دميتري مەدۆەديەۆ الماتىداعى جەر سىلكىنىسىنە قاتىستى ءازىل ايتتى

الماتى. قازاقپارات - رەسەي ۇكىمەتىنىڭ باسشىسى دميتريي مەدۆەديەۆ الماتىداعى جەر سىلكىنىسىنە قاتىستى ازىلدەدى، دەپ حابارلايدى قازاقپارات ءتىلشىسى.

بۇگىن ەۋرازيالىق ۇكىمەتارالىق كەڭەستىڭ كەزەكتى وتىرىسىندا دميتري مەدۆەديەۆ الماتىدا بولعان جەر سىلكىنىسىن قۇدايدىڭ جىبەرگەن بەلگىسى دەپ ازىلدەدى.

«بەلارۋس رەسپۋبليكاسى ۇكىمەتىنىڭ №666- قاۋلىسىنا قاتىستى ماسەلەنى تالقىلاۋ ۇستىندە جەر سىلكىندى. ارينە، بۇعان قاتىستى ءارتۇرلى نارسەنى ويلاۋعا بولادى. بەلارۋس ەلى ءۇشىن قۇدايدىڭ بەلگىسى (كۇلدى - رەد) . دەگەنمەن، بارلىق قۇجاتتارىمىزدى قاراستىرىپ، بارلىعىنا قول قويىپ ءساتتى اياقتادىق»، - دەدى رەسەي ۇكىمەتىنىڭ باسشىسى الماتىدا وتكەن جيىندى.

سونداي- اق، ول جيىن بارىسىندا ەاەو- نىڭ بيىلعى جىلعى ستراتەگيالىق مىندەتتەرىنە توقتالدى.

 «ەكونوميكالىق اۋحال، وداق ينستيتۋتتارىن دامىتۋ بويىنشا 2017 -جىلدى جالپى ناتيجەلى بولدى دەپ باعالايمىز. ەاەو اياسىندا ماكروەكونوميكالىق كورسەتكىشتەرىمىز ساپالى دەڭگەيدە. ەلدەرىمىز اراسىنداعى تاۋار اينالىمى بولجام بويىنشا 27 پايىزعا ءوستى. بيىل رەسەي ەاەك ورگاندارىنا ءتوراعالىق ەتەدى. ءبىزدىڭ جۇمىس باعىتتارىمىزدى 2018 -جىلدىڭ 18 - قاڭتارىندا پرەزيدەنتىمىز (ۆ. پۋتين - رەد) جاريالادى. وندا قىسقاشا ايتقاندا، وداق الدىندا تۇرعان ستراتەگيالىق مىندەتتەردى جۇزەگە اسىراۋ ماڭىزدى ەكەنى كورسەتىلگەن. ول ءۇشىن ءبىزدىڭ نارىقتاعى كەدەرگىلەردى جويۋ قاجەت. ول ماسەلەنى جاڭا شاعىن توپتىڭ وتىرىسىندا تالقىلادىق. تاۋار مەن قىزمەت تۇرلەرىنىڭ ءبىرىڭعاي نارىعىن قۇرۋ قاجەت. 2017 -جىلى 10 كەدەرگىنى جويا الدىق. ءالى دە، بيزنەس، كەدەن، ترانسپورت سالاسى بويىنشا كەدەرگىلەر بار. ساراپشىلاردىڭ كەدەرگىلەردى جويۋ توبى بەلسەندى جۇمىسىن جالعاستىرۋى قاجەت»، - دەدى د. مەدۆەديەۆ.

سونداي- اق، ول بيىلعى جىلدىڭ باسىنان باستاپ، وداقتىڭ ماڭىزدى قۇجاتى - جاڭا كەدەن كودەكسى ىسكە قوسىلعانىن ەسكە سالىپ، كودەكس بويىنشا مىندەتتەردى تەزىرەك اياقتاۋدى سۇرادى.

جيىن سوڭىندا ۇكىم باسشىلارى ەاەو- عا مۇشە مەملەكەتتەردىڭ اۋماعىندا تاۋار اينالىمىن باقىلاۋدى ارتتىرۋعا باعىتتالعان ەاەو- دا تاۋارلاردى سايكەستەندىرۋ قۇرالدارىمەن تاڭبالاۋ كەلىسىمىنە قول قويدى.

اۆتور: الماس مۇقاش ۇلى