اتىراۋدا بالىق اۋلايتىن مەكەمەلەرگە باقىلاۋ كۇشەيەدى

 استانا. قازاقپارات - وبلىستىق اۋماقتىق ورمان شارۋاشىلىعى جانە جانۋارلار الەمى ينسپەكتسياسى بالىق اۋلايتىن كووپەراتيۆتەردىڭ كۇزگى ماۋسىمدا ءليميتتى يگەرۋلەرى ءۇشىن شارا قولداندى.

 بۇل تۋرالى قازاقپارات اتىراۋ وبلىستىق وڭىرلىك كوممۋنيكاتسيالار قىزمەتىنە سىلتەمە جاساپ حابارلايدى.

 ​اتىراۋ وبلىسىنىڭ اكىمى نۇرلان نوعايەۆتىڭ توراعالىعىمەن وتكەن بالىق شارۋاشىلىعىن دامىتۋ ماسەلەسىنە ارنالعان كوشپەلى جينالىستا وبلىستىق اۋماقتىق ورمان شارۋاشىلىعى جانە جانۋارلار الەمى ينسپەكتسياسىنىڭ باسشىسى دانيار بايماعامبەتوۆ كۇزگى بالىق اۋلاۋ ماۋسىمىندا بارلىق سۋ ايدىندارى مەن بالىق قابىلداۋ بولىمشەلەرى قاتاڭ باقىلاۋدا بولعانىن ايتتى. سونىڭ ناتيجەسىندە بالىق شارۋاشىلىعى سۋبەكتىلەرىنىڭ كۆوتانى يگەرۋى سوڭعى 8 جىلدا العاش رەت% 87,3 - كە جەتتى.

​اتىراۋ وبلىسى اكىمىنىڭ قاتىسۋىمەن قۇرمانعازى اۋدانىندا وتكەن ايماقتاعى بالىق شارۋاشىلىعىن دامىتۋ پروبلەمالارىنا ارنالعان كوشپەلى جينالىستا وسىنداي مالىمەتتەر ايتىلدى.

 ​«العا قاراي دا براكونەرلىكپەن كۇرەستى ءتيىمدى جۇرگىزۋ ءۇشىن بالىق اۋلاۋعا مەملەكەتتىك باقىلاۋ مەحانيزمىن جەتىلدىرىپ، زاڭسىز بالىق اۋلاۋشىلاردى ەركىمەن جىبەرەتىن امال- ايلالاردى قۇرىقتاۋ كەرەك. سالادا «بولماشى» كۆوتامەن ءجۇرۋ سەكىلدى ۇيىمداستىرۋشىلىق- قۇقىقتىق پروبلەمالار تۋرالى ايتىپ وتىرمىن. ەكى جىل قاتارىنان كۆوتانىڭ% 50 ىن يگەرمەگەندەرگە قايتىپ مۇنداي مۇمكىندىك بەرمەۋ كەرەك» ، - دەدى دانيار بايماعامبەتوۆ.

​اتىراۋ وبلىسىنىڭ اكىمى نۇرلان نوعايەۆتىڭ ايتۋىنشا، ءقازىر رەسمي اۋلانعان بالىق كولەمى 10 مىڭ توننا بولىپ وتىر، ال بەيرەسمي مالىمەت بۇدان كوپ ەكەنى ءسوزسىز.

​«مەن كووپەراتيۆتەردىڭ زاڭسىز بالىق اۋلاۋدى قولداپ وتىرعانىن ناقتى ايتا الامىن. سىزدەر زاڭدى قاتايتۋ كەرەك دەيسىزدەر، ءبىراق براكونەرلەردىڭ قىلمىستىق جولمەن اۋلاعان بالىقتارىن قابىلدايسىزدار. بۇلاي بولمايدى. جاۋاپتى ادامدار ايماقتاعى بارلىق بالىق اۋلايتىن مەكەمەلەرگە باقىلاۋدى كۇشەيتۋلەرى قاجەت» ، - دەدى نۇرلان نوعايەۆ.

​ايماق باسشىسى براكونەرلەردەن تاركىلەنگەن كولىك قۇرالدارىنا قاتىستى ماسەلە ءالى كۇنگە دەيىن زاڭدى تۇرعىدا رەتتەلمەگەنىنە توقتالدى. جينالىس بارىسىندا تاركىلەنگەن كولىكتەردى زاڭسىز دەپ تاۋىپ، جويۋ تۋرالى ماسەلە قارالدى.

​ايتا كەتەيىك، وتكەن جىلى سۋ پوليتسياسى مەن وبلىستىق اۋماقتىق ورمان شارۋاشىلىعى جانە جانۋارلار دۇنيەسى ينسپەكتسياسى ەكى مىڭنان استام زاڭ بۇزۋشىلىقتى انىقتاعان، 125 قىلمىستىق ءىس جۇرگىزىلىپ، 35 ميلليون تەڭگەگە جۋىق ايىپپۇل تولەندى. زاڭسىز اينالىمنان 107 توننا بالىق الىندى، ونىڭ 2 735 تونناسى بەكىرە تۇقىمداس بالىقتار.