شالا تۋعان نارەستە شالعاي اۋىلدان وسكەمەنگە تىكۇشاقپەن جەتكىزىلدى
كاتونقاراعاي اۋىلىندا شالا تۋعان نارەستەنى شۇعىل تۇردە وسكەمەنگە جەتكىزۋ قاجەت بولعان. ق ر ءى ءى م توتەنشە جاعدايلار كوميتەتىنە تيەسىلى «قاز اۆيا قۇتقارۋ» مەكەمەسىنىڭ ەۆروكوپتەر-027 تىكۇشاعى ءسابيدى كەشە وبلىس ورتالىعىنداعى «انا مەن بالا ورتالىعىنا» جەتكىزدى.
«نارەستە وتە اۋىر جاعدايدا دۇنيەگە كەلدى. بەكىتىلگەن تالاپ بويىنشا ونداي بالالاردى سانيتارلىق اۆياتسيامەن ورتالىققا جەتكىزۋگە مىندەتتىمىز. تىكۇشاق دەر كەزىندە كەلىپ، بالانى وسكەمەندەگى مامانداردىڭ قولىنا امان- ەسەن جەتكىزدى»، - دەيدى كاتونقاراعاي اۋدانىنىڭ اۋدان ارالىق اۋرۋحانىڭ باس دارىگەرى ارقابەك قادىربايەۆ.
نارەستە ءالى دە جانساقتاۋ بولىمىندە جاتىر. دارىگەرلەر وعان وتا جاساۋ قاجەت دەپ وتىر.
«ءسابيدىڭ جاعدايى اۋىر. كەشەدەن بەرى ۋلترادىبىستىق زەرتتەۋلەردەن وتكىزىپ جاتىرمىز»، - دەيدى «انا مەن بالا» ورتالىعىنىڭ باس دارىگەرى ەرمەك وماربەكوۆ.
اۆتور: ەسىمجان ناقتىباي
