ۇلتتىق «قىز جىبەك» وپەراسى زامانعا ساي وزگەرتىلدى
دەپ حابارلايدى قازاقپارات ءتىلشىسى.
تەاتر وكىلى ەكسپو-2017 كورمەسى كەزىندە تانىمال «قىز جىبەكتىڭ» جاڭا نۇسقاسى قويىلعانىن جانە وعان ەلەۋلى وزگەرىستەر ەنگىزگەنىن اتاپ ءوتتى.
«قىز جىبەك» العاش رەت 1934 -جىلى قويىلعان. ياعني، سوتسياليزم زامانىنىڭ سپەكتاكلى. نوتالارعا كەلسەك، سول كەزدەگى وركەستردە 34 ادام عانا بولعان. سوندىقتان، پارتيتۋرانى وزگەرتىپ، رەداكسيالادىق. ەكىنشىدەن، ۇلتتىق وپەرا دەپ اسپەتتەگەن تۋىندىلارىمىزدا قوبىزدىڭ، دومبىرانىڭ نەمەسە شەرتەردىڭ ءۇنى جوق بولىپ شىقتى. مىسالى، شەگە ءوز تەرمەسىن ورىنداعاندا، ونى سيمفونيالىق وركەستر عانا سۇيەمەلدەيدى، دومبىرا جوق. وسىلايشا، رەجيسسەر اسحات ماەميروۆتىڭ ۇسىنىسىمەن سيمفونيالىق وركەسترگە ۇلتتىق اسپاپتاردى قوسىلدى جانە سپەكتاكلدىڭ بوياۋى قانىق بولا ءتۇستى»، - دەدى ت. الپيەۆ و ك ق- دا «رۋحاني جاڭعىرۋ» باعدارلاماسىن جۇزەگە اسىرۋداعى تەاترلار قىزمەتى تۋرالى باسپا ءسوز ءماسليحاتىندا.
سونداي- اق، ت. الپيەۆ سپەكتاكل قويۋداعى تەحنولوگيا ماسەلەسىنە دە ءجىتى ءمان بەرۋدىڭ ماڭىزدىعىن ايتتى.
«قىز جىبەك»، «اباي»، «ءبىرجان سال» سىندى كەز كەلگەن ۇلتتىق وپەرانى قاراساڭىز، ساحناعا كيىز ءۇيدى عانا شىعارادى. ءبىزدىڭ سارايشىق، سىعاناق، تۇركىستان، وتىرار دەگەن كونە قالالارىمىز بار عوي. بوزوق دەگەن قىپشاقتاردىڭ ورداسى بولدى. نەگە سونى كورسەتپەيمىز دەپ، قىز جىبەكتىڭ اۋىلى رەتىندە كونە قالالاردى كورسەتتىك، بازاربايدىڭ سارايىن كورسەتتىك»، - دەدى ول.
«ۇلتتىق وپەراداعى ەڭ باستى نارسە - ىزدەنۋ. وتكەن عاسىردا سەنزۋرادان وتپەي قالعان تىڭ ەپيزودتار بولسا، قوسۋ قاجەت. كورەرمەندەر دە وزگەرىپ جاتىر، ولار تەلەديداردان ءتۇرلى شوۋلاردى كورەدى. سوعان ساي دۇنيە ۇسىنعان ءجون. قاجەت بولسا شەت ەلدەردەن رەجيسسەرلەر مەن بالەتمەيستەرلەردى شاقىرىپ، رەپەرتۋاردى قالىپتاستىرۋ كەرەك»، - دەدى تولەۋبەك الپيەۆ.
بۇعان دەيىن تولەۋبەك الپييەۆ قازاقستاندا «ءبىرجان- سارا» وپەراسىنداعى ءبىرجان اريالارىن ورىنداي الاتىن تەنور- ءانشىنىڭ جوق ەكەنىن ايتقان ەدى.
اۆتور: ايجان سەرىكجان قىزى
