پاۆلوداردا بيەنىڭ قۇرعاق ءسۇتى ساتىلۋدا - كەسكىن
بۇل تۋرالى لەبياجى اۋدانىنداعى «التاي» شارۋا قوجالىعىنىڭ باسشىسى ساتبەك مۋكين ايتتى، دەپ حابارلايدى pavlodarnews.kz.
- پاۆلودارلىق «Fresh Milk» كومپانياسىمەن بىرگە ءوز قارجىمىزعا 730 مىڭ ەۋروعا سۋبليماتسيالىق اپپارات ساتىپ الدىق، - دەيدى ساتبەك مۋكين.
- يتاليادا شىعارىلعان جابدىق ەلەكتر ەنەرگياسىن كوپ مولشەردە تۇتىنادى. ال، جەكە مەنشىك شارۋاشىلىق اۋىلدان 10 شاقىرىم جەردە ورنالاسقان. ءبىزدىڭ ترانسفورماتسيالىق قوسالقى ستانتسيانىڭ ەلەكترمەن جابدىقتاۋعا مۇمكىندىگى جەتپەيدى. سوندىقتان وبلىس ورتالىعىنداعى كومپانيانىڭ كاسىپورنىندا وڭدەۋ جۇمىستارى جۇرگىزىلسە، ءوندىرىس بازاسى اۋىلدا ورنالاسقان. اپپاراتتىڭ قۋاتتىلىعى 200 ليتر قىمىزدى وڭدەۋ جولى ارقىلى 20 كەلى بيەنىڭ قۇرعاق ءسۇتىن الۋعا مۇمكىندىك بەرەدى».
كاسىپكەردىڭ ايتۋىنشا، سالماعى 100 گرامم بيەنىڭ قۇرعاق ءسۇتى 3000 تەڭگەدەن بوساتىلادى. 100 گرامى ءبىر ليتر سۋعا قوسىلادى. قولدانۋ مولشەرىنە شەكتەۋ قويىلمايدى. ەكى ءتۇرلى جولمەن - سۋمەن ارالاستىرۋ ارقىلى نەمەسە قۇرعاق كۇيىندە تۇتىنۋعا بولادى. دەگەنمەن ەش قوسىندىسىز پايدالانعان اناعۇرلىم پايدالى. سەبەبى سۋبليماتسيالىق ادىسپەن الىناتىن ءونىمنىڭ قۇرامىندا دارۋمەندەردىڭ 95 پايىزى ساقتالىپ قالادى. 2017 -جىلدىڭ جەلتوقسان ايىنان باستاپ بۇگىنگە دەيىن وبلىس ورتالىعىنا جانە استانا، الماتى وڭىرلەرىنە 600 كەلىگە جۋىق ءونىم جىبەرىلگەن.
- بۇل ناعىز تازا تابيعي سيمبيوتيك. اعزاداعى جاسۋشىلاردى قالىپقا كەلتىرەدى جانە يممۋنيتەتتى نىعايتادى. قىمىزدىڭ مۇنداي ءتۇرىن زەرتتەگەن رەسەيلىك عالىمدار ونى بالالاردىڭ تاماعىنا قوسۋدى جوسپارلاپ وتىر. ءتىپتى، ايەل ادامدارعا جۇكتىلىك كەزىندە پايدالانعان وتە پايدالى.
ايتا كەتەرلىك جايت، ءبىزدىڭ ءونىمدى ەكىقابات كەزىندە تۇتىنعان تانىس ايەل ادام دۇنيەگە دەنى ساۋ ءسابي اكەلگەن. بالا سارى اۋرۋ سياقتى ەشبىر اۋرۋعا شالدىقپاعان، - دەيدى قوجالىق يەسى. ساتبەك مۋكين بيىل 400 باس ءىرى قاراعا ەكى بازا مەن مالدى ازىقتاندىرۋعا ارنالعان ارنايى بازا سالۋدى كوزدەپ وتىر. ماقساتىن جۇزەگە اسىرۋ ءۇشىن «اگرارلىق نەسيە كورپوراتسياسى» ا ق نەسيە الۋعا ءوتىنىش جولداعان. كاسىپكەر رەسپۋبليكا بويىنشا ءوز ءونىمىن تاسىمالدايتىن سەرىكتەسى «Fresh Milk» كومپانياسىن سۇتپەن قامتاماسىز ەتەدى. قازىر قىس مەزگىلىندە ساۋىلاتىن بيە سانى از، دەگەنمەن تاۋلىگىنە 15-20 ليتر قىمىزدىڭ قۇرعاق ءتۇرى وندىرىلەدى. بولاشاقتا ساۋىلاتىن بيە سانىن 120-عا دەيىن جەتكىزۋ جوسپاردا بار.
