رەسەيگە قارسى سانكسيانىڭ قازاقستانعا ەش قاتىسى جوق - ا ق ش ەلشىسى
بۇل تۋرالى بۇگىن ەلباسى نۇرسۇلتان نازاربايەۆتىڭ ۆاشينگتونعا رەسمي ساپارىنىڭ قورىتىندىسىنا وراي ب ا ق وكىلدەرىنىڭ ساۋالىنا جاۋاپ بەرگەن ا ق ش- تىڭ قازاقستانداعى توتەنشە جانە وكىلەتتى ەلشىسى دجوردج كرول ايتتى، دەپ حابارلايدى قازاقپارات.
«ارينە، رەسەيگە قارسى سانكسيانىڭ قازاقستانعا ەش قاتىسى جوق. تولىقتاي العاندا بۇل ساياسات قازاقستانعا قارسى باعىتتالماعان. مەن سىزدەرگە بۇل سانكسيانىڭ قازاقستان ەكونوميكاسىنا ىقپالى بار ەكەندىگىن ايتا الامىن جانە قازاقستان تارابى بۇعان ايرىقشا الاڭداۋلى. ءبىز بۇل ماسەلەدە قازاقستاندىق سەرىكتەستەرمەن كەڭەسۋگە ۋاعدالاستىق. ماسەلەن، كونگرەسس قابىلداعان زاڭنامالار بويىنشا جانە باسقالارى. بۇل زاڭنامالار قالاي ارەكەت ەتەتىندىگىنە قاتىستى قازاقستاندىق سەرىكتەستەرمەن كەڭەسۋلەر بار جانە ول جالعاسا دا بەرەدى. ا ق ش تارابى بۇل سانكسيالاردىڭ قازاقستانعا، وسى جەردەگى قازاقستاندىق بيزنەس پەن امەريكالىق بيزنەسكە تەرىس اسەر ەتپەۋىنە نيەتتەستىك تانىتىپ وتىر»، - دەدى ەلشى.
سونىمەن قاتار دجوردج كرول قازاقستان پرەزيدەنتى نۇرسۇلتان نازاربايەۆتىڭ ا ق ش پەن رەسەي كوپتەگەن حالىقارالىق ماسەلەلەردى شەشۋ ءۇشىن بىرلەسە جۇمىس ىستەۋى ءتيىس دەگەن مالىمدەمەسىن امەريكالىق تاراپ قولدايتىندىعىن باسا ايتتى.
ايتا كەتەيىك، قاڭتار ايىنىڭ 17 سىندە اق ۇيدە امەريكا قۇراما شتاتتارىنىڭ پرەزيدەنتى دونالد ترامپپەن ەكەۋارا كەزدەسۋدەن كەيىن بىرلەسكەن مالىمدەمە جاساۋ بارىسىندا ەلباسى نۇرسۇلتان نازاربايەۆ رەسەي مەن ا ق ش كوپتەگەن حالىقارالىق ماسەلەنى بىرلەسىپ شەشە الاتىندىعىن ايتقان ەدى.
«ءوزىڭىز بىلەتىندەي، قازاقستان الەمدە كولەمى جونىنەن 4-ورىن الاتىن يادرولىق ارسەنالدان باس تارتىپ، سەمەيدەگى سىناق الاڭىن جاپتى. وسى ورايدا، باسقا دا يادرولىق قارۋى بار ەلدەرگە بىزدەن ۇلگى الۋعا شاقىرۋعا مورالدىق قۇقىعىمىز بار. مۇنداي اڭگىمەنى يرانمەن جۇرگىزدىك، قازىر سولتۇستىك كورەيامەن كەلىسسوز جۇرگىزە الامىز. ك ح د ر ماسەلەسىن قىتاي، ا ق ش، رەسەي تاراپى بىرلەسە شەشە الادى. سوندىقتان، كورشى ەل رەتىندە رەسەي مەن ا ق ش اراسىنداعى قارىم-قاتىناستىڭ ناشارلاپ كەتۋى ءبىزدى الاڭداتادى»، - دەدى نۇرسۇلتان نازاربايەۆ.
اۆتور: مارلان جيەمباي
