتىنىڭ باسشىسى امانباي ەرحاتوۆ «حالىق سۇيىكتىسى» مۇسىنشەسىمەن جانە «اتامەكەن» ۇكپ توسبەلگىسىمەن ماراپاتتالدى. «ۇزدىك بيزنەسمەن» نوميناتسياسىندا استانالىق «Jeff Tailor» تىگىن ءۇيىنىڭ يەسى گاۋحار وتەلبايەۆا جانە «ۇزدىك fashion مايتالمانى» اتالىمىندا - «Bibisara» برەندىنىڭ ديزاينەرى اسەم التىنبەكوۆا جەڭىمپاز اتاندى.

 

«ۇزدىك سپورتشى» جۇلدەسىمەن كاسىپقوي بوكسشى قانات يسلام جانە «ۇزدىك سپورتشى ارۋ» جۇلدەسىمەن - كاسىپقوي بوكسشى، بوكستان الەم چەمپيونى فيرۋزا ءشارىپوۆا ماراپاتتالدى. «ۇزدىك سپورتشى دەپ تانىلعانىمدى ماقتان تۇتامىن. ەلىمىزدىڭ يميدجىن الەمدىك ارەنادا اسقاقتاتۋ - مەن ءۇشىن ۇلكەن ابىروي. راحمەت»، - دەدى ءشارىپوۆا.

 

سونداي-اق، ماراپاتتاۋ كەشىندە بەلگىلى رەجيسسەر اقان ساتايەۆ «ۇزدىك كينو قايراتكەرى» اتانسا، ساياساتتانۋشى ايدوس سارىم مەن الەۋمەتتانۋشى زارەما شاۋكەنوۆاعا «ۇزدىك پۋبليتسيست» سىيلىعى تابىستالدى.

ۇلتتىق سىيلىقتى تابىستاۋ راسىمىندە ب ا ق سالاسىنىڭ وكىلدەرى دە نازاردان تىس قالعان جوق. «QAZAQSTAN» تەلەارناسىنىڭ جۋرناليسى دانا نۇرجىگىت «جىل تەلەجۇرگىزۋشىسى»، Tengrinews.kz - ۇزدىك اقپارات پورتالى اتاندى.

 

ينتەرنەتتە بەلسەندىلىگىمەن كوزگە تۇسكەن زاڭگەر ايگۇل ورىنبەككە «بلوگوسفەرا كوشباسشىسى» سىيلىعى بەرىلدى. ال «ناگيمۋشا» لاقاپ اتىمەن تانىمال ناعيما احمەتوۆا «جىلدىڭ ۇزدىك ۆاينەرلەرى» اتالىمىندا ۇزدىك دەپ تانىلدى.

 

 سونداي-اق، ۇلتتىق سىيلىق كەڭەسى ءبىرقاتار قۇرمەتتى نوميناتسيالارمەن ماراپاتتاۋدى ءجون كوردى. وسىلايشا، ۋكراينانىڭ «گولوس. دىتي» ءان بايقاۋىندا جەڭىسكە جەتكەن قازاقستاندىق دانەليا تولەشوۆا «جىل قۇرمەتتىسى» اتاندى. «جىل جاڭالىعى» - «Qazaqstan» تەلەارناسىنا، «تابىس پەن دامۋ» - «ق ر ۇلتتىق پاراليمپيادا كوميتەتىنە»، «جىل مەتسەناتى» - كەڭەس وداعىنىڭ باتىرى ساعادات نۇرماعامبەتوۆ اتىنداعى قايىرىمدىلىق قورىنىڭ پرەزيدەنتى ماحمۇت نالىبايەۆكە جانە «التىن ءداۋىر» قۇرمەتتى نوميناتسياسى - تانىمال اقىن ءشومىشباي ساريەۆكە بەرىلدى.

 

ايتا كەتەيىك، Rixos President Astana قوناق ۇيىندە VII «حالىقتىڭ سۇيىكتىسى» ۇلتتىق سىيلىعى جەڭىمپازدارىن ماراپاتتاۋ كەشى ءوتتى. 15 نەگىزگى نوميناتسيا بويىنشا 150 ۇمىتكەر ىرىكتەلىپ الىندى جانە 20 جەڭىمپاز ماراپاتتالدى. سىيلىق 2011 -جىلدان باستاپ بەرىلىپ كەلەدى جانە قازاقستانداعى تانىمال كوممەرتسيالىق ەمەس جۇلدەلەردىڭ بىرىنە اينالدى.

 

ماراپاتتاۋ سالتاناتىنان كەيىن قايىرىمدىلىق اۋكسيونى ءوتتى. وندا بۇگىنگى لاۋرەاتتار بەينەلەنگەن شارج سۋرەتتەر ساتىلىمعا شىعارىلدى. اۋكسيوندا فيرۋزا ءشارىپوۆا ءوز پورترەتىن 1000 ا ق ش دوللارىنا ساتىپ الدى. اۋكسيوننان تۇسكەن قاراجات قاتەرلى ىسىك اۋرۋىمەن كۇرەسىپ كەلە جاتقان 6 جاسار ايىمجاننىڭ ەمىنە بەرىلەدى.