وتكەن جىلى قازاقستان ەكونوميكاسى ايتارلىقتاي ءوستى - باقىتجان ساعىنتايەۆ

الماتى. قازاقپارات - الماتىدا ەۋرازيالىق ۇكىمەتارالىق كەڭەستىڭ كەزەكتى وتىرىسى ءوتىپ جاتىر، دەپ حابارلايدى قازاقپارات ءتىلشىسى.

 ق ر پرەمەر- ءمينيسترى باقىتجان ساعىنتايەۆ بيىلدان باستاپ، ەاەك قۇرىلىمدارىنا ءتوراعالىق ەتەتىن رەسەيگە ساتتىلىك تىلەدى.

ءوز كەزەگىندە رەسەي ۇكىمەتىنىڭ باسشىسى دميتري مەدۆەديەۆ بۇگىنگى جيىندى جوعارى دەڭگەيدە ۇيىمداستىرعانى ءۇشىن العىس ءبىلدىردى.

 «ينتەگراتسيالىق بىرلەستىكتەردە رەسەيدىڭ ءتوراعالىعى تابىستى ءارى جوعارى دەڭگەيدە ءوتىپ جاتىر. وسىعان وراي، ەۋرازيالىق ەكونوميكالىق كەڭەس ورگاندارىنداعى ءتوراعالىعىنا ساتتىلىك تىلەيمىن»، - دەدى ق ر ۇكىمەت باسشىسى.

 «2017 -جىلى قازاقستان ەكونوميكاسى ايتارلىقتاي ءوستى. الدىن الا بولجام بويىنشا، ەلىمىزدىڭ ەكونوميكاسى 4 پايىزعا ارتتى. 2017 -جىلدىڭ قاڭتارى مەن قاراشا ايلارى ارالىعىندا ەاەك ەلدەرىمەن قازاقستاننىڭ تاۋار اينالىمى 2016 -جىلدىڭ سايكەس كەزىڭىمەن سالىستىرعاندا 28 پايىزعا ءوسىپ، 15,60 ميلليارد دوللارعا جەتتى. بۇل كورسەتكىش ودان ءارى ارتاتىنىنا سەنەمىن. سيفرلى كۇن تارتىبىن جۇزەگە اسىرۋدى، ينتەگراتسيالىق باستامالارعا ءىرى، شاعىن جانە ورتا بيزنەستى تارتۋدى قولدايمىز. سونىمەن قاتار، «ەركىن ساۋدا ايماعىن» قۇرۋ ماقساتىندا وزگە ەلدەرمەن ىنتىماقتاستىقتى ماڭىزدى دەپ سانايمىز. اتاپ ايتقاندا، سينگاپۋر، يزرايل، قىتاي، يرانمەن بايلانىستى ماڭىزدى دەپ سانايمىز»، - دەدى باقىتجان ساعىنتايەۆ.

ق ر ۇكىمەت باسشىسى كەدەن راسىمدەرىن اۆتوماتتاندىرۋ ماسەلەسىنە توقتالدى.

 «مىسالى، ءبىرتۇتاس كەدەندىك قىزمەت اياسىندا ەكسپورت بويىنشا كەدەندىك دەكلوراتسياعا بايلانىستى ينتەگراتسيا جوق. ماسەلەن، تەمىرجول ترانسپورتىن ۋاقىتشا ەنگىزۋ بويىنشا ايتۋعا بولادى. وسىعان بايلانىستى ترانسپورت سالاسىنداعى حالىقارالىق زاڭناماعا جانە كوميسسيا شەشىمىنە وزگەرىس ەنگىزۋ باعىتتارىندا بىرىككەن جۇمىس وتكىزۋدى جانە كولىك قۇجاتتارىن كەدەندە ەلەكتروندى تاپسىرۋ ماسەلەسىن قاراستىرۋدى ۇسىنامىن»، - دەدى ب. ساعىنتايەۆ.

 وتىرىسقا ەۋرازيالىق ەكونوميكالىق وداققا مۇشە مەملەكەتتەردىڭ ۇكىمەت باسشىلارى قاتىسىپ، ماكروەكونوميكالىق احۋال، ەاەو ەلدەرىندە تۇراقتى ەكونوميكالىق دامۋدى قامتاماسىز ەتۋ جونىندەگى ۇسىنىستار، 2017 -جىلى ءوزارا ساۋدانىڭ جاعدايى تۋرالى ەاەو كوميسسيا باياندامالارىن تىڭدادى.

جيىندا ەاەو شەڭبەرىندەگى ينتەگراتسيالىق ءوزارا ءىس قيمىلدىڭ ءبىرقاتار وزەكتى ماسەلەلەرى قارالۋدا. سونىمەن قاتار، اتقارىلعان ناتيجەلەر قورىتىندىلانىپ، ۇيىم جۇمىسىنىڭ الداعى ۋاقىتتاعى باعىتتارى بەلگىلەندى.

اۆتور: الماس مۇقاش ۇلى