ماس كۇيدە ۇستالعان ۇلتتىق بيۋرو قىزمەتكەرى جۇمىستان بوساتىلدى

استانا. قازاقپارات - سىبايلاس جەمقورلىققا قارسى ءىس- قيمىل ۇلتتىق بيۋروسىنىڭ قىزمەتكەرى مەملەكەتتىك قىزمەتكەرگە لايىقتى ەمەس مىنەز- قۇلقى ءۇشىن جۇمىستان شىعارىلدى،

  دەپ حابارلايدى «قازاقپارات» ح ا ا ءتىلشىسى ۆەدومستۆونىڭ باسپا ءسوز قىزمەتىنە سىلتەمە جاساپ.

كەلتىرىلگەن مالىمەتكە سايكەس، بايشيعاشيەۆ قوعامدىق ورىندا ماس كۇيدە جۇرگەن.

«30 - قاڭتار كۇنى ماس كۇيدە مەملەكەتتىك ءنومىرى 247 NMA/01 «Toyota»  ماركالى اۆتوكولىكپەن جۇرگەن ا. و. بايشيعاشيەۆ، استانا قالاسىنىڭ ءى ءى د ج پ ق جول- پوليتسياسى قىزمەتىنىڭ وكىلدەرىنە ءوزىن سىبايلاس جەمقورلىققا قارسى قىزمەتتىڭ تەرگەۋشىسى رەتىندە تانىستىرعان. قۇقىق بۇزۋشى مەن ونىڭ قىزمەتتىك كۋالىگى سمارتفوننىڭ كامەراسىنا ءتۇسىرىلىپ، ۆيدەو الەۋمەتتىك جەلىگە جاريالانىپ كەتكەن»، - دەلىنگەن باسپا ءسوز قىزمەتىنىڭ حابارلاماسىندا.

 تارتىپتىك كوميسسيا ا. و. بايشيعاشيەۆتىڭ قوعامدىق ورىندا ماس بولىپ ءجۇرۋى سىبايلاس جەمقورلىققا قارسى كۇرەس جۇرگىزەتىن ورگان قىزمەتكەرلەرىنىڭ بەدەلىنە نۇقسان كەلتىرەدى دەگەن شەشىمگە كەلدى. بۇل ءوز كەزەگىندە ق ر مەملەكەتتىك قىزمەتشىلەردىڭ ادەپ كودەكسىنە قايشى.

سىبايلاس جەمقورلىققا قارسى ءىس- قيمىل ۇلتتىق بيۋروسىنىڭ ىشكى قاۋىپسىزدىك باسقارماسى اتالعان جاعداي بويىنشا قىزمەتتىك تەرگەۋ جۇرگىزىپ، ماتەريالدىڭ بارلىعىن زەرتتەدى. ناتيجەسىندە، اتالعان قىزمەتكەردى جۇمىستان بوساتۋ تۋرالى شەشىم قابىلداندى.

اۆتور: ايان بەكەن ۇلى