فۋتزال: ەۋروپا چەمپيوناتىن ءساتتى باستاعان قازاقستان قۇراماسى شيرەك فينالعا جولداما الدى
بۇدان ەكى جىل بۇرىن سەربيادا وتكەن ەۋروپا چەمپيوناتىندا مۇنداي دوداعا العاش رەت قاتىسقانىنا قاراماستان، ايدى اسپانعا شىعارىپ، قولا جۇلدەگەر اتانعان كاكاۋدىڭ شاكىرتتەرى پولشامەن كەزدەسۋدى ءساتتى باستادى.
3-مينۋتتا ادەمى كومبيناتسيادان كەيىن قازاقستان قۇراماسىنا جاڭادان الىنعان تاينان قاقپا بۇرىشىن ءدال كوزدەپ، ەسەپ اشتى. 9-مينۋتتا كوماندا كاپيتانى دىنمۇحامبەت سۇلەيمەنوۆتىڭ تاماشا پاسىنان كەيىن ءبىرجان ورازوۆ ەسەپتى 2:0-گە جەتكىزدى.
ءبىرىنشى تايم بىتۋگە ءبىر مينۋتتاي قالعاندا، د. سۇلەيمەنوۆ سول قاپتالدان سۋىرىلىپ شىققان دۋگلاسقا پاس بەرسە، ول قارسى تۇستاعى سەرىك جامانقۇلوۆقا سىرعىتا سالدى. 2016-جىلعى ەۋروپا چەمپيوناتىندا بەس گول سوعىپ، مەرگەندەردىڭ قاتارىنان كورىنگەن سەرىككە بۇل دوپتى قاقپاعا ەنگىزۋ قيىن بولعان جوق. ويىننىڭ العاشقى بولىگىندە پولياكتار بەس مارتە ءتارتىپ بۇزدى. سودان كەيىن پولشانىڭ قاقپاسىنا پەنالتي بەلگىلەندى، بۇل نۇكتەدەن ميحايل پەرشين ءمۇلت كەتكەن جوق.
ەكىنشى تايمدا پولياكتار العا ۇمتىلىپ باقتى. ولاردىڭ گول سوعاتىنداي مۇمكىندىكتەرى بولدى. سول سەكىلدى شىڭعىس ەسەنامانوۆتىڭ سوققىسىن پولشانىڭ قاقپاشىسى ميحال كالۋجا قايتارا ءبىلدى. ال قازاقستاننىڭ قاقپاسىن 2015 جانە 2016-جىلدارى الەمنىڭ ۇزدىك قاقپاشىسى اتانعان يگيتا قورعاپ، كەي تۇستاردا ءوزىنىڭ سۇيىكتى ادەتىنە باسىپ، شابۋىلعا دا قوسىلىپ وتىردى.
دەگەنمەن، 28-مينۋتتا بۇرىشتامادان بەرىلگەن دوپتان كەيىن دومينيك سولەتسكي ەسەپتى قىسقارتتى. ماتچ اياقتالۋعا بەس-التى مينۋتتاي ۋاقىت قالعان كەزدە پولياكتار قاقپاشىسىن الاڭداعى ويىنشىعا اۋىستىرىپ، شابۋىلعا كوشتى. ءبىراق وزدەرى شىڭعىس ەسەنامانوۆقا قارسى ءتارتىپ بۇزىپ، تاعى 10 مەترلىك ايىپ دوبى بەلگىلەندى. بۇل جولى م. پەرشين كالۋجانىڭ ورنىنا شىققان قاقپاشى ميحال ۆيدۋحتى الداي المادى. ايتسە دە كوپ ۇزاماي ۆيدۋح دۋگلاستىڭ سوققىسىن وتكىزىپ الدى. سودان سوڭ كايناننىڭ تاعى ءبىر گول سوعاتىنداي مۇمكىندىگى بولدى.
ءبىر وكىنىشتىسى، شابۋىل كەزىندە پولياك ويىنشىسى اياعىنان تەۋىپ، جاراقات العان البەرت اقبالىقوۆ سودان كەيىن الاڭدا كورىنگەن جوق. سونداي-اق يگيتانىڭ دا جاراقاتىن اۋىرسىنعانى بايقالىپ تۇردى. بىرىنشىلىك بارىسىندا فۋتبولشىلاردىڭ، ارينە، قاتاردان شىقپاعانى جاقسى.
وسىلايشا، كوماندا قۇرامىندا نەگىزگى ويىنشىلاردىڭ ءبىرى، جاراقات العان لەو بولماسا دا، قازاقستاندىقتار بيىلعى بىرىنشىلىكتىڭ العاشقى كەزدەسۋىندە- اق كۇشتىلەردىڭ بىرىنەن سانالاتىنىن كورسەتە ءبىلدى.
B توبىندا ءبىرىنشى كەزدەسۋدە پولياكتار 2016-جىلعى الەم چەمپيوناتىنىڭ كۇمىس جۇلدەگەرى رەسەي قۇراماسىنا قاتتى قارسىلىق كورسەتىپ، 1:1 ەسەبىمەن تەڭ تارقاسقان بولاتىن.
ەندى 3- اقپان كۇنى قازاقستان مەن رەسەي قۇرامالارى ءوزارا وينايدى. پلەي-وفف باسەكەسىنە ءار توپتان ەكى كوماندا جولداما الاتىنىن ەسكەرسەك، سوڭعى ماتچتىڭ ناتيجەسىنە قاراماستان، قازاقستان قۇراماسى قازىردىڭ وزىندە شيرەك فينالعا شىعىپ وتىر. تەك كەلەسى كەزەڭدە نەعۇرلىم وسالداۋ قارسىلاس ءتۇسۋى ءۇشىن ءوز توبىندا ءبىرىنشى ورىنعا يە بولعان جاقسى. ول ءۇشىن رەسەيلىكتەرمەن تەڭ ويىن جەتكىلىكتى.
ايتا كەتەيىك، 30- قاڭتاردا باستالعان ەۋروپا بىرىنشىلىگى 10- اقپان كۇنى مارەگە جەتەدى.
