قازاقستان سپۋتنيگىن اۋىستىرۋعا قاتىستى ينۆەستيتسيالىق ۇسىنىس دايىندالدى
«ءاربىر عارىشتىق اپپاراتتىڭ بەلسەندى قىزمەت ەتۋ مەرزىمى بولادى. الداعى ۋاقىتتا «KazSat-2» سپۋتنيگىن جاڭاسىنا الماستىرۋ قاجەتتىلىگى تۋىندايدى. وسى ورايدا جاڭا اپاراتقا قاتىستى ينۆەستيتسيالىق ۇسىنىس دايىندالدى جانە ونى قر قورعانىس جانە اەروعارىش ونەركاسىبى مينيسترلىگىنە تاپسىردىق»، - دەدى باۋىرجان قۇدابايەۆ «اقكول» عارىشتىق بايلانىس ورتالىعىندا سەنات دەپۋتاتتارىنىڭ قاتىسۋىمەن وتكەن كەڭەستە.
ونىڭ سوزىنە قاراعاندا، جاقىن ارادا جەر سەرىكتەرىن جۇپتاپ ۇشىرۋعا قاتىستى ماسەلەنى شەشۋ كەرەك بولادى. سەبەبى اپپاراتتاردى عارىشقا جۇپتاپ جىبەرۋ تەك رەسەيلىك جۇيەلەر ءۇشىن ۇسىنىلادى ەكەن. جۇپتاپ ۇشىرۋدىڭ ارقاسىندا اتالعان جوبانى جۇزەگە اسىرۋ بارىسىندا ەلىمىزدە قارجىنى ۇنەمدەۋگە مۇمكىندىك بولادى. ياعني، شامامەن 25 ميلليون دوللارعا دەيىن قارجى ۇنەمدەلەدى.
«تاعى ءبىر ماسەلە جەردەگى كەشەندەردى پايدالانۋعا قاتىستى. «KazSat-2» «KazSat-3» جوبالارى بويىنشا ينتەگراتور رەتىندە رەسەيلىك كومپانيالار قاتىسقان. سايكەسىنشە، جەردەگى جۇيەلەر ولاردىڭ تالاپتارىنا وراي جوبالانعان، ەندى بىزگە بۇل ماسەلەنى شەشۋ كەرەك. ەگەر دە جوبانى باسقا شەتەلدىك كومپانيامەن جۇزەگە اسىرسا، وندا بىزدە بار جابدىقتاردى شەتەل تەحنيكاسىنا قايتا ىڭعايلاۋ قاجەت بولادى. بۇل ءوز كەزەگىندە قوسىمشا قارجىنى تالاپ ەتەدى»، - دەدى ول.
بۇدان بۇرىن حابارلانعانداي، «KazSat-2» جەر سەرىگىنىڭ جۇمىس ۋاقىتى 2023 -جىلعا دەيىن نەگىزدەلگەن، ياعني ول 12,5 جىل قىزمەت ەتۋى ءتيىس (2011 -جىلى عارىشقا شىعارىلدى). سوندىقتان جاڭا عارىش («KazSat-2R») اپپاراتىن دايىنداۋ جوباسىن ىسكە اسىرۋ شارالارى باستالدى.
ق ر قورعانىس جانە اەروعارىش ونەركاسىبى مينيسترلىگىنىڭ مالىمەتىنشە، «KazSat-2R» سپۋتنيگىن قۇراستىرۋ شارالارى 2020 - جىلى باستالادى.
اۆتور: رۋسلان عابباسوۆ
