تويدا ىشىمدىك ءىشىپ، تۇندە كوشەدە جۇرگەندەرگە ايىپپۇل سالىنادى

 استانا. قازاقپارات - تۇرىكمەنستاندا پوليتسەيلەر تويدا ىشىمدىك ىشكەن ازاماتتاردى بولىمشەگە الىپ كەتىپ، كەيىن ايىپپۇل تولەتىپ جاتىر.

مەملەكەتتەگى ءارتۇرلى ءۋالاياتتان پوليتسيا قىزمەتكەرلەرىنىڭ توي زالدارىنىڭ الدىندا ارنايى كولىكپەن وتىراتىندارى تۋرالى حابار كەلىپ ءتۇسىپ جاتىر. ولار ىشىمدىككە ماس بولعان قوناقتاردى ەسىكتەن شىعىپ كەلە جاتقان كەزدە ۇستاپ الىپ، كەيىن كولىككە وتىرعىزىپ اكەتەدى. ايتۋلارىنشا، ەندى «قوعامدىق ءتارتىپتى بۇزعان» ءار ازامات 50 مانات كولەمىندە ايىپپۇل تولەيدى.

«بىرنەشە كۇن بۇرىن لەباپسكي ءۋالاياتىنداعى «دوۆرەباپ» بانكەت زالىندا وسىنداي جاعداي بولدى. ۇيلەنۋ تويى بىتكەن سوڭ تەمىرجولدا جۇرگىزۋشى بولىپ جۇمىس ىستەيتىن قۇرداسىمدى پوليتسيا قىزمەتكەرلەرى الىپ كەتتى. قوناقتاردىڭ مەيرامحانادان شىققان بەتى سول بولاتىن» ، - دەيدى توي قوناقتارىنىڭ ءبىرى.

باسقا باسىلىمداردىڭ مالىمەتىنشە، پوليتسيا قىزمەتكەرلەرىنە بيۋدجەتتى تولتىرۋ ءۇشىن وسىنداي تاپسىرما بەرىلگەن. ءتىپتى، كوبىرەك ايىپپۇل جازۋ دا تاپسىرىلعان. 500 قوناق كەلەتىن تويلار - پوليتسيا قىزمەتكەرلەرى ءۇشىن تاپتىرماس ولجا ەكەنى انىق.

مۇنىمەن قاتار، ۇيىنە 22:00 دەن كەشىگىپ كەلگەن ادامدارعا دا ايىپپۇل سالىنادى. كوپ جىلدان بەرى پوليتسەيلەر تۇندە كوشەدە جۇرگەن ادامداردى بولىمشەگە الىپ كەتىپ، كەيىن ايىپپۇل تولەتەدى. سوڭعى ايلاردا تۇندە كوشەدە جۇرگەن ادامدارعا 50-100 مانات كولەمىندە ايىپپۇل سالىنىپ ءجۇر.

 

Baq.kz