قازاقستاندا ءبىرجان ارياسىن ورىندايتىن تەنور- ءانشى جوق - الپيەۆ

استانا. قازاقپارات - «استانا وپەرا» مەملەكەتتىك وپەرا جانە بالەت تەاترى ديرەكتورىنىڭ ءبىرىنشى ورىنباسارى تولەۋبەك الپيەۆ قازاقستان وپەراسىنداعى كادرلىق جەتىسپەۋشىلىك ماسەلەسىن كوتەردى، دەپ حابارلايدى قازاقپارات ءتىلشىسى.

تولەۋبەك الپيەۆتىڭ ايتۋىنشا، قازاقستاندا «ءبىرجان- سارا» وپەراسىنداعى ءبىرجان اريالارىن ورىنداي الاتىن تەنور- ءانشى جوق.

«وكىنىشكە قاراي، قازاقستاندا ءبىرجاندى سومداي الاتىن تەنور داۋىس جوق. وتكەن عاسىردا الماتىداعى اباي تەاترىندا اعالارىمىز بولاتىن، ال قازىر ءبىرجاندى حالىقارالىق دەڭگەيدە كورسەتەتىن ادام جوق. سەبەبى، ءبىرجاننىڭ پارتياسى - «ايداداعى» رادامەستەن، «توسكاداعى» كاۆرادوسسيدان كەم تۇسپەيتىن وتە قيىن پارتيا. سوندىقتان دا، ءبىرجاندى، كاۆارادوسسيدى، رادامەستى سومدايتىن درامالىق تەنور يەلەرىن وزگە ەلدەردەن شاقىرىپ ءجۇرمىز. قازاقستاندا باريتوندار جەتەرلىك، تالعات مۇسابايەۆ، سۇندەت بايعوجين، شىبىقبايەۆتار بار. سوپرانو دا كوپ، ءبىراق بولاشاقتا ماسەلەن، «قارعانىڭ ماتكەسىندەگى» گەرمانن پارتياسىن ورىنداۋعا قاۋقارى جەتەتىن تەنورلار جوق. بۇل - كادرلىق ماسەلە»، - دەدى الپيەۆ و ك ق- دا «رۋحاني جاڭعىرۋ» باعدارلاماسىن جۇزەگە اسىرۋداعى تەاترلار قىزمەتىنە ارنالعان باسپا ءسوز ءماسليحاتىندا.

تەاتر وكىلى تەنور- ورىنداۋشىلاردىڭ بار ەكەنىن، ءبىراق ولاردىڭ ءبىرجان ءرولى ءۇشىن تىم جاس ەكەنىن باسا ايتتى.

«ءبىرجان پارتياسى سونداي قىزىق، سونداي كوركەم جانە وتە كۇردەلى ەتىپ جازىلعان. وندا ءبىرجان تاعدىرىنداعى شيەلەنىستى كورسەتەتىن جوعارى جانە تومەنگى نوتالار كوپ. ارينە، جاس ورىنداۋشىلار بار، ولار نوتانى ورىنداپ بەرۋى مۇمكىن، ءبىراق ودان ءبىرجاننىڭ قاسىرەتىن، ءانشى، كومپوزيتور، ازامات رەتىندەگى بەينەسىن كورە المايمىز. بۇل دا «اباي» وپەراسى ءتارىزدى، 20 جاستا ابايدى سومداۋ مۇمكىن ەمەس قوي. ءبىرجان وبراز ءۇشىن ومىرلىك تاجىريبە، ۆوكالدىق- مۋزىكالىق مۇمكىندىكتەر جانە ەرەكشە دارىن كەرەك»، - دەدى ول.

سونداي- اق، تەاتر وكىلى مۇقان تولەبايەۆتىڭ «ءبىرجان- سارا» وپەراسىنا اۆتوردىڭ ءوزى جازعان بىرنەشە اريانىڭ ەنبەي قالعانىن ايتتى.

 «تۋىندىنى زەرتتەي كەلە، تولەبايەۆتىڭ ءوزى جازعان كەيبىر ءبىرجان اريالارىنىڭ وپەراعا ەنبەي قالعانىن بايقادىق. وعان سەنزۋرا سەبەپ بولۋى مۇمكىن. «تەمىرتاس» تا قوسىلماپتى. قازىر ءتۇپنۇسقانى الىپ، تولەبايەۆ جازعان كەيبىر مۋزىكالىق ەپيزودتاردىڭ سوڭعى پارتيتۋراعا نە سەبەپتى ەنبەي قالعانىن انىقتاپ جاتىرمىز. وپەراعا كوپتەگەن تەاتر قايراتكەرلەرىنىڭ ۇسىنىسىمەن جاس رەجيسسەر اسحات ماەميروۆتى شاقىردىق. ول سوربوننادا ءبىلىم العان، وتە بىلىكتى مامان. قازىر دايىندىق جۇمىستارى ءجۇرىپ جاتىر»، - دەپ ءوز ءسوزىن تۇيىندەدى تولەۋبەك الپيەۆ.

 بۇعان دەيىن ءبىرجان وبرازىن رەسەيدىڭ ەڭبەك سىڭىرگەن ءارتىسى، تاتارستاننىڭ حالىق ءارتىسى احمەت اعادي، قىرعىزستاننىڭ ەڭبەك سىڭىرگەن ءارتىسى سادىربەك جۇماشيەۆ جانە قازاقستاندىق مەيىر باينەشوۆ سومداپ كەلگەن بولاتىن.

«استانا وپەرا» تەاترىنىڭ باسپا ءسوز قىزمەتىنىڭ حابارلاۋىنشا، اسحات ماەميروۆ رەجيسسەرلىك ەتەتىن جاڭا «ءبىرجان- سارا» وپەراسىنىڭ پرەمەراسى 2018 -جىلدىڭ ناۋرىز- ءساۋىر ايلارىنا جوسپارلانعان.

اۆتور: ايجان سەرىكجان قىزى