كوكجالدى قولمەن الۋ: ش ق و تۇرعىندارى قاسقىرمەن كۇرەستە قاۋقارسىز

 وسكەمەن. قازاقپارات - قوراعا تۇسكەن كوكجالدى قاقپانمەن ۇستاپ، سويىلمەن سوعىپ العان تارباعاتايلىق جىگىت تۋرالى ۆيدەو الەۋمەتتىك جەلىدە تاراپ كەتتى.

 اتالعان وقيعانىڭ ءمان- جايىن قازاقپارات ءتىلشىسى جاڭااۋىل اۋىلدىق وكرۋگىنە حابارلاسىپ ءبىلدى.

اۋىلدىق كورۋگتىڭ اكىمى داۋىتبەك نيازبەكوۆ قاقپانمەن قاسقىر اۋلاپ جۇرگەن جىگىتتىڭ تارباعاتاي اۋدانى احمەتبۇلاقتا تۇراتىنىن ايتتى. وقيعا احمەتبۇلاقتىڭ سىرتىنداعى قىستاۋدا بولعان. قاسقىر تۋرالى ۆيدەونى تەلەفونعا تۇسىرگەن جىگىتتىڭ اتى- ءجونى ماقسات بايبازاروۆ. اكەسى دالەلبەك بايبازاروۆپەن بىرگە اتالعان قىستاۋدا مال باعادى.

«ماقساتتىڭ ءوزى ۆيدەودا ايتقانداي، قىستاۋعا كەلگەلى قوراسىنان التى قوي مەن ءبىر تايدى يتقۇس جەپ كەتكەن. «مال اشۋى - جان اشۋى» دەگەندەي، قاقپانداعى قاسقىردى سول ءۇشىن سوعىپ العان» ، - دەيدى اكىم.

اكىمنىڭ ايتۋىنشا بۇل ايماق قىتايمەن شەكارادا جاتقاندىقتان، اۋىل تۇرعىندارىنا مىلتىقپەن ۇزاق شىعۋعا تىيىم سالىنعان. يتقۇستىڭ قىستاۋلارعا ءجيى شابۋىلداپ، مالعا اۋىز سالۋىنىڭ ءبىر سەبەبى وسىندا جاتسا كەرەك.

«احمەتبۇلاق اۋلى شەكاراعا جاقىن ورنالاسقاندىقتان، قىستاۋلارعا رۇقسات ارقىلى عانا شىعامىز. ول جاققا مىلتىقپەن وتكىزبەيدى. قىستاۋدا ءبىر- بىرىنەن الشاق ورنالاسقان 40 قا جۋىق قورا بار. قورا يەلەرىنىڭ ەشقايسىندا مىلتىق جوق. ءبىر سوزبەن ايتقاندا، قىستاۋداعى مالدان بۇرىن مالشىعا قاۋىپ ءتونۋى مۇمكىن. توپتاسىپ كەلسە، قارۋسىز ادامدى دا جارالايدى عوي، - دەيدى داۋىتبەك نيازبەكوۆ.

 كوكجالدى قولمەن سوعىپ العان جىگىتپەن حابارلاسۋدىڭ ءساتى تۇسپەدى. وكرۋگ اكىمى ونىڭ قىستاۋىندا ۇيالى بايلانىس جوق ەكەنىن ايتتى.